എം.സി.റോഡില്‍ ബൈക്കുകളുടെ മരണപ്പാച്ചിലിനിടെ അപകടം. അമിതവേഗത്തിലെത്തിയ സംഘത്തിലൊരാളിന്റെ ബൈക്ക് എതിരേവന്ന ബുള്ളറ്റില്‍ ഇടിച്ചു. ബുള്ളറ്റില്‍ സഞ്ചരിച്ച വാളകം ശ്രീനിലയത്തില്‍ അശ്വിന്‍ കൃഷ്ണ(24)നെ ഗുരുതര പരിക്കുകളോടെ തിരുവനന്തപുരത്ത് സ്വകാര്യ ആശുപത്രിയില്‍ പ്രവേശിപ്പിച്ചു.

എം.ബി.എ. വിദ്യാര്‍ഥിയായ അശ്വിന്റെ കാല്‍ മൂന്നായി ഒടിഞ്ഞു. ബൈക്ക് ഓടിച്ചിരുന്ന പത്തനംതിട്ട സ്വദേശി ആരോമല്‍ (19) പരിക്കുകളോടെ തിരുവനന്തപുരം മെഡിക്കല്‍ കോളേജ് ആശുപത്രിയിലാണ്.വാളകം പൊലിക്കോട്ട് വെള്ളിയാഴ്ച ഉച്ചയ്ക്ക് പന്ത്രണ്ടിനായിരുന്നു അപകടം നടന്നത്. തിരുവനന്തപുരം ഭാഗത്തുനിന്ന് നാല് പുതുതലമുറ ബൈക്കുകളിലാണ് യുവാക്കള്‍ മത്സരപ്പാച്ചില്‍ നടത്തിയത്.

മുന്നിലെ ബൈക്ക് ഓടിച്ചിരുന്ന യുവാവ് സെല്‍ഫിയെടുക്കാന്‍ ശ്രമിച്ചപ്പോള്‍ നിയന്ത്രണംവിട്ട് എതിരേവന്ന ബുള്ളറ്റിലേക്ക് ഇടിച്ചുകയറുകയായിരുന്നെന്ന് നാട്ടുകാര്‍ പറഞ്ഞു.

ബൈക്കിന്റെ മുന്‍ ചക്രമുള്‍പ്പെട്ടഭാഗം ഒടിഞ്ഞുമാറി. മീറ്ററുകളോളം ബൈക്കും യുവാവും നിരങ്ങിനീങ്ങി. ബുള്ളറ്റിന്റെ ക്രാഷ്ഗാഡും എന്‍ജിന്‍ കവറും തകര്‍ന്നു.

ബുള്ളറ്റില്‍ സഞ്ചരിച്ച അശ്വിന്‍ കൃഷ്ണന്റെ കാല്‍ മൂന്നായി ഒടിഞ്ഞു. ഇടിയുടെ ആഘാതത്തില്‍ ബുള്ളറ്റ് സമീപമുണ്ടായിരുന്ന മറ്റൊരു കാറില്‍ ഇടിച്ചു. നിരങ്ങിനീങ്ങിയ ന്യൂജെന്‍ ബൈക്ക് സമീപത്തെ കടയ്ക്കുമുന്നില്‍ റോഡരികില്‍ െവച്ചിരുന്ന ഉന്തുവണ്ടിയിലും ഇടിച്ചു. മത്സരയോട്ടം നടത്തിയ ബൈക്കുകള്‍ക്കൊന്നിനും നമ്പര്‍ പ്ലേറ്റ് ഉണ്ടായിരുന്നില്ല.

അപകടസ്ഥലത്തിനുസമീപം ആളൊഴിഞ്ഞിടത്ത് ഒരു ബൈക്ക് ഉപേക്ഷിച്ചശേഷം മറ്റുള്ളവര്‍ കടന്നു. ഈ ബൈക്ക് പിന്നീട് പോലീസ് കണ്ടെടുത്തു.അമിതവേഗത്തില്‍ ബൈക്കുകള്‍ പായുന്നത് ആയൂര്‍ ഭാഗത്തുവെച്ച് പോലീസിന്റെ ഹൈവേ പട്രോള്‍ സംഘം ശ്രദ്ധിച്ചിരുന്നു.

പിന്തുടര്‍ന്നെത്തിയപ്പോഴേക്കും അപകടം നടന്നതായി പോലീസ് പറഞ്ഞു. മത്സരയോട്ടത്തില്‍ പങ്കെടുത്ത മറ്റുള്ളവരെ കണ്ടെത്താന്‍ പോലീസ് അന്വേഷണം തുടങ്ങി.