മണല്‍ ലോറി പോലീസിന് ഒറ്റിയതിന് പ്രതികാരമായി മണല്‍ മാഫിയ കൊലപ്പെടുത്തിയ പ്രവീണ്‍ കുമാര്‍ കൊലക്കേസില്‍ പോലീസ് കുറ്റപത്രത്തിലെ വൂണ്ട് സര്‍ട്ടിഫിക്കറ്റ് ഹാജരാക്കാന്‍ മജിസ്‌ട്രേട്ട് തിരുവനന്തപുരം ജില്ലാ കോടതിയില്‍ സമയം തേടി.


തുടര്‍ന്ന് 29 ന് ഹാജരാക്കാന്‍ ജില്ലാ കോടതി ഉത്തരവിട്ടു. വിചാരണ കോടതി ജഡ്ജിയായ തിരുവനന്തപുരം ആറാം അഡീ. ജില്ലാ സെഷന്‍സ് ജഡ്ജി കെ. എന്‍. അജിത് കുമാറാണ് ജനുവരി 10 നകം ഹാജരാക്കാന്‍ ഡിസംബര്‍ 28 ന് ഉത്തരവിട്ടത്. കമ്മിറ്റല്‍ മജിസ്‌ട്രേട്ട് കോടതിയായ നെയ്യാറ്റിന്‍കര മൂന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിക്കാണ് വിചാരണ കോടതി നിര്‍ദ്ദേശം നല്‍കിയത്.

വിചാരണ പൂര്‍ത്തിയായ കേസില്‍ അന്തിമ വാദം കേള്‍ക്കവേയാണ് കോടതി ഉത്തരവ്. പ്രാമാണിക രേഖയായ വൂണ്ട് സര്‍ട്ടിഫിക്കറ്റ് പോലീസ് കുറ്റപത്രത്തിലെ ഐറ്റം നമ്പര്‍ 17 ആയി കാണുന്നുണ്ടെങ്കിലും ജില്ലാ കോടതിക്ക് കേസ് റെക്കോര്‍ഡുകള്‍ക്കൊപ്പം കമ്മിറ്റല്‍ മജിസ്‌ട്രേട്ട് കേസ് ലിസ്റ്റില്‍ ഉള്‍പ്പെടുത്തി വിചാരണ കോടതിക്ക് കമ്മിറ്റ് ചെയ്തയക്കാത്തതിനാലാണ് ഹാജരാക്കാന്‍ നിര്‍ദേശം നല്‍കിയത്.


2015 ലാണ് അന്നത്തെ നെയ്യാറ്റിന്‍കര മജിസ്‌ട്രേട്ട് വിചാരണക്കായി കേസ് കമ്മിറ്റ് ചെയ്ത് ജില്ലാ സെഷന്‍സ് കോടതിയ്ക്ക് കമ്മിറ്റ് ചെയ്തയച്ചതെങ്കിലും ഇപ്പോള്‍ നിലവിലുള്ള മജിസ്‌ട്രേട്ടിനോടാണ് ജില്ലാ കോടതി നിര്‍ദേശം നല്‍കിയത്.

സാക്ഷി വിസ്താര വിചാരണ പൂര്‍ത്തിയായതിനെ തുടര്‍ന്ന് അന്തിമവാദം കേള്‍ക്കവേ പ്രതിഭാഗമാണ് നിര്‍ണ്ണായക രേഖയായ വൂണ്ട് സര്‍ട്ടിഫിക്കറ്റ് കോടതിയിലില്ലെന്ന വാദമുന്നയിച്ചത്. പ്രോസിക്യൂഷന്‍ കേസ് തെളിയിക്കേണ്ട നിര്‍ണ്ണായക പ്രാമാണിക രേഖ പ്രോസിക്യൂഷന്‍ ഭാഗം തെളിവിലേക്കായി അക്കമിട്ട് തെളിവില്‍ കോടതി സ്വീകരിക്കാതെ തങ്ങളെ ശിക്ഷിക്കുന്നത് സ്വാഭാവിക നീതി നിഷേധമാകുമെന്നും പ്രതികള്‍ വാദമുന്നയിച്ചു. തുടര്‍ന്ന് കോടതി നടത്തിയ പരിശോധനയിലാണ് രേഖ കമ്മിറ്റല്‍ മജിസ്‌ട്രേട്ട് അയക്കാത്തത് ജില്ലാ കോടതി കണ്ടെത്തിയത്.