കേരളത്തെ ഒന്നടങ്കം കണ്ണീരിലാഴ്ത്തികൊണ്ട് ഉരുള്‍പൊട്ടലും വെള്ളപ്പൊക്കവും നാശനഷ്ടം വിതച്ച കൂട്ടിക്കല്‍ പഞ്ചായത്തിലെ ഇളങ്കാട്ടില്‍ വീണ്ടും ഉരുള്‍പൊട്ടല്‍. കനത്ത മഴയെ തുടര്‍ന്ന് മൂപ്പന്‍ മല, മ്ലാക്കര മേഖലകളിലാണ് ഉരുള്‍ പൊട്ടിയത്. ഇതോടെ പുല്ലകയാറില്‍ ജലനിരപ്പ് ഉയര്‍ന്നിട്ടുണ്ട്. ആളപായമോ നാശനഷ്ടങ്ങളോ ഇല്ലെന്നാണ് പ്രാഥമിക വിവരം. പുല്ലകയാറിലെ ജലനിരപ്പ് ഉയരുന്നതിനാല്‍ തീരത്തുള്ളവര്‍ ജാഗ്രത പാലിക്കണമെന്ന് നിര്‍ദേശമുണ്ട്. മലവെള്ളപ്പാച്ചിലില്‍ മണിമലയാറ്റിലും വെള്ളം ഉയരാന്‍ സാധ്യതയുള്ളതിനാല്‍ ഈ പ്രദേശങ്ങളിലും നാട്ടുകാര്‍ ജാഗ്രതയിലാണ്. ഒക്‌ടോബര്‍ 16ന് ഉരുള്‍പൊട്ടലും വെള്ളപ്പൊക്കവും കാരണം ഇളങ്കാട്, ഏന്തയാര്‍, കൂട്ടിക്കല്‍, കൊക്കയാര്‍, മുണ്ടക്കയം, കാഞ്ഞിരപ്പള്ളി, മണിമല ഭാഗങ്ങളില്‍ കനത്ത നാശനഷ്ടമാണുണ്ടായത്.