ആന്ധ്ര സ്വദേശികളായ ദമ്പതികള്‍ ദത്തെടുത്ത, അനുപമയുടേതെന്ന് കരുതുന്ന കുഞ്ഞിനെ ശിശുക്ഷേമ സമിതി പ്രവര്‍ത്തകര്‍ തിരുവനന്തപുരത്ത് എത്തിച്ചു. തുടര്‍ന്ന് പോലീസ് സംരക്ഷണയില്‍ കുഞ്ഞിനെ നഗരത്തിലെ ഒരു ശിശു സംരക്ഷണ കേന്ദ്രത്തിലേക്ക് മാറ്റി.

ഇന്നലെ രാത്രി എട്ടരയോടെയാണ് ഹൈദരാബാദില്‍നിന്നുള്ള വിമാനത്തില്‍ കുഞ്ഞിനെ എത്തിച്ചത്. ശിശുക്ഷേമസമിതി പ്രതിനിധി, ശിശുക്ഷേമ കൗണ്‍സിലില്‍ നിന്നുള്ള ആയ, മൂന്ന് പോലീസുദ്യോഗസ്ഥര്‍ എന്നിവരാണ് ആന്ധ്രയിലെത്തി കുഞ്ഞിനെ ഏറ്റുവാങ്ങി തിരുവനന്തപുരത്ത് എത്തിച്ചത്.

രണ്ടു ദിവസത്തിനു ശേഷം കുഞ്ഞിന്റെ ഡിഎന്‍എ പരിശോധന നടത്തും. ഡിഎന്‍എ ഫലം വരുന്നതുവരെ കുഞ്ഞിന്റെ സംരക്ഷണ ചുമതല ജില്ലാ ശിശു സംരക്ഷണ ഓഫീസര്‍ക്ക് ആയിരിക്കും.

നഗരത്തിലെ ഒരു ശിശുഭവനിലാണ് കുഞ്ഞിനെ എത്തിച്ചിരിക്കുന്നതെന്നാണ് റിപ്പോര്‍ട്ട്. കുഞ്ഞിനെ കൈമാറുന്നത് സംബന്ധിച്ച് അന്തിമ വിധി വരുന്നതുവരെ കുഞ്ഞിനെ ഇവിടെ സംരക്ഷിക്കും. കഴിഞ്ഞ ദിവസം ആന്ധ്രയിലെ ഒരു ജില്ലാ കേന്ദ്രത്തിലെ ശിശുക്ഷേമസമിതി ഓഫീസില്‍ വെച്ചാണ് ഏറ്റുവാങ്ങിയത്. ശനിയാഴ്ച വൈകീട്ട് ആറുമണിയോടെയാണ് സംഘം ദമ്പതിമാരെ കണ്ടത്. ഒന്നര മണിക്കൂറോളം ഇവരോട് സംസാരിച്ച ശേഷമാണ് ഏറ്റുവാങ്ങിയത്. സംഘം ആദ്യം ആന്ധ്രയിലെ ശിശുക്ഷേമസമിതി പ്രവര്‍ത്തകരുമായും സ്ഥലത്തെ പോലീസുദ്യോഗസ്ഥരുമായും ചര്‍ച്ച നടത്തിയിരുന്നു.

അതേസമയം , കുഞ്ഞിനുവേണ്ടി സമരം നടത്തുന്ന അനുപമയ്ക്ക് കുഞ്ഞ് എത്തുന്നതിനു മണിക്കൂറുകള്‍ക്കു മുമ്പ് ദേഹാസ്വാസ്ഥ്യമുണ്ടായി. ആരോഗ്യ സംഘമെത്തി പരിശോധിച്ചു. കുഞ്ഞിനെ കാണിക്കാത്തതില്‍ വിഷമമുണ്ടെന്നും ഇന്ന് കാണാന്‍ പറ്റുമെന്നാണ് പ്രതീക്ഷിക്കുന്നതെന്നും കൊണ്ടു വന്നതില്‍ സന്തോഷമുണ്ടെന്നും അനുപമ പറഞ്ഞു. കുഞ്ഞിനെ എത്തിക്കുന്നതു സംബന്ധിച്ച് ഒരറിയിപ്പും ലഭിച്ചില്ലെന്നും അനുപമ പറഞ്ഞു.

കുഞ്ഞിന്റെ ഡിഎന്‍എ പരിശോധന ഇന്ന് നടത്തിയേക്കും. റിപ്പോര്‍ട്ട് ഒരാഴ്ചയ്ക്കകം ലഭ്യമാകുമെന്ന് രാജീവ് ഗാന്ധി സെന്റര്‍ അധികൃതര്‍ പറഞ്ഞു.