സ്വപ്‌ന പുറത്തേക്ക്..... നയതന്ത്ര ചാനല്‍ സ്വര്‍ണക്കടത്തിന് ഭീകരപ്രവര്‍ത്തനവുമായി ബന്ധമുണ്ടെന്നതിന് പ്രഥമദൃഷ്ട്യാ തെളിവില്ല.... സ്വപ്‌നയുടെ കോഫെപോസ കരുതല്‍ തടങ്കല്‍ കാലാവധി തീരാന്‍ ദിവസങ്ങള്‍ ബാക്കി നില്‍ക്കെ ഹൈക്കോടതി റദ്ദാക്കി.

എന്‍.ഐ.എ രജിസ്റ്റര്‍ ചെയ്ത കേസിലെ ഒന്നാം പ്രതി പി.എസ്.സരിത്ത്, രണ്ടാം പ്രതി സ്വപ്ന സുരേഷ് ഉള്‍പ്പെടെ എട്ടു പേര്‍ക്ക് ജാമ്യം അനുവദിച്ചു. അഞ്ചാം പ്രതി കെ.ടി.റമീസ്, ആറാം പ്രതി കെ.എം.ജലാല്‍, ഏഴാം പ്രതി പി.മുഹമ്മദ് ഷാഫി, പത്താം പ്രതി റബിന്‍സ് മുഹമ്മദ്, പതിനൊന്നാം പ്രതി കെ.ടി.ഷറഫുദ്ദീന്‍, പന്ത്രണ്ടാം പ്രതി മുഹമ്മദ് അലി എന്നിവരാണ് ജാമ്യം കിട്ടിയവര്‍.

2020 ജൂലായ് അഞ്ചിനാണ് തിരുവനന്തപുരത്തെ യു.എ.ഇ കോണ്‍സുലേറ്റിലേക്കുള്ള നയതന്ത്ര ബാഗില്‍ നിന്ന് 14.82 കോടി രൂപ വിലവരുന്ന 30.422 കിലോ സ്വര്‍ണം എയര്‍പോര്‍ട്ടില്‍ കസ്റ്റംസ് പിടിച്ചെടുത്തത്. കസ്റ്റംസിന് പുറമേ കള്ളപ്പണം വെളുപ്പിക്കല്‍ നിരോധന നിയമപ്രകാരം ഇ.ഡിയും ഭീകര പ്രവര്‍ത്തന നിരോധന നിയമപ്രകാരം എന്‍.ഐ.എയും കേസെടുത്തു.

എന്‍.ഐ.എയുടെ കേസില്‍ സ്വപ്നയും സരിത്തും ഉള്‍പ്പെടെ നല്‍കിയ ജാമ്യാപേക്ഷ എന്‍.ഐ.എ കോടതി തള്ളിയിരുന്നു. തുടര്‍ന്ന് ഹൈക്കോടതിയില്‍ സമര്‍പ്പിച്ച ജാമ്യാപേക്ഷ ജസ്റ്റിസ് കെ.വിനോദ് ചന്ദ്രന്‍, ജസ്റ്റിസ് സി.ജയചന്ദ്രന്‍ എന്നിവരുള്‍പ്പെട്ട ഡിവിഷന്‍ ബെഞ്ചാണ് പരിഗണിച്ചത്.നിലവിലുള്ള വസ്തുതകളും ആരോപിക്കപ്പെട്ട കുറ്റങ്ങളും കണക്കിലെടുത്താല്‍ പ്രതികള്‍ ഭീകര പ്രവര്‍ത്തനങ്ങളില്‍ ഏര്‍പ്പെട്ടതായി പറയാനാവില്ല.

സ്വര്‍ണക്കടത്തിലൂടെ സമ്പാദിച്ച തുക ഭീകര പ്രവര്‍ത്തനങ്ങള്‍ക്കു വിനിയോഗിച്ചെന്നോ ഭീകര സംഘടനകളുമായി പ്രതികള്‍ക്ക് ബന്ധുമുണ്ടെന്നോ കണ്ടെത്താന്‍ കഴിഞ്ഞിട്ടുമില്ലെന്നും ഹൈക്കോടതി . ഇതൊരു പ്രാഥമിക നിഗമനം മാത്രമാണെന്നും യു.എ.പി.എ കേസ് നിലനില്‍ക്കുമോയെന്നു തീരുമാനിക്കേണ്ടത് വിചാരണക്കോടതിയാണെന്നും ഉത്തരവില്‍ പറയുന്നു.

കസ്റ്റംസ്, ഇ.ഡി, എന്‍.ഐ.എ കേസുകളും കോഫെപോസ പ്രകാരമുള്ള കരുതല്‍ തടങ്കലുമാണ് സ്വപ്നയ്‌ക്കെതിരെ നിലവിലുണ്ടായിരുന്നത്. കസ്റ്റംസ്,ഇ.ഡി കേസില്‍ നേരത്തെ ജാമ്യം ലഭിച്ചിരുന്നു. കോഫെപോസ കരുതല്‍ തടങ്കല്‍ കാലാവധി തീരാന്‍ ദിവസങ്ങള്‍ ബാക്കി നില്‍ക്കെ ഹൈക്കോടതി റദ്ദാക്കി. എന്‍.ഐ.എ കേസിലും ജാമ്യം ലഭിച്ചതോടെ സ്വപ്നയ്ക്ക് ജയിലില്‍ നിന്നിറങ്ങാം.