ദേശീയ പാതയിലെ വഴി തടയല്‍ സമരത്തെ എതിര്‍ത്ത നടന്‍ ജോജുവിന്റെ വാഹനം തകര്‍ത്ത കേസില്‍ പ്രതി പി ജി ജോസഫിന്റെ ജാമ്യാപേക്ഷ കോടതി തള്ളി. എറണാകുളം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയാണ് ജാമ്യാപേക്ഷ തള്ളിയത്.കോണ്‍ഗ്രസ് പ്രവര്‍ത്തകന്റേത് പെട്ടന്നുള്ള പ്രകോപനമായി കാണാന്‍ കഴിയില്ലെന്നും പ്രതിഷേധിക്കുന്നവരെ ആക്രമിക്കുന്ന രാഷ്ട്രീയ ശൈലി അംഗീകരിക്കാനാവില്ലെന്നും കോടതി വ്യക്തമാക്കി. രാഷ്ട്രീയ ഹുങ്കിന്റെ പിന്‍ബലത്തിലാണ് സിനിമാ നടന്‍ ആക്രമിക്കപ്പെട്ടതെന്നും രാഷ്ട്രീയ ബലം ഉപയോഗിക്കേണ്ടത് പൊതുജന നന്‍മയ്ക്ക് വേണ്ടിയാണ്, അക്രമത്തിനു വേണ്ടിയല്ലെന്നും കോടതി അറിയിച്ചു. അന്വേഷണം പ്രാഥമിക ഘട്ടത്തിലാണ്. കൂടുതല്‍ പ്രതികള്‍ പിടിയിലാവാനുണ്ട്. ഈ ഘട്ടത്തില്‍ ജാമ്യം നല്‍കാനാവില്ലെന്നും കോടതി പറഞ്ഞു. ജോജുവിന്റെ കാര്‍ തകര്‍ത്തത് രണ്ടാം പ്രതി ജോസഫാണെന്ന് വ്യക്തമാണ്. ഇയാളുടെ കൈയ്ക്ക് പരിക്കുണ്ട്. അക്രമത്തിനുപയോഗിച്ച വസ്തുക്കള്‍ കണ്ടെത്തേണ്ടതുണ്ട്. കൂടുതല്‍ പേര്‍ അറസ്റ്റിലാവാനുമുണ്ട്. അതിനാല്‍ തന്നെ പൊലീസ് കസ്റ്റഡിയില്‍ വാങ്ങിയിട്ടില്ല എന്ന കാരണം പറഞ്ഞ് പ്രതിയ്ക്ക് ജാമ്യം നല്‍കാനാവില്ലെന്നും കോടതി വ്യക്തമാക്കി.