പോലീസുകാർ പിടിക്കാൻ ശ്രമിക്കുന്നതിനിടയിൽ തോക്കിൽ പിടിവലി നടത്തി. പ്രതിയുടെ ആക്രമണത്തിൽ എസ് ഐ അടക്കം നാല് പൊലീസുകാര്‍ക്ക് പരിക്ക്. പിടിവലിക്കിടെ തോക്കില്‍ നിന്നും വെടിയുതിര്‍ന്നതും പരിഭ്രാന്തി പടർത്തുകയും ചെയ്തു.

ഭീകരമായ സംഭവം കൊല്ലം പത്തനാപുരത്താണ് നടന്നത്. ഒട്ടേറെ കേസുകളില്‍ പ്രതിയായ പുനലൂര്‍ മണിയാര്‍ ചരുവിള വീട്ടില്‍ മുകേഷ്, പുന്നലയിലെ ഭാര്യ വീട്ടില്‍ എത്തി എന്നറിഞ്ഞാണ് പൊലീസ് പിടികൂടാന്‍ എത്തിയത്.

പൊലീസ് മുകേഷിനെ അറസ്റ്റ് ചെയ്യുന്നതിനിടെ ഇയാള്‍ പൊലീസുകാരന്റെ കഴുത്തില്‍ കത്തിവയ്ക്കുകയായിരുന്നു. തുടര്‍ന്ന് എസ് ഐ തോക്ക് ചൂണ്ടി. പിന്നാലെ തോക്കിന് വേണ്ടി പ്രതി പിടിത്തമിടുകയും സംഘര്‍ഷത്തിനിടെ വെടി പൊട്ടുകയുമായിരുന്നു. മുകേഷിന്റെ മുഖത്ത് കൂടി ഉരസിയ നിലയിലാണ് വെടിയുണ്ട പുറത്തേക്ക് തെറിച്ചത്.

നാട്ടുകാരുടെ സഹായത്തോടെയാണ് പൊലീസ് ഇയാളെ കീഴ്‌പ്പെടുത്തിയത്. പ്രതിയും പരിക്കേറ്റ പൊലീസുകാരും നിലവില്‍ പുനലൂര്‍ താലൂക്കാശുപത്രിയില്‍ ചികിത്സയിലാണ്. ഇരുപത്തിയഞ്ചിലധികം കേസുകളില്‍ പ്രതിയാണ് ഇയാളെന്ന് പൊലീസ് വ്യക്തമാക്കി.