സെമീ കേഡര് എന്നുപറഞ്ഞാല്... കെ സുധാകരന് വന്നതോടെ കോണ്ഗ്രസില് അക്രമ വാസന രൂപപ്പെട്ടുവെന്ന വ്യാപക ആക്ഷേപത്തിന് പുറമേ പിന്തുണയുമായി കെ മുരളീധരന്; തല്ലിയാല് തിരിച്ചു രണ്ടെണ്ണം കൊടുക്കുന്നത് സെമി കേഡറിന്റെ ഭാഗം
കെപിസിസി പ്രസിഡന്റ് കെ സുധാകരന്റെ സെമി കേഡര് രീതിയ്ക്കെതിരെ പല കോണില് നിന്നും വിമര്ശനം വന്നതാണ്. കെ സുധാകരന് വന്നതോടെ കോണ്ഗ്രസില് അക്രമ വാസന രൂപപ്പെട്ടുവെന്ന വ്യാപക ആക്ഷേപവുമുണ്ടായി. എന്നിട്ടും സുധാകരന് പിന്നോട്ട് പോയില്ല. ഇപ്പോഴിതാ സുധാകരന്റെ സെമി കേഡല് സ്റ്റൈലില് പ്രതികരിച്ച് കോണ്ഗ്രസ് നേതാവ് കെ മുരളീധരന് എംപി.
സെമി കേഡര് എന്നാല് അക്രമമാര്ഗം അല്ലെങ്കിലും തല്ലിയാല് കൊള്ളുന്നതല്ല, തിരിച്ചു രണ്ടെണ്ണം കൊടുക്കുന്നതു സെമി കേഡറിന്റെ ഭാഗമാണെന്ന് കെ. മുരളീധരന് പറഞ്ഞു. വളഞ്ഞിട്ടു തല്ലുകയും പൊലീസില് നിന്നു നീതി കിട്ടാതിരിക്കുകയും ചെയ്യുമ്പോള് മറ്റു മാര്ഗമില്ല. ആരെയും വെല്ലുവിളിക്കാം. ദേഹത്തു തൊട്ടുള്ള കളിയാണു തകരാര്. അതൊക്കെ നിര്ത്തുകയാണു നല്ലത്. ഇടത്തേ കവിളില് അടിക്കുന്നവനു വലത്തേതു കാണിച്ചു കൊടുക്കണമെന്നല്ലാതെ, അതിനു ശേഷം എന്തു വേണമെന്നു ഗാന്ധിജി പറഞ്ഞിട്ടില്ല.
കണ്ണൂരില് സില്വര് ലൈന് യോഗം നടക്കുന്നിടത്തു പ്രതിഷേധിക്കാന് ചെന്ന യൂത്ത് കോണ്ഗ്രസ് നേതാക്കളെ സിപിഎമ്മുകാര്ക്കു തല്ലാന് വേണ്ടി പൊലീസ് പിടിച്ചു കൊടുക്കുകയായിരുന്നു. മകനെ കാണാനില്ലെന്ന് അമ്മ രാത്രി പൊലീസില് പരാതി കൊടുത്തപ്പോള് രാവിലെ മൃതദേഹവുമായി പൊലീസ് സ്റ്റേഷനില് ഗുണ്ട കയറിച്ചെന്ന നാടാണു കേരളം.
മുഖ്യമന്ത്രിയുടെ അമേരിക്കന് സന്ദര്ശനം പൊതുചര്ച്ചയ്ക്കു വിടേണ്ട കാര്യമില്ല. അതു മനസ്സിലാക്കിയതു കൊണ്ടാണു കെപിസിസി പ്രസിഡന്റ് മുഖ്യമന്ത്രിയുടെ ചികിത്സ പരാമര്ശിച്ച കുറിപ്പ് പിന്വലിച്ചത്. രാഷ്ട്രീയ രംഗത്തുള്ളവര് ആരോഗ്യത്തോടെ ഇരുന്നാലേ 'ഫൈറ്റ്' ചെയ്യാന് 'മൂഡ്' ഉണ്ടാകൂ. കെപിസിസി പ്രസിഡന്റ് സ്ഥാനത്ത് ആരു വന്നാലും കോണ്ഗ്രസിന്റെ മതനിരപേക്ഷ നിലപാടും അക്രമ രാഷ്ട്രീയത്തിനെതിരായ നിലപാടും മാറില്ലെന്നു മുരളീധരന് പറഞ്ഞു.
