കോട്ടയം കൂട്ടിക്കല്‍ പഞ്ചായത്തില്‍ വീണ്ടും ഉരുള്‍പൊട്ടലും ശക്തമായ വെള്ളപാച്ചിലും. ഏതാനും ദിവസങ്ങൾക്ക് മുൻപും ഇവിടെ മലവെള്ളപാച്ചിലുണ്ടായിരുന്നു. കൂട്ടിക്കല്‍ ഇളംകാട് മ്ലാക്കരയിലാണ് ഇന്ന് വൈകുന്നേരം ശക്തമായ മഴയെ തുടര്‍ന്ന് ഉരുൾപൊട്ടൽ സംഭവിച്ചത്. മൂന്നിടത്ത് ഉരുള്‍പൊട്ടിയതായാണ് അറിഞ്ഞതെന്ന് പഞ്ചായത്ത് പ്രസിഡന്റ് വ്യക്തമാക്കി.

വെള്ളപ്പാച്ചിലിൽ ഇവിടത്തെ 20 ഓളം കുടുംബങ്ങളായിരിന്നു പെട്ടുപോയത്. ഇവരെ രക്ഷപ്പെടുത്താന്‍ ശ്രമം തുടങ്ങിയിരിക്കുന്നുണ്ട്. സ്ഥലത്ത് എന്‍ഡി‌ആര്‍എഫ് സംഘം എത്തിയിട്ടുണ്ട്. ഫയര്‍ഫോഴ്‌സിന്റെയും പൊലീസിന്റെയും പ്രാദേശിക ജനപ്രതിനിധികളുടെയും സംഘമെത്തി രക്ഷാപ്രവര്‍ത്തനം ആരംഭിച്ചിട്ടുണ്ട്.

പുല്ലുകയാ‌റ്റില്‍ ജലനിരപ്പ് ശക്തമായി ഉയരുകയാണ്. ഇതോടെ മ്ലാക്കര ചപ്പാത്ത് അപകടാവസ്ഥയിലായെന്ന് ജനപ്രതിനിധികള്‍ അറിയിച്ചു. ആള്‍പ്പാര്‍പ്പില്ലാത്ത സ്ഥലത്താണ് ഇത്തവണ ഉരുള്‍പൊട്ടലുണ്ടായത്. എന്നാല്‍ ശക്തമായ വെള‌ളപ്പാച്ചിലുണ്ടായതോടെയാണ് പ്രദേശവാസികള്‍ കുടുങ്ങിയത്. സ്ഥലത്തെ കൂടുതല്‍ കുടുംബങ്ങളെ അപകട സാദ്ധ്യതയെ തുടര്‍ന്ന് മാറ്റിപാർപ്പിക്കുകയായിരുന്നു.