തെറ്റ് ചെയ്തത് സൈക്യാട്രിസ്റ്റാണൊ സൈക്കോളജിസ്റ്റാണോ എന്നുള്ളതിന് പ്രാധാന്യമില്ല. ഇതിൽ ഏത് വിഭാഗം തെറ്റ് ചെയ്താലും ശിക്ഷിക്കപ്പെടേണ്ടതാണെന്നുള്ളതിന് ഒരു സംശയവുമില്ല . പക്ഷേ ആര് ആരാണ് എന്ത് എന്താണ് എന്ന് കൃത്യമായി നാം അറിഞ്ഞിരിക്കണമെന്ന് ഡോ. സുൽഫി നൂഹ്. അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ;

ശിക്ഷിക്കപ്പെട്ടത് മെഡിക്കൽ ഡോക്ടറൊ ? തെറ്റ് ചെയ്തത് സൈക്യാട്രിസ്റ്റാണെങ്കിലും സൈക്കോളജിസ്റ്റാണെങ്കിലും ശിക്ഷിക്കപ്പെടേണ്ടത് തന്നെ. പക്ഷേ സൈക്യാട്രിസ്റ്റ് ആരാണ് , സൈക്കോളജിസ്റ്റ് ആരാണ് എന്ന് അറിഞ്ഞേ തീരൂ.

ഒരേ രംഗത്ത് പ്രവർത്തിക്കുന്നെങ്കിലും, രണ്ടും തമ്മിൽ അജഗജാന്തരം. സൈക്യാട്രിസ്റ്റ് അഥവാ മനോരോഗ വിദഗ്ധൻ എന്നാൽ മെഡിക്കൽ ബിരുദമുള്ള ഡോക്ടർ . കുറച്ചുകൂടി കൂടി വ്യക്തമായി പറഞ്ഞാൽ, എം ബി ബി എസ് ഡിഗ്രിയും സൈക്യാട്രി അഥവാ മനൊരോഗചികിത്സ വിഭാഗത്തിൽ പോസ്റ്റ് ഗ്രാജുവെററ് ഡിപ്ലോമയോ ഡിഗ്രിയൊ പാസായ ഒരു ഫിസിഷ്യൻ.

അതായത് കുറഞ്ഞത് ഒരു -എട്ടുകൊല്ലം - മെഡിക്കൽ വിദ്യാഭ്യാസം നടത്തിയ ബിരുദാനന്തരബിരുദമുള്ള ഒരു മെഡിക്കൽ ഡോക്ടർ. ഇനി സൈക്കോളജിസ്റ്റൊ? മൂന്നുകൊല്ലം പഠനം. അടിസ്ഥാനപരമായി ഒരു സൈക്യാട്രി ഡോക്ടറുടെ നിർദ്ദേശപ്രകാരം കൗൺസിലിംഗ് നടത്തുന്ന ഒരു വിഭാഗം ആരോഗ്യപ്രവർത്തകർ. ഇങ്ങനെ വിവിധ തലങ്ങളിലുള്ള ആരോഗ്യപ്രവർത്തകരുടെ സേവനം ആരോഗ്യരംഗത്ത് ആവശ്യമാണെന്ന് വിസ്മരിക്കുന്നില്ല.

ആശുപത്രികളിൽ ഡോക്ടർമാരുടെ നിർദേശപ്രകാരം ചികിത്സയിലെ പ്രധാന പങ്കു വഹിക്കുന്ന വിഭാഗമാണ് നഴ്സുമാർ. അതുപോലെ മറ്റൊരു വിഭാഗമാണ് സൈക്കോളജിസ്റ്റുകൾ. ഈ വിഭാഗത്തിലെ ചില ആൾക്കാർ ഒരു പി എച്ച് ഡി ഏതെങ്കിലും യൂണിവേഴ്സിറ്റിയിൽ നിന്നും സംഘടിപ്പിച്ച് പേരിനു മുൻപിൽ ഡോക്ടർ എന്ന് എഴുതി ചേർക്കും ഇങ്ങനെ മെഡിക്കൽ ഡോക്ടറാണ് എന്ന് തെറ്റിദ്ധരിപ്പിക്കുന്ന തരത്തിൽ പേരുകൾ പ്രദർശിപ്പിക്കുന്നത് തീർത്തും സ്വീകാര്യമല്ല തന്നെ.

തെറ്റ് ചെയ്തത് സൈക്യാട്രിസ്റ്റാണൊ സൈക്കോളജിസ്റ്റാണോ എന്നുള്ളതിന് പ്രാധാന്യമില്ല. ഇതിൽ ഏത് വിഭാഗം തെറ്റ് ചെയ്താലും ശിക്ഷിക്കപ്പെടേണ്ടതാണെന്നുള്ളതിന് ഒരു സംശയവുമില്ല . പക്ഷേ ആര് ആരാണ്  എന്ത് എന്താണ് എന്ന് കൃത്യമായി നാം അറിഞ്ഞിരിക്കണം. ഒന്നുകൂടി പറയാം. സൈക്യാട്രിസ്റ്റ് മെഡിക്കൽ ഡോക്ടർ. സൈക്കോളജിസ്റ്റ് സൈക്യാട്രി ഡോക്ടറുടെ നിർദ്ദേശപ്രകാരം കൗൺസിലിംഗ് കൊടുക്കേണ്ട ഒരു ആരോഗ്യ പ്രവർത്തകൻ. രണ്ടും രണ്ട്. ഡോ സുൽഫി നൂഹു.