പ്ലസ് വണ്‍ മൂല്യനിര്‍ണയ ക്യാമ്പിലെ ജീവനക്കാരെ വെട്ടിച്ചുരുക്കിയതിന് പിന്നാലെ അദ്ധ്യാപകര്‍ക്ക് അമിത ഡ്യൂട്ടി നല്‍കി ഹയര്‍സെക്കന്‍ഡറി പരീക്ഷാ വിഭാഗം. പ്രതിദിനം രണ്ടു സെക്ഷനുകളിലായി ഒരാള്‍ 26 പേപ്പറുകളേ മൂല്യനിര്‍ണയം നടത്താവൂവെന്നാണ് ചട്ടം. അവധിയിലുള്ള അദ്ധ്യാപകരുടെ പേപ്പറുകള്‍ കൂടി ഡ്യൂട്ടിയിലുള്ളവര്‍ മൂല്യ നിര്‍ണയം നടത്തണമെന്നാണ് പരീക്ഷാ സെക്രട്ടറിയുടെ പുതിയ ഉത്തരവ്.


ഒരു ചീഫിനെ കൂടാതെ അഞ്ച് അദ്ധ്യാപകരാണ് ഒരു ബാച്ചില്‍ ഉണ്ടാവുക. പുത്തന്‍ നിര്‍ദ്ദേശ പ്രകാരം ക്യാമ്പുകളിലെ അഞ്ച് അദ്ധ്യാപകര്‍ അവധിയിലിരിക്കുന്ന ആളുടെ പേപ്പറുകള്‍ വീതിച്ചെടുക്കണമെന്നാണ് ചട്ടം. കൂടുതല്‍ പേപ്പറുകള്‍ ഒരു അദ്ധ്യാപകന്‍ മൂല്യ നിര്‍ണയം നടത്തുന്നത് പരാതിക്കിടയാക്കും. ഇന്നു മുതല്‍ മൂല്യനിര്‍ണയ ക്യാമ്പുകള്‍ തുടങ്ങും.

പ്ലസ് വണ്‍ പരീക്ഷകള്‍ പൂര്‍ണമായും കഴിഞ്ഞിട്ടില്ലാത്ത സാഹചര്യത്തിലാണ് മൂല്യ നിര്‍ണയം നടത്താനൊരുങ്ങുന്നത്. പ്രളയ ബാധിത പ്രദേശങ്ങളിലെ മൂല്യ നിര്‍ണയ ക്യാമ്പുകളെ കുറിച്ചും ഹയര്‍സെക്കന്‍ഡറി ഡയറക്ടറേറ്റ് ഉത്തരവില്‍ പറയുന്നില്ല. സംസ്ഥാനത്ത് 80 കേന്ദ്രങ്ങളിലായി ഒന്നാം വര്‍ഷ ഹയര്‍ സെക്കന്‍ഡറി പരീക്ഷയുടെ മൂല്യനിര്‍ണയമാണ് നടക്കുക.

ക്യാമ്പുകളില്‍ 300 നും 500 നും ഇടയില്‍ അദ്ധ്യാപകരെയാണ് നിയോഗിച്ചിരിക്കുന്നത്. മൂല്യനിര്‍ണയത്തിന് ഹാജരാകാത്ത അദ്ധ്യാപകന്‍ നോക്കേണ്ട പേപ്പറുകള്‍ ബാക്കി നാല് പേര്‍ക്കായി വീതിച്ചു നല്‍കുമ്പോള്‍ പായ്ക്കറ്റ് കൈപ്പറ്റിയതായി ഒപ്പിടേണ്ടി വരുന്നത് ഒരു അദ്ധ്യാപകന്‍ മാത്രമാണ്.