ഇടുക്കി ഉടുമ്പന്‍ചോല കുത്തുങ്കലില്‍ ചെക്ക് ഡാമിന് സമീപത്തുനിന്ന് ഒരു സ്ത്രീ ഉൾപ്പടെ മൂന്ന് പേരുടെ മൃതദേഹങ്ങൾ കണ്ടെത്തിയതായി റിപ്പോർട്ട്. കഴിഞ്ഞ തിങ്കളാഴ്ച മുതൽ കാണാതായ അന്യ സംസ്ഥാന തൊഴിലാളികളായ ഒരു സ്ത്രീയുടെയും രണ്ട് പുരുഷന്മാരുടെയും മൃതദേഹങ്ങളാണ് കണ്ടെടുത്തത് എന്നാണ് ലഭ്യമാകുന്ന വിവരം. മൃതദേഹം കണ്ട നാട്ടുകാരാണ് പൊലീസിനെ വിളിച്ച് വിവരമറിയിച്ചത്.

അതോടൊപ്പം തന്നെ മൂവരും ആത്മഹത്യ ചെയ്തതാണോ എന്ന കാര്യത്തിൽ വ്യക്തതയില്ലെന്നാണ് പൊലീസ് ചൂണ്ടിക്കാണിക്കുന്നത്. പോസ്റ്റുമോർട്ടം കഴിഞ്ഞാലേ ഇക്കാര്യത്തെക്കുറിച്ച് കൂടുതൽ കാര്യങ്ങൾ വ്യക്തമാകുകയുള്ളു എന്നും പോലീസ് വ്യക്തമാക്കി. എന്നാൽ, സംഭവത്തിൽ ദുരൂഹതയുണ്ടെന്ന സംശയത്തിലാണ് നാട്ടുകാരിൽ ചിലർ വെളിപ്പെടുത്തുന്നത്. മൃതദേഹങ്ങൾ കരയ്‌ക്കെത്തിച്ചിട്ടുണ്ട്. ഉടുമ്പൻ ചോല-രാജാക്കാട് പഞ്ചായത്തുകളുടെ അതിർത്തിപ്രദേശമാണ് കുത്തുങ്കൽ.