സമയ ബന്ധിതമായി മുഴുവന് ആശുപത്രികളിലും ഇ ഹെല്ത്ത് നടപ്പിലാക്കും;പഞ്ചായത്തടിസ്ഥാനത്തില് എല്ലാ മെഡിക്കല് ഓഫീസര്മാര്ക്കും ഒരു ഡാഷ് ബോര്ഡ് ലഭ്യമാക്കാനാണ് അടുത്തതായി ഇ ഹെല്ത്ത് ശ്രമിക്കുന്നതെന്ന് മന്ത്രി വീണാ ജോര്ജ്
സമയ ബന്ധിതമായി സംസ്ഥാനത്തെ മുഴുവന് ആരോഗ്യ കേന്ദ്രങ്ങളിലും ഇ ഹെല്ത്ത് പദ്ധതി നടപ്പിലാക്കുക എന്നതാണ് സര്ക്കാര് ഉദ്ദേശിക്കുന്നതെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. വിവിധ ജില്ലകളിലായി 50 ആശുപത്രികളിലെ ഇ ഹെല്ത്ത് സംവിധാനം, എല്ലാ ജില്ലകളിലും വെര്ച്ച്വല് ഐടി കേഡര്, ചികിത്സാ രംഗത്തെ കെ ഡിസ്കിന്റെ ഡയബറ്റിക് റെറ്റിനോപ്പതിക്ക് വേണ്ടിയുള്ള ആര്ട്ടിഫിഷ്യല് ഇന്റലിജന്സ് ഉപയോഗിച്ചുള്ള ഓട്ടോമേറ്റഡ് റെറ്റിനല് ഇമേജ് ക്വാളിറ്റി അസെസ്മെന്റ് & ഫീഡ്ബാക്ക് ജനറേഷന്, ബ്ലഡ് ബാഗ് ട്രെയ്സിബിലിറ്റിയും അനുബന്ധ രക്ത സംഭരണ കേന്ദ്രങ്ങള്, ബ്ലോക്ക്ചെയിന് അധിഷ്ഠിത വാക്സിന് കവറേജ് അനാലിസിസ് സിസ്റ്റം എന്നീ നൂതന പദ്ധതികള് എന്നിവയുടെ ഉദ്ഘാടനം ചടങ്ങിൽ അധ്യക്ഷത വഹിക്കുകയായിരുന്നു .
ആശുപത്രികള് നടക്കുന്ന നിര്മ്മാണ പ്രവര്ത്തനങ്ങള് പൂര്ത്തിയാകുന്ന മുറയ്ക്ക് ആ ആശുപത്രികളിലും ഇ ഹെല്ത്ത് നടപ്പിലാക്കുന്നതാണ്. വിവര, വിനിമയ സാങ്കേതികവിദ്യ ആരോഗ്യ മേഖലയില് പ്രയോജനപ്പെടുത്തുക എന്ന ലക്ഷ്യത്തോടെയാണ് ഇ ഹെല്ത്ത് പദ്ധതി ആശുപത്രികളില് ആവിഷ്ക്കരിച്ച് നടപ്പിലാക്കിയത്. 150 ഓളം സ്ഥാപനങ്ങളില് 5 മാസത്തിനുള്ളില് ഇ ഹെല്ത്ത് പദ്ധതി നടപ്പിലാക്കാന് കഴിഞ്ഞു എന്നത് അഭിമാനമുള്ള കാര്യമാണ്. ഈ സ്ഥലങ്ങളില് ഓണ് ലൈന് ടോക്കണ് സമ്പ്രദായം ലഭ്യമാണ്.
5 വര്ഷം കൊണ്ട് ജീവിതശൈലീ രോഗങ്ങള് വലിയ രീതിയില് കുറച്ച് കൊണ്ടുവരാനുള്ള പ്രയത്നത്തിലാണ് സംസ്ഥാന സര്ക്കാര്. വ്യക്തികളുടെ ആരോഗ്യ ചികിത്സാ ഡേറ്റ വളരെ പ്രധാനപ്പെട്ടതാണ്. ഡേറ്റ ശേഖരണത്തില് ഇ ഹെല്ത്ത് വളരെ വലിയ പങ്കാണ് വഹിക്കുന്നത്. നിപ വൈറസ് സമയത്ത് ഫീല്ഡ്തല സര്വയലന്സിന് ഇ ഹെല്ത്തിന്റെ സോഫ്റ്റുവെയര് വലിയ സഹായമായിരുന്നു.
കോവിഡ് മരണങ്ങള് റിപ്പോര്ട്ട് ചെയ്യുന്നതിനുള്ള ഡെത്ത് ഇന്ഫര്മേഷന് പോര്ട്ടല് വളരെ പെട്ടന്നാണ് ഇ ഹെല്ത്ത് തയ്യാറാക്കിയത്. കോവിഡ് ഡാഷ് ബോര്ഡും ഇ ഹെല്ത്താണ് വികസിപ്പിച്ചത്. പഞ്ചായത്തടിസ്ഥാനത്തില് എല്ലാ മെഡിക്കല് ഓഫീസര്മാര്ക്കും ഒരു ഡാഷ് ബോര്ഡ് ലഭ്യമാക്കാനാണ് അടുത്തതായി ഇ ഹെല്ത്ത് ശ്രമിക്കുന്നതെന്നും മന്ത്രി വ്യക്തമാക്കി.
ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന് ഖോബ്രഗഡെ സ്വാഗതം ആശംസിച്ച ചടങ്ങില് ഇ ഹെല്ത്ത് കേരള പ്രോജക്ട് ഡയറക്ടര് മുഹമ്മദ് വൈ സഫിറുള്ള, കെ ഡിസ്ക് മെമ്പര് സെക്രട്ടറി ഡോ. പി.വി. ഉണ്ണികൃഷ്ണന്, ആരോഗ്യ വകുപ്പ് ഡയറക്ടര് ഡോ. വി.ആര്. രാജു, ആരോഗ്യ വകുപ്പിലേയും ഇ ഹെല്ത്തിലേയും കെ ഡിസ്കിലേയും ഉന്നത ഉദ്യോഗസ്ഥര് എന്നിവര് പങ്കെടുത്തു.
https://www.facebook.com/Malayalivartha
