സമാധാനപരമായി ജോലി ചെയ്ത് ജീവിക്കുക എന്നതാണ് ഏതൊരാളുടേയും ലക്ഷ്യം. ആ ഒരു ലക്ഷ്യത്തില്‍ മുന്നില്‍ നില്‍ക്കുന്ന മലയാളികളുടെ സ്വന്തം ഗള്‍ഫ് രാജ്യത്തിന് ഒരു ബഹുമതി കൂടി.

ജീവിക്കാനും ജോലി ചെയ്യാനും ഏറ്റവും മികച്ച രാജ്യങ്ങളുടെ പട്ടികയില്‍ നാലാം സ്ഥാനം കരസ്ഥമാക്കിയിരിക്കുകയാണ് യു.എ.ഇ. എന്ന ഗള്‍ഫ് രാജ്യം. എച്ച്.എസ്.ബി.സിയുടെ പതിനാലാമത് വാര്‍ഷിക എക്‌സ്പാറ്റ് എക്‌സ്‌പ്ലോറര്‍ പഠനത്തിലാണ് ഈ നേട്ടം കരസ്ഥമാക്കിയിരിക്കുന്നത്. നിലവില്‍ സ്വിറ്റ്‌സര്‍ലന്റ്, ഓസ്‌ട്രേലിയ, ന്യൂസീലന്‍ഡ് എന്നീ രാജ്യങ്ങളാണ് യു.എ.ഇക്ക് മുകളിലുളളത്. നേരത്തെയുണ്ടായിരുന്നതില്‍ നിന്നും പത്ത് സ്ഥാനങ്ങള്‍ മുകളിലേക്ക് കയറിയാണ് യുഎഇ മുന്നേറ്റം നടത്തിയത്.

വിദേശത്ത് താമസിക്കുകയും ജോലി ചെയ്യുകയും ചെയ്യുന്ന ഇരുപതിനായിരത്തിലധികം ആളുകളെ ഉള്‍പ്പെടുത്തി നടത്തിയ പഠനത്തില്‍ നിന്നുമാണ് ഇത്തരമൊരു കണ്ടെത്തല്‍ നടത്തിയത്. യു.എ.ഇയില്‍ സര്‍വേയില്‍ പങ്കെടുത്ത 82 ശതമാനം പ്രവാസികളും അടുത്ത പന്ത്രണ്ട് മാസത്തില്‍ ജീവിതം വീണ്ടും സുസ്ഥിരവും സാധാരണവുമാകുമെന്ന് ശുഭാപ്തിവിശ്വാസം പ്രകടിപ്പിച്ചു. ലോകം മുഴുവന്‍ മഹാമാരിയുടെ പിടിയില്‍ അമര്‍ന്നതിന്റെ ആഘാതത്തില്‍ നിന്നും മുക്തമായിട്ടില്ലാത്ത വേളയിലാണ് ഇത്തരമൊരു പ്രതികരണം ലഭിച്ചിരിക്കുന്നത് എന്നത് ശ്രദ്ധേയമാണ്.

അതേസമയം യുഎഇയിലെ പോലീസിനെ പറ്റി അഭിനന്ദന പ്രവാഹമാണ് ഉണ്ടായിരിക്കുന്നത്. വിലകൂടിയ കാര്‍ തന്ത്രപരമായി മോഷ്ടിച്ച് കടന്നുകളയാന്‍ ശ്രമിച്ച സംഘത്തെ മണിക്കൂറുകള്‍ക്കുള്ളില്‍ ഷാര്‍ജ പൊലീസ് അറസ്റ്റുചെയ്തു. അറബികള്‍ ഉള്‍പ്പടെയുള്ള അഞ്ചംഗ സംഘമാണ് പിടിയിലായത്. ഇവരില്‍ നിന്ന് നിരവധി ബാങ്കുകളുടെ ചെക്കുബുക്കുകളും മറ്റു രേഖകളും പിടിച്ചെടുത്തിട്ടുണ്ട്. ഇതില്‍ ചിലത് വ്യാജമാണെന്നാണ് റിപ്പോര്‍ട്ട്.

