ദിലീപിന് മുന്‍കൂര്‍ ജാമ്യം കിട്ടിയാല്‍ അന്വേഷണ ഉദ്യോഗസ്ഥരുടെ ഭാവി തുലാസിലാകും. ഉന്നത പോലീസുദ്യോഗസ്ഥര്‍ മടിച്ചു നിന്നപ്പോഴും ആത്മവിശ്വാസം നല്‍കി ബാലചന്ദ്രകുമാറുമായി മുന്നോട്ടു നീങ്ങിയത് അന്വേഷണ സംഘമാണ്.

എ.ഡി.ജി.പി എസ് ശ്രീജിത്തിന് പോലും കേസിന്റെ ഭാവിയില്‍ ആശങ്കയുണ്ട്. രാമന്‍പിള്ള വക്കീല്‍ ദിലീപിന് ഇപ്പോള്‍ ഈശ്വരനാണ്. അദ്ദേഹത്തിന് മുന്നില്‍ ദിലീപ് സാഷ്ടാംഗം നമസ്‌കരിക്കുന്നു.

അന്വേഷണ ഉദ്യോഗസ്ഥരെ വധിക്കാന്‍ ഗൂഢാലോചന നടത്തിയ കേസില്‍ ദിലീപിന്റെയും കൂട്ടുപ്രതികളുടെയും മുന്‍കൂര്‍ ജാമ്യാപേക്ഷയില്‍ ഹൈക്കോടതിയില്‍ ഇന്ന് പ്രോസിക്യൂഷന്‍ വാദം നടക്കും. ഉച്ചയ്ക്ക് 1.45നാണ് ജസ്റ്റീസ് പി ഗോപിനാഥിന്റെ ബെഞ്ച് ഹര്‍ജികള്‍ പരിഗണിക്കുന്നത്. നടിയെ ആക്രമിച്ച സംഭവത്തിലെ അന്വേഷണ ഉദ്യോഗസ്ഥരെ അപായപ്പെടുത്താന്‍ ഗൂഡാലോചന നടത്തിയ കേസ് നിലനില്‍ക്കില്ലെന്നും കെട്ടിച്ചമച്ച തെളിവുകളാണ് പ്രോസിക്യൂഷന്റെ കൈവശമുളളതെന്നും പ്രതിഭാഗം ഇന്നലെ നിലപാടെടുത്തിരുന്നു.

വധ ഗൂഡാലോചനയ്ക്ക് കൂടുതല്‍ തെളിവുകളുണ്ടെന്ന് സംവിധായകന്‍ ബാലചന്ദ്രകുമാര്‍ വെളിപ്പെടുത്തിയ സ്ഥിതിക്ക് പ്രോസിക്യൂഷന്‍ കോടതിയില്‍ എന്ത് നിലപാടെടുക്കുമെന്നാണ് ഏവരും ഉറ്റുനോക്കുന്നത്. ഇതിനിടെ നടിയെ ആക്രമിച്ച കേസിലെ തുടരന്വേഷണം റദ്ദാക്കണമെന്നാവശ്യപ്പെട്ട് ദിലീപ് സമര്‍പ്പിച്ച ഹര്‍ജിയും ഹൈക്കോടതിയുടെ മറ്റൊരു ബെഞ്ചിന്റെ പരിഗണനയ്ക്ക് വരുന്നുണ്ട്. ഇതില്‍ വധ ഗൂഡാലോചനാക്കേസിലെ പ്രതികളുടെ ശബ്ദ പരിശോധന നടത്തണമെന്ന ക്രൈംബ്രാഞ്ച് അപേക്ഷ ആലുവ കോടതിയുടെ പരിഗണനയിലുമാണ്.

ഉദ്യോഗസ്ഥനെ ട്രക്കിടിപ്പിച്ച് കൊല്ലുമെന്ന് പറഞ്ഞതയും ദിലീപ് രക്ഷപ്പെടാന്‍ കള്ളം പറയുന്നതായും ബാലചന്ദ്ര കുമാര്‍ വെളിപെടുത്തി.ഇത്തരം വെളിപെടുത്തലുകളുടെയെല്ലാം ഭാവി കോടതിയുടെ കൈയിലാണ്.

