ജോജുവിനെ കോണ്ഗ്രസിലെടുത്തു... മദ്യപിച്ചു, കയറിപ്പിടിച്ചു, മാസ്കില്ല, വിദേശ വാഹനങ്ങള്, ഫാന്സി നമ്പരുകള്, പൂത്ത പണം എന്നിങ്ങനെ ജോജു ജോര്ജിനെ കുടുക്കാന് കോണ്ഗ്രസുകാര് പഠിച്ച പണി പതിനെട്ടും നോക്കിയിട്ടും രക്ഷയില്ല; അവസാനം വീട്ടുപടിക്കല് ഒത്തുതീര്പ്പിലേക്ക്
ഇന്ധനവില വര്ധനയ്ക്കെതിരെ കോണ്ഗ്രസ് നടത്തിയ റോഡ് ഉപരോധത്തിനിടെ തര്ക്കിക്കാന് വന്ന നടന് ജോജു ജോര്ജിന് രണ്ട് കൊടുക്കാന് കോണ്ഗ്രസ് പഠിച്ച പണി പതിനെട്ടും നോക്കിയിട്ടും നടന്നില്ല. മദ്യപിച്ചു എന്ന് പറഞ്ഞ് പരത്തിയെങ്കിലും തെളിയിക്കാനായില്ല. അവസാനം ജോജു മദ്യപിച്ചതുപോലെ അഭിനയിച്ച് തങ്ങളെ പറ്റിക്കുകയായിരുന്നു എന്നാണ് കോണ്ഗ്രസുകാരുടെ സംസാരം.
ചേച്ചിമാരെ കയറിപ്പിടിച്ചു എന്ന് ചാനലിലൂടെ പറയിക്കാന് നോക്കിയെങ്കിലും അതെല്ലാം ജനം ലൈവായി കാണുകയും ചെയ്തു. മാത്രമല്ല പരസ്യമായി നടന്ന സംഭവം രഹസ്യമായി ഒരു ക്യാമറയിലും പതിഞ്ഞില്ല.
പിന്നെ ആകെ ചുമത്താവുന്നത് പെറ്റീകേസായ മാസ്ക് വച്ചില്ല മാത്രം. അഞ്ഞൂറോ ആയിരമോ പെറ്റിയടിച്ചാല് തീരാവുന്നതാ. എന്നാല് കോണ്ഗ്രസുകാരെ സംബന്ധിച്ച് അങ്ങനെയല്ല കൊച്ചിയിലെ നേതാക്കള് കൂട്ടമായി അകത്തു പോകും. മാത്രമല്ല വണ്ടി തല്ലിപ്പൊട്ടിച്ച കേസില് 6 ലക്ഷം രൂപ വച്ചാലേ ജാമ്യം കിട്ടൂ. അങ്ങനെയാണ് ജോജുവുമായി ബന്ധപ്പെട്ടുണ്ടായ പ്രശ്നം ഒത്തുതീര്പ്പിലേക്കെന്ന് കോണ്ഗ്രസ് നീങ്ങിയത്.
ജോജുവിന്റെ സുഹൃത്തുക്കളുമായി സംസാരിച്ചെന്നും ഒത്തുതീര്പ്പിന് മുന്കയ്യെടുക്കുകയും ചെയ്തു. കേസുകള് പിന്വലിക്കുന്നത് പരസ്പരം ചര്ച്ച ചെയ്ത് തീരുമാനിക്കും.
