തലസ്ഥാന നഗരസഭയുടെ ശ്രീകാര്യം സോണല്‍ ഓഫീസിലെ നികുതി വെട്ടിപ്പിലൂടെയുള്ള 5.13 ലക്ഷത്തിന്റെ പണാപഹരണ കേസില്‍ ഒന്നാം പ്രതിയായ ഓഫീസ് അറ്റന്ററെ 21 ന് (ഇന്ന്) ഹാജരാക്കാന്‍ കോടതി പ്രൊഡക്ഷന്‍ വാറണ്ട് ഉത്തരവിട്ടു.

പ്രതിയെ ഹാജരാക്കാന്‍ തിരുവനന്തപുരം ജില്ലാ ജയില്‍ സൂപ്രണ്ടിനോടാണ് കോടതി പ്രൊഡക്ഷന്‍ ഉത്തരവിട്ടത്. പ്രതിയെ കസ്റ്റഡിയില്‍ വേണമെന്ന് ആവശ്യപ്പെട്ട് ശ്രീകാര്യം പോലീസ് സമര്‍പ്പിച്ച അപേക്ഷയിലണ് തിരുവനന്തപുരം ഒന്നാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് പി.എസ്. സുമി ഉത്തരവിട്ടത്.

പ്രതിയുടെ ജാമ്യഹര്‍ജിയില്‍ 20 ന് സര്‍ക്കാര്‍ നിലപാടറിയിക്കാനും ശ്രീകാര്യം പോലീസ് റിപ്പോര്‍ട്ട് ഹാജരാക്കാനും 18 ന് കോടതി ഉത്തരവിട്ടിരുന്നു.

എന്നാല്‍ പ്രതിയെ കസ്റ്റഡിയില്‍ വച്ച് ചോദ്യം ചെയ്ത് കൂട്ടു പ്രതികളെ കണ്ടെത്തുന്നതിനും തിരിച്ചറിഞ്ഞ് അറസ്റ്റ് ചെയ്യുന്നതിനും അപഹരിച്ച മുഴുവന്‍ തുകയും വീണ്ടെടുക്കുന്നതിനും , വ്യാജ രേഖകളുടെ ഉറവിടം , നിര്‍മ്മാതാക്കള്‍ , വിതരണക്കാര്‍ എന്നിവരെ തിരിച്ചറിഞ്ഞ് അറസ്റ്റു ചെയ്യുന്നതിനും പ്രതി ഒളിവില്‍ കഴിഞ്ഞ സ്ഥലങ്ങളില്‍ കൊണ്ടുപോയി തെളിവു ശേഖരണത്തിനും മറ്റുമായി പ്രതിയെ പോലീസ് കസ്റ്റഡിയില്‍ വിട്ടുകിട്ടാന്‍ അനുമതി തേടി പോലീസ് അപേക്ഷ സമര്‍പ്പിക്കുകയായിരുന്നു.

കേസില്‍ ഒക്ടോബര്‍ 13 മുതല്‍ റിമാന്റില്‍ കഴിയുന്ന ഒന്നാം പ്രതിയായ ഓഫീസ് അറ്റന്റര്‍ കല്ലറ മുതുവിള നാനാംകോട് അക്ഷര ഭവനില്‍ ബിജു (42) വിന്റെ ജാമ്യഹര്‍ജി പരിഗണിക്കവേയാണ് കോടതി സര്‍ക്കാര്‍ നിലപാട് അറിയിക്കാന്‍ ഉത്തരവിട്ടത്.


ബിജുവിനെ കൂടാതെ കാഷ്യര്‍ അനില്‍ കുമാര്‍ , ഓഫീസ് ഇന്‍ ചാര്‍ജ് ലളിതാംബിക തുടങ്ങിയവരാണ് മറ്റു പ്രതികള്‍. അപഹരിക്കപ്പെട്ട തുകയില്‍ കൃത്യം കണ്ടു പിടിക്കപ്പെട്ട ശേഷം 1.70 ലക്ഷം രൂപ ബിജു തിരിച്ചടച്ചു.