ചെങ്ങന്നൂര്‍ കോടുകുളഞ്ഞിയില്‍ വൃദ്ധദമ്പതികളെ ബംഗ്ലാദേശ് സ്വദേശികള്‍ കൊലപ്പെടുത്തിയ കേസില്‍ ഒന്നാംപ്രതി ലബിലു ഹസന് വധശിക്ഷയും ഇരട്ട ജീവപര്യന്തവും. രണ്ടാം പ്രതി ജൂവല്‍ ഹസന് മൂന്നു ജീവപര്യന്തമാണ് ശിക്ഷ. ഇരുവര്‍ക്കും നാലു ലക്ഷം രൂപ വീതം പിഴയും വിധിച്ചു. മാവേലിക്കര അഡി. ജില്ലാ കോടതി- 2 ജഡ്ജി കെന്നത്ത് ജോര്‍ജാണ് ഉത്തരവിട്ടത്. അപൂര്‍വങ്ങളില്‍ അപൂര്‍വമായ കേസാണെന്നും 110 പേജുള്ള വിധി ന്യായത്തില്‍ കോടതി ചൂണ്ടിക്കാട്ടി.

ചെങ്ങന്നൂര്‍ കോടുകുളഞ്ഞി കരോട് ആഞ്ഞിലിമൂട്ടില്‍ എ പി ചെറിയാന്‍ (കുഞ്ഞുമോന്‍, -76), ഭാര്യ ഏലിക്കുട്ടി ചെറിയാന്‍ (ലില്ലി-, 68) എന്നിവരെ 2019 നവംബര്‍ 11 ന് ബംഗ്ലാദേശികളായ ലബിലു ഹസന്‍ (39), ജൂവല്‍ ഹസന്‍ (24) എന്നിവര്‍ ചേര്‍ന്ന് കൊലപ്പെടുത്തിയെന്നാണ് കേസ്.

കൊലചെയ്യുമ്പോള്‍ രണ്ടാം പ്രതി ജൂവല്‍ ഹസന്റെ പ്രായം കണക്കിലെടുത്താണ് തൂക്കുകയറില്‍ നിന്ന് ഒഴിവായത്. പിഴത്തുക കൊല്ലപ്പെട്ട ദമ്പതികളുടെ മക്കളായ ബിന്ദു റെജുവിനും ബിപു ചെറിയാനും പ്രതികള്‍ നല്‍കണം. ബിന്ദു കേസിലെ 48-ാം സാക്ഷിയും ബിപു 53-ാം സാക്ഷിയുമാണ്. പിഴ ഒടുക്കിയില്ലെങ്കില്‍ രണ്ടു വര്‍ഷം വീതം അധികതടവും പ്രതികള്‍ അനുഭവിക്കണം.

അതേസമയം മാവേലിക്കര കോടതിയുടെ ചരിത്രത്തിലെ സുപ്രധാന വിധികളിലൊന്നാണ് അഡീ. ജില്ലാ കോടതി- 2 ജഡ്ജി കെന്നത്ത് ജോര്‍ജ് പ്രസ്താവിച്ചത്. ഏലിക്കുട്ടിയെ കൊന്നത് ഏറ്റവും ക്രൂരവും പ്രാകൃതവുമായ രീതിയിലായിരുന്നുവെന്ന് കോടതി നിരീക്ഷിച്ചു.

മണ്‍വെട്ടിയ്ക്ക് പറമ്പു കിളയ്ക്കുന്നത് പോലെയാണ് ഏലിക്കുട്ടിയുടെ മുഖം വെട്ടിപ്പൊളിച്ചത്. അതിക്രൂര മനസുള്ള ഒരാള്‍ക്കേ ഒരു സ്ത്രീയെ ഇത്ര ക്രൂരമായി കൊലപ്പെടുത്താന്‍ കഴിയൂ.

അണുകുടുംബങ്ങള്‍ക്കുള്ള ഒരു സന്ദേശമാകണം വിധി. മക്കള്‍ വിദേശത്തും പ്രായമായ മാതാപിതാക്കള്‍ നാട്ടില്‍ തനിച്ചും കഴിയുന്ന ഇത്തരം ധാരാളം കുടുംബങ്ങള്‍ സമൂഹത്തിലുണ്ട്.

പ്രതികള്‍ ഇന്ത്യയിലെത്തി 12 ദിവസത്തിനുള്ളിലാണ് കൊലപാതകം. കൊല്ലപ്പെട്ടവരുടെ ഭാഗത്തുനിന്ന് പ്രതികളോട് ശത്രുതയോ പ്രകോപനമോ ഉണ്ടായിരുന്നില്ല. 2012 മെയ് 31 ന് ശേഷം ഇതാദ്യമായാണ് ഇതേ കോടതിയില്‍ നിന്ന് ഒരു പ്രതിയെ വധശിക്ഷയ്ക്ക് വിധിക്കുന്നത്.

2011 ഒക്ടോബര്‍ 24 ന് മാവേലിക്കര ഓലകെട്ടിയമ്പലത്തില്‍, ജോലി കഴിഞ്ഞ് വീട്ടിലേക്ക് പോയ പെണ്‍കുട്ടിയെ കൊന്ന കേസില്‍ വിശ്വരാജ് എന്നയാളായിരുന്നു പ്രതി. ഇയാളുടെ വധശിക്ഷ പിന്നീട് ഹൈക്കോടതി ജീവപര്യന്തമായി കുറച്ചു.