അടുത്തിടെയുണ്ടായ വാഹനാപടകത്തില്‍ വാവ സുരേഷിന് സാരമായ പരിക്ക് പറ്റിയിരുന്നു. എന്നാല്‍ ഒരു പാമ്പ് നാട്ടുകാരെ വിറപ്പിയ്ക്കുന്നെന്ന് അറിഞ്ഞപ്പോള്‍ വളരെ ദൂരം യാത്ര ചെയ്ത് കോട്ടയത്തെത്തുകയായിരുന്നു. പക്ഷെ വിധിപോലെ ആ കടിയെത്തി.

വാവ സുരേഷിനെ കടിച്ചത് ഒരാഴ്ചയോളമായി പ്രദേശത്തെ വിറപ്പിച്ച മൂര്‍ഖനാണ്. യൂത്ത് കോണ്‍ഗ്രസ് കുറിച്ചി മണ്ഡലം പ്രസിഡന്റ് കരിനാട്ടുകവല പാട്ടാശേരിയില്‍ വാണിയപ്പുരയ്ക്കല്‍ വി.ജെ. നിജുമോന്റെ വീട്ടുവളപ്പില്‍ കൂട്ടിയിട്ട കരിങ്കല്ലുകള്‍ക്കിടയിലാണ് പാമ്പിനെ കണ്ടത്. വാവ സുരേഷ് എത്താന്‍ വൈകുമെന്ന് അറിഞ്ഞതോടെ വീട്ടുകാര്‍ വല കൊണ്ട് പാമ്പിനെ പിടിക്കാന്‍ ശ്രമം നടത്തിയെങ്കിലും സാധിച്ചില്ല. തുടര്‍ന്ന് കരിങ്കല്ലു കൂട്ടം വല കൊണ്ട് മൂടിയിട്ടു.

സുരേഷ് ഇന്നലെ എത്തിയെങ്കിലും അപകടത്തില്‍ പരുക്കേറ്റതിനെത്തുടര്‍ന്ന് നടുവേദന ഉള്ളതിനാല്‍ കല്ലും മറ്റും നാട്ടുകാരാണ് മാറ്റിയത്. അവസാനത്തെ കല്ല് ഇളക്കിയതോടെ പാമ്പിനെ കണ്ടു. ഉടനെ സുരേഷ് പാമ്പിനെ പിടികൂടി. പാമ്പ് നാലു തവണ ചാക്കില്‍ നിന്നു പുറത്തു ചാടി. അഞ്ചാം തവണ സുരേഷ് കാല് ചാക്കിനടുത്തേക്കു നീക്കിവച്ച് പാമ്പിനെ കയറ്റാന്‍ ശ്രമിച്ചപ്പോഴാണ് കടിയേറ്റത്.

സുരേഷിന്റെ കയ്യില്‍ നിന്നു പിടിവിട്ടതോടെ പാമ്പ് വീണ്ടും ഇളക്കിയിട്ട കരിങ്കല്ലിന്റെ ഇടയില്‍ ഒളിച്ചു. സുരേഷ് വീണ്ടുമെത്തി കരിങ്കല്ല് നീക്കി പാമ്പിനെ പിടിച്ചു കാര്‍ഡ്‌ബോര്‍ഡ് ബോക്‌സിലാക്കി സ്വന്തം കാറില്‍ കൊണ്ടു വച്ചു. പിന്നെ സ്വയം പ്രഥമശുശ്രൂഷ ചെയ്തു. കാലില്‍ കടിയേറ്റ ഭാഗം വെള്ളം കൊണ്ടു കഴുകി. രക്തം ഞെക്കികകളഞ്ഞു. തുണി കൊണ്ട് മുറിവില്‍ കെട്ടി.

സുരേഷിന്റെ കാറില്‍ത്തന്നെയാണ് ആശുപത്രിയിലേക്ക് കൊണ്ടുപോയത്. ഡ്രൈവര്‍ക്ക് ആശുപത്രിയിലേക്കുള്ള വഴി പരിചയമില്ലാത്തതിനാല്‍ ഇടയ്ക്ക് നിജുവിന്റെ കാറിലേക്കു സുരേഷിനെ കയറ്റി. യാത്രയ്ക്കിടെ സുരേഷ് സംസാരിച്ചിരുന്നതായി നിജു പറഞ്ഞു. എന്നാല്‍, ചിങ്ങവനത്ത് എത്തിയപ്പോള്‍ തല കറങ്ങുന്നതായി പറഞ്ഞു. നാട്ടകം സിമന്റ് കവലയെത്തിയോടെ ഛര്‍ദിച്ച് അവശ നിലയിലായി.

