ജോജു ജോര്‍ജിന്റെ പരാതിയില്‍ കോമ്പ്രമൈസ് ചെയ്യാമെന്നുള്ള കോണ്‍ഗ്രസിന്റെ മോഹം നടക്കാന്‍ സാധ്യത കുറവാണ്. സംസ്ഥാന സര്‍ക്കാരിനെതിരെ പെട്രോള്‍ വിഷയത്തില്‍ സമരം തുടങ്ങാനിരിക്കുന്ന കോണ്‍ഗ്രസുകാര്‍ക്കെതിരെ ഒരു വിട്ടുവീഴ്ചയും ഉണ്ടാകാന്‍ സാധ്യതയില്ല. അതിനാല്‍ തന്നെ പ്രതികളെ എല്ലാവരും പൊക്കാനാണ് തീരുമാനം. ജോജു ജോര്‍ജ് നേരിട്ട് ഇടപെട്ടാല്‍ മാത്രമേ കാര്യമുള്ളൂ. എന്നാല്‍ ജോജുവിനെ നേരിട്ട് കിട്ടുന്നുമില്ല.

കഴിഞ്ഞ ദിവസം അറസ്റ്റിലായിരുന്ന കോണ്‍ഗ്രസ് പ്രവര്‍ത്തകനായ വൈറ്റില സ്വദേശി പി.ജി. ജോസഫ് റിമാന്‍ഡിലാണ്. ഇതുപോലെയായിരിക്കും മറ്റു നേതാക്കളുടേയും അവസ്ഥ. കാര്‍ തകര്‍ത്ത കേസില്‍ മുന്‍ മേയര്‍ ടോണി ചമ്മണിയും കെ.പി.സി.സി വൈസ് പ്രസിഡന്റ് വി.പി സജീന്ദ്രനും അടക്കം എട്ടു പ്രതികളുണ്ട്.

പോലീസ് കേസെടുത്തതിനു പിന്നാലെ പ്രതികള്‍ മൊബൈല്‍ ഫോണ്‍ ഓഫാക്കി. എറണാകുളം അസി. കമ്മീഷണര്‍ നിസാമുദ്ദീന്റെ നേതൃത്വത്തില്‍ പ്രത്യേകസംഘമാണ് കേസ് അന്വേഷിക്കുന്നത്.

പോലീസ് ഇവരുടെ വീടുകളിലെത്തിയിരുന്നു. മൊബൈല്‍ സ്വിച്ച് ഓഫായതിനാല്‍ ടവര്‍ ലൊക്കേഷന്‍ കണ്ടെത്താനായിട്ടില്ല. മുന്‍കൂര്‍ ജാമ്യത്തിന് കോടതിയെ സമീപിക്കാനുള്ള നീക്കത്തിലാണ് പ്രതികള്‍. ഇരുവരും പ്രവര്‍ത്തകരെയും കൂട്ടി ജോജുവിനോട് തട്ടിക്കയറുന്നതും കാറില്‍ അടിക്കുന്നതും ദൃശ്യങ്ങളിലുണ്ട്. ടോണി ചമ്മണിയാണ് ഒന്നാംപ്രതി.

അറസ്റ്റിലായ ജോസഫ് കുറ്റസമ്മതം നടത്തിയതും ഇവര്‍ക്ക് വിനയായി. ചില്ല് തകര്‍ത്തപ്പോള്‍ ജോസഫിന്റെ വലതുകൈയ്ക്ക് ആഴത്തില്‍ മുറിവേറ്റു. രക്തം വാഹനത്തില്‍ വീണിട്ടുണ്ട്. രക്തസാമ്പിള്‍ പരിശോധനയ്ക്ക് നല്‍കി. സ്വകാര്യസ്വത്തിന് നാശനഷ്ടമുണ്ടാക്കുന്നതിന് എതിരായ നിയമത്തിലെ വകുപ്പുകളാണ് പ്രതികള്‍ക്കെതിരേ ചുമത്തിയത്. കാറിന് ആറു ലക്ഷം രൂപയുടെ നഷ്ടമുണ്ടായി.

