ഹൈഡ്രജന്‍ പെറോക്‌സൈഡ് അളവ് രേഖപ്പെടുത്താതെ മിസ് ബ്രാന്റ് ചെയ്ത് ഹെയര്‍ ഡൈ ഷാംപുവും സൗന്ദര്യ വര്‍ദ്ധക ക്രീം ബ്ലീച്ച് വിറ്റ കേസില്‍ തലസ്ഥാനത്തെ പ്രമുഖ കോസ്മറ്റിക്‌സ് കടയുടമ ഹാജരാകാന്‍ കോടതി ഉത്തരവിട്ടു.

തിരുവനന്തപുരം മൂന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയാണ് കേസെടുത്തത്. പ്രതി മാര്‍ച്ച് 17 ന് ഹാജരാകാനാണ് മജിസ്‌ട്രേട്ട് അഭിനിമോള്‍ രാജേന്ദ്രന്‍ ഉത്തരവിട്ടത്. ആയുര്‍വ്വേദ കോളേജിന് എതിര്‍വശം ധര്‍മ്മാലയം റോഡില്‍ റാവൂസ് കംപ്ലീറ്റ് ബ്യൂട്ടി ഷോപ്പ് എന്ന കോസ്മറ്റിക്‌സ് കടയുടമ പ്രമോദ് റാവു ദിവാകര റാവുവിനെ പ്രതി ചേര്‍ത്താണ് കോടതി കേസെടുത്തത്. ഡ്രഗ്‌സ് ഇന്‍സ്‌പെക്ടര്‍ ചിത്ര. ആര്‍.ദേവി സമര്‍പ്പിച്ച പരാതിയിലാണ് കോടതി കേസ് എടുത്തത്.



കോസ്മറ്റിക്‌സ് , ബ്ലീച്ച് ക്രീമുകള്‍ , 3 വൈ നോനി ബ്ലാക്ക് ഹെയര്‍ മാജിക് , ഹെയര്‍ ഡൈ ഷാംപൂ എന്നിവ ഡ്രഗ്‌സ് ഇന്‍സ്‌പെക്ടര്‍ പിടിച്ചെടുത്ത കേസിലാണ് റാവൂസ് സ്ഥാപന ഉടമക്കെതിരെ കോടതി കേസെടുത്തത്. ബി ഐ എസ് നിബന്ധന പ്രകാരം ക്രീം ബീച്ച് പായ്ക്കറ്റുകളില്‍ ഹൈഡ്രജന്‍ പെറോക്‌സയിഡ് ചേരുവയുടെ ഉള്ളടക്ക ശതമാനം വ്യക്തമായി രേഖപ്പെടുത്തേണ്ടതുണ്ട്.


എന്നാല്‍ സ്ഥാപനത്തില്‍ നിന്നും പിടിച്ചെടുത്ത ക്രീം ബീച്ചില്‍ ഈ ആധികാരിക വ്യവസ്ഥ പാലിച്ചിട്ടില്ലെന്ന് ഡ്രഗ്‌സ് ഇന്‍സ്‌പെക്ടര്‍ കോടതിയില്‍ സമര്‍പ്പിച്ച സ്വകാര്യ അന്യായത്തില്‍ പറയുന്നു. ബി ഐ എസ് നിബന്ധന 4.4 പ്രകാരം ഹൈഡ്രജന്‍ പൊറോക്‌സയിഡ് ചില കേസുകളില്‍ ചര്‍മ്മത്തിന് ഹാനികരമാണ്. അതിനാല്‍ ബി ഐ എസ് നിബന്ധന 4.4.1 പ്രകാരം പ്രാഥമിക പരിശോധന നടത്തണമെന്ന നിബന്ധന പായ്ക്കറ്റില്‍ രേഖപ്പെടുത്തേണ്ടതായുണ്ട്. അപ്രകാരം ഓരോ പായ്ക്കറ്റിലും പ്രാരംഭ ടെസ്റ്റ് നടത്തണമെന്ന നിബന്ധന ഇംഗ്ലീഷിലും പ്രാദേശിക ഭാഷയിലും നിര്‍ദ്ദേശമായി രേഖപ്പെടുത്തണം. എന്നാല്‍ സ്ഥാപനത്തില്‍ നിന്നും പിടിച്ചെടുത്ത ക്രീം ബ്ലീച്ചുകളില്‍ ഇവ പാലിച്ചിട്ടില്ലെന്ന് ഡ്രഗ്‌സ് ഇന്‍സ്‌പെക്ടര്‍ സമര്‍പ്പിച്ച പരാതിയില്‍ പറയുന്നു.


ഓക്‌സിഡേഷന്‍ ഹെയര്‍ ഡൈക്ക് (എമള്‍ സണ്‍ ടൈപ്പ്) ബി ഐ എസ് സ്‌പെസിഫിക്കേഷന്‍ പ്രകാരം ഓരോ പൗച്ചിലും ഗ്ലാസ് ബോട്ടിലിലും പാക്കേജ് , കാര്‍ട്ടണ്‍ ബോക്‌സിലും ഉല്‍പ്പന്നം ' കണ്‍ പീലികളോ കണ്‍ പുരികങ്ങളോ ഡൈ ചെയ്യാന്‍ ഉപയോഗിക്കുവാന്‍ പാടുള്ളതല്ല ' എന്ന മുന്നറിയിപ്പ് രേഖപ്പെടുത്തേണ്ടതുണ്ട്. 1945 ല്‍ നിലവില്‍ വന്ന ഡ്രഗ്‌സ് ആന്റ് കോസ് മെറ്റിക്‌സ് ചട്ടങ്ങളിലെ ചട്ടം 149 പ്രകാരം സൗന്ദര്യ വര്‍ദ്ധക വസ്തുക്കളുടെ അകത്തും പുറത്തുമുള്ള ലേബലുകളിലും മുന്നറിയിപ്പ് ഇംഗ്ലീഷിലും പ്രാദേശിക ഭാഷകളിലും രേഖപ്പെടുത്തേണ്ടതുണ്ട്.

റാവൂസില്‍ നിന്ന് പിടിച്ചെടുത്ത നോനി ബ്ലാക് ഹെയര്‍ മാജിക് ഷാംപൂ ഡൈയില്‍ ഇത്തരം നിബന്ധന പാലിച്ചിട്ടില്ലെന്നും ഡ്രഗ്‌സ് ഇന്‍സ്‌പെക്ടര്‍ കണ്ടെത്തി. ഡ്രഗ്‌സ് ആന്റ് കോസ് മെറ്റിക്‌സ് നിയമത്തിലെ 17 (സി) (ബി) പ്രകാരവും ചട്ടം 149 പ്രകാരവും ഉല്‍പ്പന്നം മിസ് ബ്രാന്റഡ് ആണ്. മിസ് ബ്രാന്റഡ് ഉല്‍പ്പന്നങ്ങള്‍ വില്‍പ്പനക്കായി സ്റ്റോക്ക് ചെയ്തതും വിറ്റതും വഴി പ്രതി വകുപ്പ് 18 (എ) (2) ലംഘിച്ചു. വകുപ്പ് 18 എ ( 2) , ചട്ടം 148 ,149 , 27 (എ) (2) എന്നീ വകുപ്പുകള്‍ പ്രകാരമാണ് കോടതി പ്രതിക്കെതിരെ കേസെടുത്ത് പ്രതിയോട് ഹാജരാകാന്‍ ഉത്തരവിട്ടത്.