സുരേഷിനെ പാമ്പു കടിക്കുന്നതു കണ്ടു നിന്ന നാട്ടുകാരനായ ആള്‍ സംഭവസ്ഥലത്ത് തലകറങ്ങി വീണു. വീഴ്ചയില്‍ തലയ്ക്ക് പരുക്കേറ്റയാളെ കോട്ടയത്ത് സ്വകാര്യ ആശുപത്രിയില്‍ പ്രവേശിപ്പിച്ചു.

വാവ സുരേഷ് വന്നപ്പോഴേ പറഞ്ഞു: പാമ്പ് ഒന്നല്ല, രണ്ടെണ്ണം ഉണ്ട്. ഒന്നിനെ പിടിച്ച ശേഷം രണ്ടാമത്തേതിനെ നോക്കാമെന്നാണ് പറഞ്ഞത്. ആദ്യത്തേതിനെ ചാക്കിലാക്കിയപ്പോഴേക്കും കടിയേറ്റതായി നാട്ടുകാര്‍ പറഞ്ഞു.

കഴിഞ്ഞ വെള്ളപ്പൊക്കത്തിനു ശേഷം കുറിച്ചിയുടെ പടിഞ്ഞാറന്‍ മേഖലയില്‍ പാമ്പുകള്‍ പെരുകി. വനം വകുപ്പ് ഉദ്യോഗസ്ഥര്‍ എത്തിയാണ് പാമ്പിനെ പിടിക്കുന്നത്. പെരുമ്പാമ്പിനെയും മൂര്‍ഖന്‍ കുഞ്ഞുങ്ങളെയും ഇവിടെ നിന്നു പിടിച്ചിട്ടുണ്ട്. മീന്‍ പിടിക്കാന്‍ വല ഇടുമ്പോള്‍ മിക്കപ്പോഴും പാമ്പ് കുടുങ്ങുമെന്നും നാട്ടുകാര്‍ പറഞ്ഞു

പാമ്പിനെ കണ്ടെത്തിയാല്‍ പിടികൂടുന്നതിനായി വനംവകുപ്പ് തയാറാക്കിയ 'സര്‍പ്പ' (SARPA) ആപ് എല്ലാ ജില്ലകളിലും പ്രവര്‍ത്തിക്കുന്നു. പാമ്പിനെ കണ്ടെത്തിയാല്‍ വിവരം വനം വകുപ്പിന്റെ ഈ ആപ്പില്‍ നല്‍കിയാല്‍ മതി. വിവരം ലഭിച്ചാലുടന്‍ വനം വകുപ്പിന്റെ റെസ്‌ക്യൂവര്‍ സ്ഥലത്തെത്തി പാമ്പിനെ പിടിച്ചുകൊണ്ടുപോയി ഉള്‍വനത്തില്‍ വിട്ടയയ്ക്കും.

വനപാലകര്‍ക്കും പൊതുജനങ്ങള്‍ക്കും പാമ്പുപിടിത്തത്തില്‍ വനംവകുപ്പ് പരിശീലനം നല്‍കിയിരുന്നു. ജില്ലയില്‍ 43 പേര്‍ പരിശീലനം പൂര്‍ത്തിയാക്കിയിട്ടുണ്ട്. പാമ്പിനെ കണ്ടാല്‍ അവയുടെ ഫോട്ടോയും ഇരിക്കുന്ന സ്ഥലവും സംബന്ധിച്ച വിവരം ആപ്പിലേക്ക് കൈമാറാം.

സന്ദേശം വരുന്ന സ്ഥലത്തിന്റെ ലൊക്കേഷന്‍ പരിശോധിച്ചാണ് റെസ്‌ക്യൂവര്‍ സ്ഥലത്തെത്തുക. പാമ്പിനെ പിടിക്കുന്നതിന് പൊതുജനങ്ങള്‍ പണമൊന്നും നല്‍കേണ്ടതില്ല. പ്ലേസ്‌റ്റോറില്‍നിന്ന് 'സര്‍പ്പ' എന്ന ആപ് ഡൗണ്‍ലോഡ് ചെയ്ത് ആര്‍ക്കും വിവരങ്ങള്‍ കൈമാറാം: