പ്രതിപക്ഷം നേരത്തെ അഴിമതി പിടികൂടിയതിനെത്തുടർന്ന് നിർത്തി വച്ച ഈ-മൊബിലിറ്റി പദ്ധതി പിൻവാതിലുടെ നടപ്പിലാക്കാനുള്ള സർക്കാർ നീക്കത്തിനെതിരെ മുഖ്യമന്ത്രിക്ക് കത്ത് നൽകിയെന്ന് രമേശ് ചെന്നിത്തല പറഞ്ഞു.അദ്ദേഹത്തിന്റെ വാക്കുകൾ ഇങ്ങനെ; പ്രതിപക്ഷം നേരത്തെ അഴിമതി പിടികൂടിയതിനെത്തുടർന്ന് നിർത്തി വച്ച ഈ-മൊബിലിറ്റി പദ്ധതി പിൻവാതിലുടെ നടപ്പിലാക്കാനുള്ള സർക്കാർ നീക്കത്തിനെതിരെ മുഖ്യമന്ത്രിക്ക് കത്ത് നൽകി.

പദ്ധതിയുടെ കൺസൾട്ടന്റായ കരിമ്പട്ടികയിൽ പെട്ട വിവാദ കമ്പനി പ്രൈസ് വാട്ടർ കൂപ്പറുമായി കഴിഞ്ഞ ദിവസം മുഖ്യമന്ത്രിയുടെ സാന്നിദ്ധ്യത്തിൽ നടന്ന ചർച്ച ദുരൂഹത വർദ്ധിപ്പിക്കുന്നു. അഴിമതി നടത്തുന്നതിനാണ് ഈ പദ്ധതി വീണ്ടും പൊടി തട്ടിയെടുത്തിരിക്കുന്നത്. ചട്ടങ്ങളും മാനദണ്ഡങ്ങളുമെല്ലാം കാറ്റിൽ പറത്തിയുള്ള നീക്കമാണ് നടത്തുന്നത്. ഹെസ്സ് എന്ന വിദേശ കമ്പനിയെ വഴിവിട്ട് സഹായിക്കാനും കമ്മീഷനടിക്കുന്നതിനുമുള്ള പദ്ധതിയാണിത്.

പ്രതിപക്ഷം അഴിമതി കണ്ടു പിടിച്ചതിനെത്തുടർന്ന് ഉപേക്ഷിച്ചു എന്ന ആശ്വസത്തിൽ പൊതുജനം ഇരിക്കുമ്പോഴാണ് ആ പദ്ധതി വീണ്ടും പൊടി തട്ടി എടുക്കുന്നത്. കഴിഞ്ഞ ദിവസം മുഖ്യമന്ത്രിയുടെ സാന്നിദ്ധ്യത്തിൽ നടന്ന് ചർച്ചയുടെ മിനിട്‌സ പുറത്ത് വിടണമെന്ന് ആവശ്യപ്പെട്ടു. പദ്ധതിക്കെതിരെ ഒൻപത് ചോദ്യങ്ങൾ ഉന്നയിച്ച് മുഖ്യമന്ത്രിക്ക് കത്ത് നൽകി

ഏത് നടപടിക്രമങ്ങൾ അനുവർത്തിച്ചാണ് HESS എന്ന കമ്പനിയെ ഇ-ബസ് നിർമ്മാണത്തിനായി സർക്കാർ തെരഞ്ഞെടുത്തത്? ആരാണ് പ്രൈസ് വാട്ടർ ഹൗസ് കൂപ്പേഴ്സ് എന്ന കമ്പനിയെ ഇതിനായി കൺസൾട്ടാന്റായി തെരെഞ്ഞെടുത്ത്. എന്ത് മാനദണ്ഡത്തിന്റെ അടിസ്ഥാനത്തിലാണ് ഇവരെ ഇതിനായി തെരഞ്ഞെടുത്തത്? ഹെസ് എന്ന കമ്പനിയെ മാത്രം മുൻനിറുത്തി ഇങ്ങനെ ഒരു ജോയിന്റ് വെഞ്ച്വർ നിർമ്മിക്കുന്നതിനും ധാരണാപത്രത്തിൽ ഏർപ്പെടുന്നതിനും സർക്കാർ തീരുമാനമെടുത്തത് ഏത് മാനദണ്ഡത്തിന്റേയും ചട്ടങ്ങളുടേയും അടിസ്ഥാനത്തിലാണ്.

ആരാണ് ഇതിന് മുൻകൈ എടുത്തത്? ഈ പദ്ധതിയുടെ ഭാഗമായി നിർമ്മിക്കപ്പെടുന്ന 3000 ബസുകളുടെ വില എന്ത് അടിസ്ഥാനത്തിലാണ് തീരുമാനിച്ചിട്ടുള്ളത്? ജോയിന്റ് വെൻച്ച്വറിൽ സ്വകാര്യ കമ്പനിയായ ഹെസ്സിന് 51 ശതമാനം ഓഹരിയും സർക്കാരിന് 49 ശതമാനം ഓഹരിയും എന്ന അനുപാതം എപ്രകാരമാണ് / ഏത് അടിസ്ഥാനത്തിലാണ് നിശ്ചയിച്ചത്?
6000 കോടി രൂപ മുതൽമുടക്ക് കണക്കാക്കുന്ന ഈ പദ്ധതിക്ക് എന്തുകൊണ്ടാണ് ആഗോള ടെണ്ടർ ക്ഷണിക്കാതിരുന്നത്?

ചീഫ് സെക്രട്ടറിയുടെ ധനകാര്യവകുപ്പും ഉന്നയിച്ച തടസ്സവാദങ്ങളെ മറികടന്ന് പ്രൈസ് വാട്ടർ ഹൗസ് കൂപ്പേഴ്സിനെ വിശദമായ പദ്ധതി രേഖ തയ്യാറാക്കാൻ ചുമതലപ്പെടുത്തിയത് എന്ത് കാരണത്തിന്റെ അടിസ്ഥാനത്തിലാണ്? ഡീറ്റയിൽഡ് പ്രോജക്ട് റിപ്പോർട്ട് തയ്യാറാക്കുന്നതുമായി ബന്ധപ്പെട്ട് പ്രൈസ് വാട്ടർ ഹൗസ് കൂപ്പേഴ്സുമായുളള ചീഫ് സെക്രട്ടറിതല മീറ്റിംഗിൽ ഹെസ് കമ്പനിയുടെ പ്രതിനിധികൾ പങ്കെടുത്തത് ഈ ക്രമക്കേടുകളുടെ ഏറ്റവും വലിയ തെളിവല്ലേ?

കരാർകമ്പനിയെ മുൻകൂട്ടി നിശ്ചയിച്ച് പദ്ധതിയുടെ പ്രായോഗിക പഠനത്തിനായി പ്രൈസ് വാട്ടർ ഹൗസ് കൂപ്പേഴ്സിനെ നിയോഗിച്ചത് നിലവിലുള്ള ഏത് ചട്ടങ്ങളുടേയും, മാനദണ്ഡങ്ങളുടേയും അടിസ്ഥാനത്തിലാണോ? ഈ ചോദ്യങ്ങൾക്ക് മുഖ്യമന്ത്രിയുടെ കൃത്യവും, വ്യക്തവുമായ ഉത്തരം പൊതുസമൂഹം പ്രതീക്ഷിക്കുന്നുണ്ട്.