അതേസമയം യൂത്ത് കോണ്ഗ്രസ് സംസ്ഥാന വൈസ് പ്രസിഡന്റ് റിജില് മാക്കുറ്റിയെ മര്ദ്ദിച്ച സംഭവത്തില് മന്ത്രിയുടെ പേഴ്സണല് സ്റ്റാഫ് അംഗത്തിനെതിരെ വധശ്രമത്തിന് കേസെടുത്തു. പേഴ്സണല് സ്റ്റാഫ് അടക്കമുള്ളവര്ക്കെതിരെയാണ് കണ്ണൂര് ടൗണ് പൊലീസ് കേസെടുത്തത്.
കണ്ണൂരില് കെ റെയില് വിശദീകരണ യോഗത്തിനിടയിലേക്ക് യൂത്ത് കോണ്ഗ്രസ് നടത്തിയ പ്രതിഷേധ പ്രകടനത്തിനിടെയുണ്ടായ സംഘര്ഷത്തിനിടെയാണ് റിജില് മാക്കുറ്റിക്ക് മര്ദ്ദനമേറ്റത്. ഡി.വൈ.എഫ്.ഐ ജില്ലാ സെക്രട്ടറി എം ഷാജര്, റോബര്ട്ട് ജോര്ജ് , പി പി, ഷാജര് തുടങ്ങിയവര്ക്കെതിരെയും കേസ് എടുത്തിട്ടുണ്ട്.
കഴിഞ്ഞ ഇരുപതാം തീയതിയാണ് കണ്ണൂരില് നടന്ന കെ റെയില് വിശദീകരണ യോഗത്തിലേക്ക് യൂത്ത് കോണ്ഗ്രസ് പ്രതിഷേധവുമായെത്തിയത്. യോഗ സ്ഥലത്തെത്തിയ യൂത്ത് കോണ്ഗ്രസ് പ്രവര്ത്തകരും സി.പി.എം അനുകൂലികളും തമ്മില് വാക്കേറ്റവും കൈയാങ്കളിയും ഉണ്ടായി. സംഘര്ഷത്തിനിടെ റിജില് മാക്കുറ്റിയടക്കമുള്ള യൂത്ത് കോണ്ഗ്രസ് നേതാക്കള്ക്ക് മര്ദ്ദനമേറ്റിരുന്നു. യൂത്തുകോണ്ഗ്രസ് പരാതിയിലാണ് ഇപ്പോള് പൊലീസ് കേസെടുത്തിരിക്കുന്നത്.
കോണ്ഗ്രസില് നേതൃസ്ഥാനത്തേക്ക് സാമുദായിക പരിഗണന നോക്കാറുണ്ടെന്ന് കെ മുരളീധരന് പറഞ്ഞതും ചര്ച്ചയായി. കെ സുധാകരന് കെപസിസി പ്രസിഡന്റായതും സാമുദായിക പരിഗണന കൂടി നോക്കിയാണ്. കോണ്ഗ്രസ് എല്ലാകാലത്തും സമുദായ സമവാക്യം കൃത്യമായി നടപ്പാക്കുന്ന പാര്ടിയാണ്. സിപിഐ എം സംസ്ഥാന സെക്രട്ടറി കോടിയേരി ബാലകൃഷ്ണന് കോണ്ഗ്രസിന്റെ കാര്യത്തില് അഭിപ്രായം പറയണ്ട. കോടിയേരി ന്യൂനപക്ഷ കാര്ഡിറക്കുകയാണെന്നും മുരളീധരന്പറഞ്ഞു.
"
https://www.facebook.com/Malayalivartha
