ദേശീയതലത്തില് നാണം കെട്ടു... രാഹുല് ഗാന്ധി ഒന്നും ചെയ്യുന്നില്ലെന്ന ബിജെപിക്കാരുടേയും സ്മൃതി ഇറാനിയുടേയും പരിഹാസത്തിന് എസ്എഫ്ക്കാര് അടിവരയിട്ടു; രാഹുലിന്റെ ഓഫീസ് തല്ലിത്തകര്ത്തത് ദേശീയതലത്തില് വലിയ വാര്ത്ത; ഒരുങ്ങുന്നത് വമ്പന് പ്രതിഷേധറാലി
തന്റെ വയനാട്ടിലെ ഓഫീസ് എസ്എഫ്ഐ പിള്ളേര് കയറി നിരങ്ങിയതില് രാഹുല് ഗാന്ധി കടുത്ത ദേഷ്യത്തിലാണ്. ദേശീയ മാധ്യമങ്ങള് വലിയ രീതിയില് വാര്ത്ത നല്കിയതോടെ രാഹുല് എംപിയെന്ന രീതിയില് പരാജയമാണെന്നാണ് വരുന്നത്. വയനാട് നോട്ടമിടുന്ന ബിജെപിക്കാര്ക്കും സ്മൃതി ഇറാനിയ്ക്കും ഇത് വലിയ സന്തോഷമാണ് തരുന്നത്. ഇഡി ഓഫീസ് കയറിയിറങ്ങുമ്പോള് പിള്ളേരുടെ പ്രതിഷേധം നാണക്കേടിലായിരിക്കുകയാണ്.
രാഹുല് ഗാന്ധിയുടെ ദേഷ്യം തണുപ്പിക്കാന് നേതാക്കള് തീരുമാനിച്ചു കഴിഞ്ഞു. രാഹുല് ഗാന്ധി എംപിയുടെ ഓഫീസ് അടിച്ചുതകര്ത്തതില് പ്രതിഷേധിച്ച് വയനാട്ടില് ഇന്ന് യുഡിഎഫ് റാലിയും പ്രതിഷേധയോഗവും നടത്തും. ഉച്ചക്ക് രണ്ട് മണിക്ക് രാഹുല് ഗാന്ധി എംപിയുടെ ഓഫീസ് പരിസരത്ത് നിന്നും ആയിരക്കണക്കിന് പേരെ അണിനിരത്തി റാലി നടത്താനാണ് തീരുമാനം. തുടര്ന്ന് കല്പ്പറ്റ ടൗണില് പ്രതിഷേധയോഗവും നടത്തും.
എഐസിസി ജനറല് സെക്രട്ടറി കെ സി വേണുഗോപാല്, പ്രതിപക്ഷ നേതാവ് വി ഡി സതീശന്, എംപിമാരായ കൊടിക്കുന്നില് സുരേഷ്, എം കെ രാഘവന്, കെപിസിസി വര്ക്കിംഗ് പ്രസിഡന്റ് അഡ്വ. ടി സിദ്ദിഖ് അടക്കമുള്ള കോണ്ഗ്രസിന്റെയും യുഡിഎഫിന്റെയും സംസ്ഥാന നേതാക്കള് റാലിയില് പങ്കെടുക്കും. രാഹുല് ഗാന്ധിയുടെ ഓഫീസ് ആക്രമിച്ച നടപടിയെ സംസ്ഥാനത്തും ദില്ലിയിലും വരെ വലിയ പ്രതിഷേധങ്ങള്ക്കാണ് കാരണമായത്.
കോണ്ഗ്രസ് ദേശീയ നേതാക്കള് ഉള്പ്പടെയുള്ളവര് ആക്രമണത്തിന് എതിരെ രംഗത്ത് വന്നു. ഓഫീസ് ആക്രമണം ഭീരുത്വമെന്ന് രാജ്യസഭ പ്രതിപക്ഷ നേതാവ് മല്ലികാര്ജ്ജുന് ഖാര്ഗെ പ്രതികരിച്ചു. രാഷ്ട്രീയ വൈരാഗ്യത്തിന്റെ ഏറ്റവും നീചമായ സ്ഥിതിയെന്ന് രാജസ്ഥാന് മുഖ്യമന്ത്രി അശോക് ഗെലോട്ടും പ്രതികരിച്ചു. രാഷ്ട്രീയത്തില് അക്രമത്തിന് സ്ഥാനമില്ലെന്ന് കേരളത്തിന്റെ ചുമതലയുള്ള എഐസിസി ജനറല് സെക്രട്ടറി താരിഖ് അന്വറിന്റെ പ്രതികരണം.
