ഖാദര് കമ്മിറ്റി റിപ്പോര്ട്ട് ഘട്ടം ഘട്ടമായി നടപ്പാക്കും; പൊതു വിദ്യാഭ്യാസ ഡയറക്ടറുടെ കീഴിലുള്ള സംസ്ഥാന തലം മുതല് സ്കൂള് തലം വരെയുള്ള ഓഫീസുകളുടെ ഏകോപനം സാധ്യമാക്കുമെന്ന് മന്ത്രി വി ശിവന്കുട്ടി
ഖാദര് കമ്മിറ്റി റിപ്പോര്ട്ട് ഘട്ടം ഘട്ടമായി നടപ്പാക്കാനുള്ള നടപടി ഊര്ജിതമാക്കുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവന്കുട്ടി. പൊതു വിദ്യാഭ്യാസ ഡയറക്ടറുടെ കീഴിലുള്ള സംസ്ഥാന തലം മുതല് സ്കൂള് തലം വരെയുള്ള ഓഫീസുകളുടെ ഏകോപനം സാധ്യമാക്കുമെന്നും മന്ത്രി വ്യക്തമാക്കി.
തിരുവനന്തപുരത്ത് എസ് സി ഇ ആര് ടിയുടെ എഡുക്കേഷണല് ടെക്നോളജി ലാബിന്റെ ഉദ്ഘാടനം നിര്വഹിച്ചു സംസാരിക്കുകയായിരുന്നു മന്ത്രി. ഡിജിറ്റല് വിദ്യാഭ്യാസത്തിന് പ്രാധാന്യം വര്ദ്ധിച്ചു വരുന്ന ഈ സമയത്ത് ഡിജിറ്റല് ക്ലാസ്സുകളുടെ റെക്കോര്ഡിങ്, ഡിജിറ്റല് വിഭവങ്ങള് തയാറാക്കല്, ഓഡിയോ വീഡിയോ റെക്കോര്ഡിങ്, വീഡിയോ കോണ്ഫറന്സിംഗ് തുടങ്ങി വിവിധങ്ങളായ പരിപാടികളാണ് എസ്.സി.ഇ.ആര്.ടി യില് സജ്ജീകരിച്ചിരിക്കുന്ന എഡ്യൂക്കേഷണല് ടെക്നോളജി ലാബിലൂടെ ലക്ഷ്യമിടുന്നത്. നവസാങ്കേതിക വിദ്യയുടെ സാധ്യതകള് പരമാവധി പ്രയോജനപ്പെടുത്തിക്കൊണ്ട് പഠന ബോധന പ്രക്രിയ ഫലപ്രദമാക്കുക എന്നതാണ് ലാബിന്റെ ഉദ്ദേശം.
ഡിജിറ്റല് വിഭവങ്ങള് കുട്ടികളില് താല്പര്യം ജനിപ്പിക്കുന്നതും ജീവിതനൈപുണി വികാസത്തിന് സഹായകവുമാണ്. വൈവിധ്യം, ദൃശ്യതനിമ, ആശയപ്രകടനസാധ്യത എന്നിവ സമന്വയിപ്പിച്ച് തയ്യാറാക്കപ്പെട്ട ഡിജിറ്റല് വിഭവങ്ങള് ജീവിത നൈപുണികള് ആര്ജ്ജിച്ച പുത്തന്തലമുറയെ വാര്ത്തെടുക്കാന് സഹായകരമാകും.
പൊതുവിദ്യാഭ്യാസ വകുപ്പ് ഡയറക്ടര് ജീവന്ബാബു കെ ഐ എ എസ്, എസ് സി ഇ ആര് ടി ഡയറക്ടര് ഡോ.ജെ. പ്രസാദ്, കൈറ്റ് സി ഇ ഒ അന്വര് സാദത്,എസ് ഐ ഇ എം എ ടി ഡയറക്ടര് ഡോ. എം എ ലാല്, സ്കോള് കേരള വൈസ് ചെയര്മാന് ഡോ. പി പ്രമോദ് തുടങ്ങിയവര് പങ്കെടുത്തു.
https://www.facebook.com/Malayalivartha
