ഏഴു മാസം മുമ്പ് ഇസ്റ്റഗ്രാം വഴി പരിചയപ്പെട്ട് പ്രണയത്തിലായി ഒടുവില്‍ വിവാഹവും ... ഇന്നലെ ഭാര്യവീട്ടില്‍ യുവാവിനെ മരിച്ച നിലയില്‍ കണ്ടെത്തി.....മരണത്തില്‍ ദുരൂഹതയുണ്ടെന്ന് അഷ്‌ക്കറിന്റെ ബന്ധുക്കള്‍.

കോട്ടയം ഈരാറ്റുപേട്ട നടക്കല്‍ തയ്യില്‍ വീട്ടില്‍ ടി.എ.മുഹമ്മദിന്റെ മകന്‍ അഷ്‌ക്കറിനെയാണ്(24) മുതുകുളത്തെ ഭാര്യവീട്ടില്‍ മരിച്ച നിലയില്‍ കണ്ടെത്തിയത്. ഇന്നലെ രാവിലെ 6.30 ന് വീടിന്റെ അടുക്കള ഭാഗത്ത് മരിച്ചനിലയില്‍ കാണുകയായിരുന്നു. അഷ്‌ക്കര്‍ ഒരു വര്‍ഷക്കാലമായി എറണാകുളത്ത് താമസിച്ചുവരികയാണ്.

ഏഴു മാസം മുമ്പ് ഇസ്റ്റഗ്രാം വഴി മുതുകുളം ഒന്‍പതാം വാര്‍ഡി ല്‍ കുറങ്ങാട്ടുചിറയില്‍ മഞ്ജുവിനെ പരിചയപ്പെടുകയും പ്രണയത്തിലാവുകയും ചെയ്തു.

തുടര്‍ന്ന് ആറു മാസം മുമ്പ് ഇരുവരും എറണാകുളത്ത് വച്ച് വിവാഹിതരായി. ഇവിടെ തന്നെ താമസിച്ചു വരികയായിരുന്നു. മൂന്നുമാസം മുമ്പാണ് മുതുകുളത്തെ മഞ്ജുവിന്റെ വീട്ടിലേക്ക് താമസം മാറ്റിയത്. മൃതദേഹം കണ്ടതിനെ തുടര്‍ന്ന് മഞ്ജുവും അമ്മ വിജയമ്മയും നാട്ടുകാരെ വിവരമറിയിച്ചു.

ഇവര്‍ കനകക്കുന്ന് പോലീസില്‍ അറിയിക്കുകയായിരുന്നു. പോലീസും സയന്റിഫിക് വിദഗ്ധരും സ്ഥലത്തെത്തി പരിശോധന നടത്തി. മരണത്തില്‍ ദുരൂഹതയുണ്ടെന്ന് അഷ്‌ക്കറിന്റെ ബന്ധുക്കള്‍ ആരോപിച്ചു. മൃതദേഹത്തില്‍ ചില പാടുകളുള്ളത് കൂടുതല്‍ പോലീസിന് കൂടുതല്‍ സംശയം ഉണ്ടാക്കുന്നതായി സൂചനയുണ്ട്. മൃതദേഹം ഇന്‍ക്വസ്റ്റ് നടപടികള്‍ക്ക് ശേഷം ആലപ്പുഴ മെഡിക്കല്‍ കോളജ് ആശുപത്രിയിലേക്ക് കൊണ്ടുപോയി.

കോവിഡ് പരിശോധനയ്ക്കും പോസ്റ്റുമോര്‍ട്ടത്തിനും ശേഷം മൃതദേഹം ബന്ധുക്കള്‍ക്ക് വിട്ടുകൊടുക്കും. പോസ്റ്റ്‌മോര്‍ട്ടത്തിനു ശേഷമേ യഥാര്‍ഥ മരണകാരണം പറയാനാവൂ എന്നും ഭാര്യയുടെയും അമ്മയുടെയും മൊഴികള്‍ ഇന്ന് രേഖപ്പെടുത്തും.