കെഎസ്‌ആര്‍ടിസി എറണാകുളം ഡിപ്പോയിലെ അഡ്മിനിസ്‌ട്രേറ്റീവ് ബ്ലോക്കിന്റെ നിര്‍മാണത്തിലുണ്ടായ 1.39 കോടി രൂപയുടെ നഷ്ടം ഉദ്യോഗസ്ഥയില്‍ നിന്നും ഇടാക്കാനുള്ള നടപടി സ്വീകരിക്കണമെന്ന് ധനകാര്യപരിശോധന വിഭാഗത്തിന്റെ റിപ്പോര്‍ട്ടിന് പിന്നാലെ കെഎസ്‌ആര്‍ടിസി സിവില്‍ വിഭാഗം മേധാവിയും ചീഫ് എന്‍ജിനീയറുമായ ആര്‍ ഇന്ദുവിനെ തത് സ്ഥാനത്ത് നിന്നും സസ്‌പെന്‍ഡ് ചെയ്യാന്‍ വകുപ്പ് മന്ത്രി ആന്റണി രാജു ഉത്തരവിട്ടു.

ഇത് കൂടാതെ ഹരിപ്പാട്, തൊടുപുഴ, കണ്ണൂര്‍, ചെങ്ങന്നൂര്‍, മൂവാറ്റുപുഴ എന്നീ ഡിപ്പോകളുടെ നിര്‍മ്മാണം സംബന്ധിച്ചും ഗുരുതരമായ ക്രമക്കേടുകള്‍ ഉദ്യോഗസ്ഥയുടെ ഭാഗത്ത് നിന്നുണ്ടായതായും കണ്ടെത്തി. കരാറുകാരെ വഴിവിട്ട് സഹായിച്ചു എന്നും കണ്ടെത്തിയിട്ടുണ്ട്. ചീഫ് എഞ്ചിനീയറെ സസ്‌പെന്റ് ചെയ്ത് വിജിലന്‍സ് അന്വേഷണം നടത്തണമെന്ന റിപ്പോര്‍ട്ടിലെ ആവശ്യമാണ് ഇപ്പോള്‍ ഗതാഗത മന്ത്രി നടപ്പിലാക്കിയത്. ഇന്ദു നടത്തിയ എട്ടോളം അഴിമതികള്‍ കണ്ടെത്തിയിരുന്നു.