വാഹനം വില്‍ക്കാനുണ്ടെന്നറിഞ്ഞതോടെ തന്ത്രപരമായാണ് പ്രതികള്‍ ഉടമയെ സമീപിച്ചത്. സംഘത്തിലൊരാള്‍ ഉടമയുടെ അടുത്തെത്തി വാഹനം വാങ്ങാന്‍ താത്പര്യമുണ്ടെന്ന് അറിയിച്ചു. വിലപറഞ്ഞ് കരാര്‍ ഉറപ്പിച്ചു. ഇടപാട് പൂര്‍ത്തിയാക്കാന്‍ രണ്ടുമണിക്കൂര്‍ സമയം വേണമെന്നും അയാള്‍ ആവശ്യപ്പെട്ടു. തുടര്‍ന്ന് ബലം പ്രയോഗിച്ച് കാറുമായി കടക്കുകയായിരുന്നു.

പരാതി ലഭിച്ചയുടന്‍ വവിധ വകുപ്പുകളെ ഏകോപിപ്പിച്ച് പൊലീസ് അന്വേഷണം ആരംഭിച്ചു. ചുരുങ്ങിയ സമയത്തിനുള്ളില്‍ റാസ് അല്‍ ഖൈമയിലെ സംഘത്തിന്റെ കേന്ദ്രം പൊലീസ് കണ്ടെത്തി. തുടര്‍ന്ന് വാഹനമോഷ്ടാക്കളെ അറസ്റ്റുചെയ്യുകയും വാഹനം പിടിച്ചെടുക്കയും ചെയ്തു. പ്രതികളെ തിരിച്ചറിയാനുള്ള വ്യക്തമായ തെളിവുകളൊന്നും ഇല്ലാതിരിക്കെ ഞൊടിയിടകൊണ്ട് അവരെ അറസ്റ്റുചെയ്ത പൊലീസിന് അഭിനന്ദന പ്രവാഹമാണിപ്പോള്‍.

ഇതിന് പിന്നാലെയാണ് യുഎഇയ്ക്കും അഭിമാനമായി ബഹുമതി ലഭിച്ചിരിക്കുന്നത്. യു.എ.ഇയിലെ ജീവിത നിലവാരമാണ് പ്രവാസികളെ ഉദ്ദേശിച്ചതിലും കൂടുതല്‍ കാലം അവിടെ താമസിക്കാന്‍ പ്രേരിപ്പിക്കുന്നത്. യു.എ.ഇയിലെ മിക്ക പ്രവാസികളും (86 ശതമാനം) പറയുന്നത് അവരുടെ മൊത്തത്തിലുള്ള ജീവിതനിലവാരം അവരുടെ മാതൃരാജ്യത്തേക്കാള്‍ മികച്ചതാണെന്നാണ്. 11 ശതമാനം പേര്‍ മാത്രമാണ് കൊവിഡ് കാരണം യു.എ.ഇയില്‍ താമസിക്കാനുള്ള പദ്ധതി മാറ്റിയതായി പറഞ്ഞത്.

യു.എ.ഇ.യുടെ പുരോഗതി ആ രാജ്യത്തെ അവരുടെ ഭവനമാക്കുന്ന അനേകര്‍ക്ക് ആകര്‍ഷകമാണെന്ന് പഠനം പറയുന്നു. അവരുടെ വരുമാനം (56 ശതമാനം) മെച്ചപ്പെടുത്തുക, കരിയറില്‍ (49 ശതമാനം) മുന്നേറുക, ജീവിത നിലവാരം (43 ശതമാനം) മെച്ചപ്പെടുത്തുക എന്നിവയാണ് യു.എ.ഇയിലേക്ക് പോകാന്‍ പ്രവാസികള്‍ തിരഞ്ഞെടുത്ത മൂന്ന് കാരണങ്ങളായി പഠനം കണ്ടെത്തിയത്.

അതേസമയം ഗള്‍ഫ് രാജ്യങ്ങളില്‍ ബഹ്‌റൈനും ഖത്തറും എട്ടും പത്തും സ്ഥാനങ്ങള്‍ കരസ്ഥമാക്കിയിട്ടുണ്ട്.