ജോജുവിന്റെ വാഹനം ആക്രമിച്ചതിനു കൊച്ചി മുന് മേയര് ടോണി ചമ്മണി ഉള്പ്പെടെ 15 പേര്ക്കെതിരെ ജാമ്യമില്ലാ കുറ്റങ്ങള് ചുമത്തി പൊലീസ് കേസെടുത്തിരുന്നു. വാഹനം തടഞ്ഞു നിര്ത്തി ഡോര് ബലമായി തുറന്ന് ജോജുവിന്റെ ഷര്ട്ടിനു കുത്തിപ്പിടിച്ചു ഭീഷണിപ്പെടുത്തുകയും കാറിന്റെ ചില്ല് തകര്ക്കുകയും ചെയ്തെന്നാണു കേസ്. ജോജുവിന്റെ കാറിന്റെ ചില്ല് തല്ലിപ്പൊട്ടിച്ച സംഭവത്തില് കോണ്ഗ്രസ് പ്രവര്ത്തകനായ തൈക്കൂടം സ്വദേശി പി.ജി.ജോസഫിനെ നേരത്തെ അറസ്റ്റ് ചെയ്തിരുന്നു.
ഉപരോധ സമരവുമായി ബന്ധപ്പെട്ട് കോണ്ഗ്രസ് നേതാക്കളായ കൊടിക്കുന്നില് സുരേഷ്, ഡിസിസി പ്രസിഡന്റ് മുഹമ്മദ് ഷിയാസ്, വി.ജെ. പൗലോസ് തുടങ്ങിയ 15 നേതാക്കള്ക്കും 50 പ്രവര്ത്തകര്ക്കുമെതിരെയും കേസെടുത്തിരുന്നു. ജോജു ജോര്ജിനെതിരെ കോണ്ഗ്രസ് വനിതാ നേതാവ് നല്കിയ പരാതിയില് പൊലീസ് കേസ് റജിസ്റ്റര് ചെയ്തിരുന്നില്ല. അങ്ങനെ എന്തുവന്നാലും നഷ്ടം കോണ്ഗ്രസിനാണ്.
അതേസമയം നടന് ജോജുവിനെതിരായ ആക്രമണത്തില് താരസംഘടനയായ അമ്മ മൗനം പാലിച്ചതിനെതിരെ കെ.ബി. ഗണേഷ് കുമാര് എംഎല്എ. രംഗത്തെത്തി. വിഷയത്തില് അമ്മ സെക്രട്ടറി മറുപടി പറയണം. സംഘടനയുടെ അടുത്ത യോഗത്തില് പ്രതിഷേധം അറിയിക്കുമെന്നും ഗണേഷ് കുമാര് പറഞ്ഞു.
പ്രതിപക്ഷ നേതാവ് വി.ഡി. സതീശനും കോണ്ഗ്രസ് നേതാവ് കെ.സി. വേണുഗോപാലും അപലപിച്ചപ്പോള് അമ്മ ജനറല് സെക്രട്ടറി മൗനം പാലിച്ചു. ആരെ പേടിച്ചാണ് സെക്രട്ടറി ഒളിച്ചിരിക്കുന്നത്. അഭിപ്രായം തുറന്നു പറയണം. അമ്മയുടെ സമീപനം മാറ്റണം. ജനറല് സെക്രട്ടറി ഇടവേള ബാബു മറുപടി പറയണമെന്നും ഗണേഷ് ആവശ്യപ്പെട്ടു.
എന്തായാലും കാര്യങ്ങള് ഇങ്ങനെ പുരോഗമിക്കുമ്പോള് ജോജുവുമായ കേസ് ഒരുക്കുന്നതാണ് കോണ്ഗ്രസ് നേതാക്കളുടെ തടി കേടാകാതിരിക്കാന് നല്ലത്. പെട്രോളിനും ഡീസലിനും വില കുറച്ചത് തങ്ങള് കാരണമാണെന്ന് ജനത്തെ ഒരു വിധം വിശ്വസിപ്പിച്ചിട്ടുണ്ട്. അതൊന്നും ചര്ച്ചയാക്കാതിരിക്കാന് വേണ്ടത് ജോജുമായുള്ള കേസ് കോപ്രമൈസാണ്. അത് നടക്കുമെന്നാണ് കരുതുന്നത്. എങ്കില് ജോജുവിനെ കോണ്ഗ്രസിലെടുക്കാനും തയ്യാറാണ്.
https://www.facebook.com/Malayalivartha