തിങ്കളാഴ്ച എറണാകുളത്ത് ഇടപ്പള്ളി മുതല്‍ വൈറ്റില വരെ റോഡ് ഉപരോധിച്ചുള്ള കോണ്‍ഗ്രസിന്റെ സമരത്തില്‍ വന്‍ ഗതാഗതക്കുരുക്കുണ്ടായിരുന്നു. ഇതില്‍ പ്രതിഷേധിച്ചാണ് നടന്‍ ജോജു സമരത്തെ ചോദ്യം ചെയ്തത്. ജോജുവിന്റെ ഇടപെടലില്‍ പ്രകോപിതരായ കോണ്‍ഗ്രസ് പ്രവര്‍ത്തകര്‍ നടന്റെ വാഹനം അടിച്ച് തകര്‍ത്തിരുന്നു. മദ്യപിച്ച് വനിതാ പ്രവര്‍ത്തകരെ അപമാനിക്കാന്‍ ശ്രമിക്കുകയും അസഭ്യം പറയുകയും ചെയ്തുവെന്ന് കാണിച്ച് ജോജുവിനെതിരെ പരാതി നല്‍കുകയും ചെയ്തിരുന്നു. എന്നാല്‍ ഈ പരാതിയില്‍ കഴമ്പില്ലെന്ന് പോലീസ് കണ്ടെത്തി.

അതേസമയം ഇന്ധന വില വര്‍ധനവിനെതിരേ കോണ്‍ഗ്രസ് സംഘടിപ്പിച്ച സമരത്തിനിടയില്‍ നടന്‍ ജോജു ജോര്‍ജുമായുണ്ടായ പ്രശ്‌നം പരിഹരിക്കാന്‍ തന്നെയാണ് കോണ്‍ഗ്രസ് ശ്രമം. ജോജുവിന്റെ സുഹൃത്തുക്കള്‍ കോണ്‍ഗ്രസ് നേതാക്കളുമായി സംസാരിച്ചെന്നും പ്രശ്‌നങ്ങള്‍ പരസ്പരം സംസാരിച്ച് തീര്‍ക്കാന്‍ തീരുമാനിച്ചുവെന്നും ഡി.സി.സി. അധ്യക്ഷന്‍ മുഹമ്മദ് ഷിയാസാണ് അറിയിച്ചത്. പെട്ടെന്ന് ഇരുകൂട്ടരുടെയും ഭാഗത്ത് നിന്നുമുണ്ടായ പ്രകോപനമാണ് വാക്കേറ്റത്തിലേക്കും പ്രശ്‌നങ്ങളിലേക്കും നയിച്ചതെന്ന് മുഹമ്മദ് ഷിയാസ് പറഞ്ഞു.

ജോജുവിന്റെ പരാതിയില്‍ കൊച്ചി മുന്‍ മേയര്‍ ടോണി ചമ്മിണി ഉള്‍പ്പെടെയുള്ള 15 കോണ്‍ഗ്രസ് നേതാക്കള്‍ക്കെതിരേയും 50 പ്രവര്‍ത്തകര്‍ക്കെതിരേയും പോലീസ് കേസെടുത്തിരുന്നു. ഇരു ഭാഗത്ത് നിന്നും പ്രകോപനമുണ്ടായെന്നും തെറ്റായ കാര്യങ്ങള്‍ സംഭവിച്ചുവെന്നും കോണ്‍ഗ്രസ് നേതൃത്വം സമ്മതിക്കുന്നു. മനുഷ്യസഹജമായ പ്രശ്‌നങ്ങളാണ് ഉണ്ടായതെന്നും ഇതില്‍ പരിഹരിക്കപ്പെടാന്‍ കഴിയാത്ത കാര്യങ്ങള്‍ ഒന്നും തന്നെയില്ലെന്നും ഡി.സി.സി. അധ്യക്ഷന്‍ പറയുന്നു. ജോജുവുമായി ചര്‍ച്ച നടത്തി പ്രശ്‌നങ്ങള്‍ ഒത്തുതീര്‍പ്പിലേക്ക് എത്തിക്കുമെന്നും അദ്ദേഹം പറഞ്ഞു. ജയിലില്‍ കിടക്കാതിരിക്കാന്‍ ഇനി ജോജു ജോര്‍ജ് നേരിട്ട് കനിയണം. പക്ഷെ ജോജു ഇപ്പോഴും കോമ്പ്രമൈസിന് തയ്യാറായിട്ടില്ല. ജോജു തയ്യാറായാലും പോലീസ് തയ്യാറാകുമോ എന്ന് കണ്ടറിയണം.