നടി ആക്രമിക്കപ്പെട്ട കേസിലെ അന്വേഷണ ഉദ്യോഗസ്ഥന്‍ ബൈജു പൗലോസിനെ കൊല്ലാന്‍ ദിലീപ് അനൂപിന് നിര്‍ദ്ദേശം നല്‍കുന്നതിന്റെ റെക്കോര്‍ഡ് തന്റെ കൈവശമുണ്ടെന്ന് സംവിധായകന്‍ ബാലചന്ദ്രകുമാര്‍ ഇന്നലെ വെളിപ്പെടുത്തി. ആ ശബ്ദസന്ദേശം താന്‍ അന്വേഷണ സംഘത്തിന് കൈമാറിയിട്ടുണ്ട്. ആ ശബ്ദസംഭാഷണം താന്‍ പുറത്തുവിടുമെന്നും ബാലചന്ദ്ര കുമാര്‍ വ്യക്തമാക്കി.

ബൈജു പൗലോസിനെ ട്രക്കിടിച്ച് കൊലപ്പെടുത്തണമെന്നാണ് ദിലീപ് കൊടുത്ത നിര്‍ദേശം. ദിലീപ് രക്ഷപ്പെടാനാണ് ഈ കള്ളങ്ങളെല്ലാം പറയുന്നത്. കേസ് ജയിക്കുമെന്ന പൂര്‍ണ വിശ്വാസം തനിക്കുണ്ട്. താന്‍ ഗൂഢാലോചന നടത്തിയെങ്കില്‍ അതിന്റെ തെളിവ് ദിലീപ് പുറത്തുവിടട്ടേയെന്നും ബാലചന്ദ്രകുമാര്‍ പറഞ്ഞു.

എന്നാല്‍ ദിലീപിന്റെ അഭിഭാഷകരുടെ വാദം മറ്റൊരുതരത്തിലാണ് .

ബാലചന്ദ്രകുമാറിന്റെ മൊഴി മാത്രം വിശ്വസിച്ച് മുന്നോട്ട് പോകരുെതെന്നാണ് ദിലീപ് വാദിക്കുന്നത്. എഫ്‌ഐആര്‍ ഇടാന്‍ വേണ്ടി പൊലീസ് ബാലചന്ദ്രകുമാറിന്റെ പുതിയ സ്റ്റേറ്റ്‌മെന്റ് എടുക്കുകയായിരുന്നുവെന്ന് ദിലീപ് വാദിച്ചു. ചില 161 സ്റ്റേറ്റ്‌മെന്റുകള്‍ വിശ്വാസത്തില്‍ എടുക്കരുത് എന്ന് ദിലീപ് കോടതിയില്‍ ആവശ്യപ്പെട്ടു.

എ വി ജോര്‍ജിന്റെ വീഡിയോ കണ്ടിട്ടാണ് ദിലീപ്, 'നിങ്ങള്‍ അനുഭവിക്കും' എന്ന് പറഞ്ഞതെന്നാണ് ബാലചന്ദ്രകുമാറിന്റെ മൊഴി. പക്ഷേ അന്ന് എവി ജോര്‍ജ് അന്വേഷണം സംഘത്തിലില്ലെന്നും ദിലീപ് വാദിച്ചു. സോജന്‍ ,സുദര്‍ശന്‍ എന്നിവര്‍ക്ക് നല്ല ശിക്ഷ ആയിരിക്കും കിട്ടുന്നത് എന്നും ദിലീപ് പറഞ്ഞതായി മൊഴിയില്‍ ഉണ്ടെന്ന് ദിലീപിന്റെ അഭിഭാഷകന്‍ കോടതിയില്‍ വാദിച്ചു. മുമ്പ് പറഞ്ഞതിലും ഇപ്പോള്‍ പറയുന്നതിലും വൈരുദ്ധ്യമുണ്ടെന്നാണ് വാദം. ഇതെല്ലാം നിര്‍ണായക വാദങ്ങളാണ് .

കെ.രാമന്‍പിള്ളയുടെ മുന്നില്‍ ഹൈക്കോടതി പോലും കണ്‍ ഫ്യൂഷനിലാണ്. അത്രമേല്‍ ശക്തമാണ് രാമന്‍പിള്ളയുടെ വാദം. വിധി നീണ്ടുപോകാനുള്ള കാരണവും ഇതുതന്നെയാണ്.