അക്ഷയ തൃതീയ ഇന്ന് . ഐശ്വര്യത്തിന്റെ നാളുകളാണ് അക്ഷയതൃതീയ കൊണ്ട് അര്‍ഥമാക്കുന്നത്. സമ്പത്തിന്റെ ദേവതയായ ലക്ഷ്മി ദേവിയുടെ അനുഗ്രഹം അക്ഷയ തൃതീയ നാളില്‍ കൂടുതല്‍ ഉണ്ടാവുമെന്ന് കരുതുന്നു.

അക്ഷയ തൃതീയ ദിനം ദാന ധര്‍മ്മങ്ങള്‍ ചെയ്യാന്‍ ഉത്തമം എന്നും കരുതുന്നുണ്ട്. അക്ഷയതൃതീയ നാളില്‍ ചെയ്യുന്ന പുണ്യകര്‍മങ്ങള്‍ ഒരിക്കലും പാഴാകില്ല എന്നും വിശ്വസിക്കപ്പെടുന്നു. വൈശാഖ മാസത്തിലെ കൃഷ്ണപക്ഷം മൂന്നാം ദിവസമാണ് അക്ഷയതൃതീയ ആചരിക്കുന്നത്. ഈ വര്‍ഷം 2022 മെയ് 3 നാണ് ഇത്. സ്വര്‍ണ്ണവും വെള്ളിയും ഈ നാളില്‍ വാങ്ങുന്നത് ശുഭകരമായി കണക്കാക്കപ്പെടുന്നു.

സംസ്ഥാനത്തെ ജ്വല്ലറികളിലെല്ലാം ഈ വിശേഷ ദിനത്തിലെ വിപണനം ആരംഭിച്ചു കഴിഞ്ഞു. സ്വര്‍ണാഭരണങ്ങള്‍ വാങ്ങാന്‍ ശുഭ ദിനമായാണ് അക്ഷയതൃതീയ ദിനത്തെ കണക്കാക്കുന്നത്. അതിനാല്‍ത്തന്നെ രാജ്യത്തെ ഏറ്റവും ഉയര്‍ന്ന ഒറ്റദിന വ്യാപാരം നടക്കുന്നത് അക്ഷയ തൃതീയ നാളിലാണ്.

കഴിഞ്ഞ രണ്ടു വര്‍ഷങ്ങളില്‍ കൊവിഡ് മൂലം ഉണ്ടായ നഷ്ടങ്ങളുടെ കണക്ക് തീര്‍ക്കാന്‍ കൂടിയാണ് വ്യാപാരികള്‍ തയ്യാറെടുക്കുന്നത്. സ്വര്‍ണവില കഴിഞ്ഞ ഒരു മാസത്തെ ഏറ്റവും കുറഞ്ഞ നിരക്കിലാണ് എന്നുള്ളതും വ്യാപാരികള്‍ക്ക് അനുകൂലമാകും.

വലിയ പ്രതീക്ഷയാണ് ഈ ഏകദിന കച്ചവടത്തില്‍ വ്യാപരികള്‍ക്കുള്ളത്. 2020, 2021 വര്‍ഷങ്ങളില്‍ കൊവിഡ് 19 പകര്‍ച്ചവ്യാധി തീര്‍ത്ത നിയന്ത്രണങ്ങള്‍ അക്ഷയതൃതീയ വിപണിയെ ശ്വാസംമുട്ടിച്ചിരുന്നു. ഓണ്‍ലൈന്‍ വ്യാപാരങ്ങളാണ് ഈ വര്‍ഷങ്ങളില്‍ നടന്നത്. നിയന്ത്രണങ്ങളില്‍ ഇളവ് വന്നതോടുകൂടി അതില്‍ നിന്നുള്ള ഒരു തിരിച്ചു വരവിനാണ് ഇപ്പോള്‍ വിപണി ഒരുങ്ങുന്നത്. മുന്‍കൂര്‍ ബുക്കിങ് പ്രകാരമുള്ള കച്ചവടങ്ങള്‍ എല്ലാ ജ്വല്ലറികളിലും ആരംഭിച്ചു കഴിഞ്ഞു.

സാധാരണയില്‍ നിന്ന് വ്യത്യസ്തമായി ഇത്തവണ സ്വര്‍ണവിലയില്‍ കുറവുണ്ടായത് സ്വര്‍ണ വ്യാപാരികള്‍ക്ക് വളരെയധികം പ്രതീക്ഷ നല്‍കുന്നുണ്ട്. നിരവധി ഓഫറുകളും, പുതിയ ഡിസൈനുകളും പല ജ്വല്ലറികളിലും നിരന്നുകഴിഞ്ഞു. സ്വര്‍ണ വിഗ്രഹം, സ്വര്‍ണ നാണയങ്ങള്‍ ചെറിയ ആഭരണങ്ങള്‍ എന്നിവയാണ് ഭൂരിഭാഗവും. ലക്ഷ്മി ലോക്കറ്റുകള്‍, മൂകാംബികയില്‍ പൂജിച്ച ലോക്കറ്റുകള്‍, ഗുരുവായൂരപ്പന്‍ ലോക്കറ്റുകള്‍ എന്നിവയ്ക്കും വന്‍ ഡിമാന്റാണ്. ദേവീദേവന്മാരുടെ ലോക്കറ്റുകള്‍, നാണയങ്ങള്‍ എന്നിവയോടാണ് ഈ ദിനത്തില്‍ ഉപഭോക്താക്കള്‍ക്ക് ഏറെ പ്രിയം.

അതേസമയം സംസ്ഥാനത്ത് ഇന്ന് സ്വര്‍ണവിലയില്‍ മാറ്റമില്ല. ഒരു പവന്‍ സ്വര്‍ണത്തിന്റെ വിപണി വില 37760 രൂപയാണ്. ഇന്നലെ 160 രൂപയുടെ കുറവാണ് സ്വര്‍ണ വിലയിലുണ്ടായത്.

കഴിഞ്ഞ അഞ്ച് ദിവസത്തിനുള്ളില്‍ 1000 രൂപയുടെ ഇടിവാണ് സ്വര്‍ണവിലയില്‍ ഉണ്ടായത്. ഏപ്രില്‍ 30 ന് രണ്ട് തവണയായി 920 രൂപയുടെ കുറഞ്ഞിരുന്നു. ഏപ്രിലിലെ ഏറ്റവും കുറഞ്ഞ നിരക്കിലാണ് അന്ന് വിപണനം അവസാനിപ്പിച്ചത്. സംസ്ഥാനത്ത് ഒരു ഗ്രാം 22 കാരറ്റ് സ്വര്‍ണത്തിന്റെ വിലയിലും ഇന്ന് മാറ്റമില്ല. ഒരു ഗ്രാം 22 കാരറ്റ് സ്വര്‍ണത്തിന്റെ വിപണി വില 4720 രൂപയാണ്.

സംസ്ഥാനത്ത് വെള്ളിയുടെ വിലയിലും മാറ്റമില്ല. വെള്ളിയുടെ വിപണി വില 69 രൂപയാണ്. ഇന്നലെ വെള്ളിയുടെ വിലയും കുറഞ്ഞിരുന്നു. ഒരു രൂപയുടെ കുറവാണ് ഉണ്ടായത്.