ശബരിമല ദര്ശനത്തിന് പത്തു കേന്ദ്രങ്ങളില് ഇന്നു മുതല് സ്പോട്ട് ബുക്കിംഗ്... വെര്ച്ച്വല് ക്യൂവിലൂടെ മുന്കൂര് ബുക്ക് ചെയ്യാത്ത തീര്ത്ഥാടകര്ക്ക് ഈ സംവിധാനം പ്രയോജനപ്പെടുത്താം, ആധാര് കാര്ഡ്, വോട്ടേഴ്സ് ഐ.ഡി എന്നിവയ്ക്കു പുറമേ പാസ്പോര്ട്ടും തിരിച്ചറിയല് രേഖയായി ഉപയോഗിക്കാം
ശബരിമല ദര്ശനത്തിനായി പത്തു കേന്ദ്രങ്ങളില് ഇന്നു മുതല് സ്പോട്ട് ബുക്കിംഗ് തുടങ്ങുമെന്ന് സര്ക്കാരും തിരുവിതാംകൂര് ദേവസ്വം ബോര്ഡും ഹൈക്കോടതിയില്.
എരുമേലി, നിലയ്ക്കല്, കുമളി എന്നീ കേന്ദ്രങ്ങള്ക്ക് പുറമെ തിരുവനന്തപുരം ശ്രീകണ്ഠേശ്വരം മഹാദേവക്ഷേത്രം, ഏറ്റുമാനൂര് ശ്രീമഹാദേവ ക്ഷേത്രം, വൈക്കം ശ്രീമഹാദേവ ക്ഷേത്രം, കൊട്ടാരക്കര ശ്രീ മഹാഗണപതി ക്ഷേത്രം, പന്തളം വലിയകോയിക്കല് ക്ഷേത്രം പെരുമ്പാവൂര് ശ്രീധര്മ്മശാസ്താ ക്ഷേത്രം, കീഴില്ലം ശ്രീമഹാദേവ ക്ഷേത്രം എന്നിവിടങ്ങളിലാണ് സ്പോട്ട് ബുക്കിംഗ് സജ്ജമാക്കിയിരിക്കുന്നത്.
വെര്ച്ച്വല് ക്യൂവിലൂടെ മുന്കൂര് ബുക്ക് ചെയ്യാത്ത തീര്ത്ഥാടകര്ക്ക് ഈ സംവിധാനം പ്രയോജനപ്പെടുത്താം.ആധാര് കാര്ഡ്, വോട്ടേഴ്സ് ഐ.ഡി എന്നിവയ്ക്കു പുറമേ പാസ്പോര്ട്ടും തിരിച്ചറിയല് രേഖയായി ഉപയോഗിക്കാവുന്നതാണ്.
രണ്ടു ഡോസ് വാക്സിനുമെടുത്തെന്ന സര്ട്ടിഫിക്കറ്റോ 72 മണിക്കൂറിനുള്ളിലെടുത്ത ആര്.ടി.പി.സി.ആര് നെഗറ്റീവ് സര്ട്ടിഫിക്കറ്റോ ഹാജരാക്കേണ്ടതാണ്. പമ്പ ഗണപതികോവിലിലെ നടപ്പന്തലിലെ കൗണ്ടറിലാണ് വെര്ച്വല്ക്യൂ വെരിഫിക്കേഷന്.
അതേസമയം മഴയ്ക്ക് ശമനമായതോടെ ശബരിമലയില് തീര്ത്ഥാടകരുടെ എണ്ണത്തില് വര്ദ്ധനവുണ്ടായി. വൃശ്ചികം ഒന്നിന് 6137 പേരാണ് വെര്ച്വല്ക്യൂവഴി ദര്ശനം നടത്തിയത്. ഇന്നലെ 13,158 പേരാണ് അനുമതി തേടിയത്. ഉച്ചയ്ക്ക് ഒരുമണിവരെ 7437 പേര് ദര്ശനം നടത്തി.
മുന്കൂര് അനുമതി തേടിയവരില് പലരും പ്രതികൂല കാലാവസ്ഥ കാരണം യാത്ര റദ്ദുചെയ്യുന്നതാണ് എണ്ണത്തില് കുറവുവരാന് കാരണം. പ്രതിദിനം വെര്ച്വല് ക്യൂവിലൂടെ 30000 പേര്ക്ക് ദര്ശനാനുമതിയുണ്ടെങ്കിലും പതിനയ്യായിരത്തില് താഴെയാണ് ബുക്കിംഗ്. സ്പോട്ട് രജിസ്ട്രേഷന് ആരംഭിച്ചാല് എണ്ണത്തില് കാര്യമായ വര്ദ്ധന ഉണ്ടാകുമെന്നാണ് ദേവസ്വം ബോര്ഡിന്റെ വിലയിരുത്തല്. മണ്ഡലകാലത്ത് വര്ഷങ്ങള്ക്ക് ശേഷം ഇന്നലെ പടിപൂജയ്ക്കൊപ്പം ഉദയാസ്തമന പൂജയും ആരംഭിച്ചു.
കൊവിഡ് പ്രതിസന്ധികളെ തുടര്ന്ന് മുടങ്ങിപ്പോയവര്ക്കും പുതിയതായി എത്തുന്നവര്ക്കും ഇപ്പോള് ഉദയാസ്തമന പൂജ നടത്താം. 40,000 രൂപയാണ് നിരക്ക്. നെയ്യഭിഷേകം ഇല്ലാത്തതും തീര്ത്ഥാടകരുടെ തിരക്ക് കുറവായതും പരിഗണിച്ചാണ് പൂജ പുനരാരംഭിച്ചത്.
ഉഷഃപൂജയ്ക്ക് ശേഷം ആരംഭിക്കുന്ന പൂജയുടെ ഘട്ടത്തില് ഉച്ചപൂജ ഉള്പ്പെടെ 16 പൂജകളും ദീപാരാധന, അത്താഴപൂജ എന്നിവയും ഇതില്പ്പെടും. പൂജാവേളകളിലെല്ലാം ക്ഷേത്രനട അടച്ച് നേദ്യം സമര്പ്പിക്കേണ്ടതിനാലാണ് വര്ഷങ്ങള്ക്ക് മുമ്പ് സീസണില് ഉദയാസ്തമന പൂജ മാസപൂജാവേളകളിലാക്കിയത്. നെയ്യഭിഷേകം പുനരാരംഭിക്കുമ്പോള് ഉദായസ്തമന പൂജ മണ്ഡലകാലത്ത് ഒഴിവാക്കും.
അതേസമയം തീര്ത്ഥാടകവാഹനത്തിന് നിലയ്ക്കല് വരെയാണ് പ്രവേശനാനുമതി. തീര്ത്ഥാടകര് അവിടെയിറങ്ങി കെ.എസ്.ആര്.ടി.സിയുടെ നിലയ്ക്കല് -പമ്പ ചെയിന്സര്വീസില് കയറിപ്പോകണം. ചെറുവാഹനങ്ങളുടെ ഡ്രൈവര് ശബരിമലയ്ക്ക് പോകുന്നില്ലെങ്കില് തീര്ത്ഥാടകരെ പമ്പയില് ഇറക്കുന്നതിന് അനുമതിയുണ്ട്. തിരികെ വാഹനം നിലയ്ക്കലില് എത്തി പാര്ക്ക് ചെയ്യണം.
"
https://www.facebook.com/Malayalivartha
