സുരക്ഷാ കാരണങ്ങള്‍ ഉന്നയിച്ച്‌ മീഡിയവണ്‍ ചാനലിന്റെ സംപ്രേഷണം കേന്ദ്ര സര്‍ക്കാര്‍ തടഞ്ഞ വിഷയത്തില്‍ പ്രതികരണവുമായി സ്പീക്കര്‍ എംബി രാജേഷ് രംഗത്ത്. ഭരണഘടന ഉറപ്പു നല്‍കുന്ന അഭിപ്രായ സ്വാതന്ത്ര്യമാണ് മാധ്യമ സ്വാതന്ത്ര്യത്തിന്റെ അടിത്തറയെന്നും മീഡിയവണ്‍ ചാനലിന്റെ സംപ്രേഷണം തടഞ്ഞുകൊണ്ടുള്ള കേന്ദ്ര സര്‍ക്കാര്‍ നടപടി അഭിപ്രായ സ്വാതന്ത്ര്യത്തിനെതിരായ ഭരണകൂട കയ്യേറ്റമായി കണക്കാക്കണമെന്നും അദ്ദേഹം പറഞ്ഞു.

അഭിപ്രായസ്വാതന്ത്ര്യത്തിനെതിരായ ഭരണകൂട നീക്കങ്ങള്‍ കഴിഞ്ഞ ഏതാനും വര്‍ഷങ്ങളിലായി ശക്തിപ്പെട്ടുവരികയാണെന്നും ഇത്തരം ഭരണകൂട നീക്കങ്ങള്‍ ജനാധിപത്യത്തിന് ആഘാതമേല്‍പ്പിക്കുന്നവയാണെന്നും എംബി രാജേഷ് പറഞ്ഞു.

എംബി രാജേഷിന്‍റെ ഫേസ്ബുക്ക് പോസ്റ്റ്

മാധ്യമ സ്വാതന്ത്ര്യത്തിന്റെ അടിത്തറ ഭരണഘടന ഉറപ്പു നല്‍കുന്ന അഭിപ്രായ സ്വാതന്ത്ര്യത്തിലാണ്. മീഡിയാ വണ്‍ ചാനലിന്റെ സംപ്രേഷണം തടഞ്ഞുകൊണ്ടുള്ള കേന്ദ്ര സര്‍ക്കാര്‍ നടപടി അതു കൊണ്ടു തന്നെ അഭിപ്രായ സ്വാതന്ത്ര്യത്തിനെതിരായ ഭരണകൂട കയ്യേറ്റമായി കണക്കാക്കണം. കഴിഞ്ഞ ഏതാനും വര്‍ഷങ്ങളിലായി അഭിപ്രായസ്വാതന്ത്ര്യത്തിനെതിരായ ഭരണകൂട നീക്കങ്ങള്‍ ശക്തിപ്പെട്ടിട്ടുണ്ട്. ആ ഭരണകൂട നീക്കങ്ങള്‍ ജനാധിപത്യത്തിന് ആഘാതമേല്‍പ്പിക്കുന്നവയാണ്.
മാധ്യമങ്ങളെ പ്രലോഭനവും സമ്മര്‍ദ്ദവും ഭീഷണിയും ഉപയോഗിച്ച്‌ വരുതിയിലാക്കാനുള്ള ശ്രമങ്ങളും നിരന്തരമായും ആസൂത്രിതമായും നടത്തിക്കൊണ്ടിരിക്കുകയാണ്.ആ ശ്രമങ്ങളെ ജനാധിപത്യവാദികള്‍ ഒറ്റക്കെട്ടായി ചെറുക്കേണ്ടതുണ്ട്.