അതേസമയം സമരം നടത്തിയ എസ്എഫ്ഐക്കാര് വെട്ടിലായി. ഇന്നലെ തന്നെ വയനാട്ടില് രാഹുല് ഗാന്ധിയുടെ എംപി ഓഫീസ് ആക്രമിച്ച എസ്എഫ്ഐ നടപടിയെ സിപിഎം തള്ളിയിരുന്നു. രാഹുല് ഗാന്ധിയുടെ ഓഫീസിലേക്ക് മാര്ച്ച് നടത്തേണ്ട ഒരാവശ്യവും ഇല്ലെന്ന് ഇടതുമുന്നണി കണ്വീനര് ഇ പി ജയരാജന് പറഞ്ഞു. എന്താണ് നടന്നതെന്ന് അറിയില്ലെന്നും ഇക്കാര്യം പരിശോധിച്ചു പറയാമെന്നും ഇപി പറഞ്ഞു.
രാഹുല് ഒരു എംപി മാത്രമാണെന്നും ഇ പി ജയരാജന് പറഞ്ഞു. മുഖ്യമന്ത്രി പിണറായി വിജയനും എല്ഡിഎഫ് കണ്വീനറായ ഇപി ജയരാജനും മാര്ച്ചിനേയും അക്രമത്തേയും തള്ളിപ്പറഞ്ഞതോടെ വിഷയത്തില് എസ്എഫ്ഐ ഒറ്റപ്പെട്ട അവസ്ഥയിലായി. അക്രമത്തെക്കുറിച്ച് പ്രതികരിച്ച സിപിഎം വയനാട് ജില്ലാ സെക്രട്ടറി ഗഗാറിനും എസ്എഫ്ഐയെ ന്യായീകരിക്കാതെയുള്ള പ്രതികരണമാണ് നടത്തിയത്.
എസ്എഫ്ഐ മാര്ച്ചിനെക്കുറിച്ച് പൊലീസിന് അറിവുണ്ടായിരുന്നുവെങ്കിലും ഇങ്ങനെയൊരു അക്രമത്തിലേക്ക് കാര്യങ്ങള് നീങ്ങുമെന്ന് ആരും കരുതിയില്ല. അക്രമത്തിന് സാധ്യതയുണ്ടെന്ന തരത്തില് ഇന്റലിജന്സ് റിപ്പോര്ട്ടുകളൊന്നുമുണ്ടായിരുന്നില്ല. ആക്രമണത്തിന് പിന്നാലെ പിണറായി വിജയനെ ലക്ഷ്യമിട്ട് കോണ്ഗ്രസ് നേതാക്കള് പ്രതികരിക്കാന് തുടങ്ങിയതോടെ എസ്എഫ്ഐ വെട്ടിലായ സ്ഥിതിയാണ്.
വയനാട് ജില്ലാ കമ്മിറ്റിയുടെ നേതൃത്വത്തില് നടന്ന സമരവും തുടര്ന്നുണ്ടായ ആക്രമണവും അംഗീകരിക്കാനാവില്ലെന്നും തള്ളിപ്പറയുന്നുവെന്നും എസ്എഫ്ഐ സംസ്ഥാന നേതൃത്വം ഇന്നലെ വ്യക്തമാക്കി. സംരക്ഷിത വനമേഖലയുടെ ബഫര് സോണിനെ സംബന്ധിച്ചുള്ള സുപ്രീം കോടതിയുടെ ഉത്തരവുമായി ബന്ധപ്പെട്ട് ഉയര്ന്നുവന്ന വിഷയം ഏറ്റെടുത്ത് സമരം സംഘടിപ്പിക്കാന് എസ്എഫ്ഐയുടെ സംസ്ഥാന കമ്മിറ്റി തീരുമാനിച്ചിട്ടില്ല.
രാഹുല് ഗാന്ധിയുടെ ഓഫീസിലേക്ക് എസ്എഫ്ഐ വയനാട് ജില്ലാ കമ്മിറ്റിയുടെ നേതൃത്വത്തില് സംഘടിപ്പിച്ച മാര്ച്ചിന് സംസ്ഥാന നേതൃത്വത്തിന്റെ അറിവോ സമ്മതമോ ഉണ്ടായിരുന്നില്ല. ഇതുമായി ബന്ധപ്പെട്ട് എന്താണ് സംഭവിച്ചത് എന്ന് സംഘടനാപരമായി പരിശോധിച്ച് സമരത്തിന് നേതൃത്വം നല്കിയ പ്രവര്ത്തകര്ക്ക് നേരെ ശക്തവും മാതൃകാപരവുമായ സംഘടനാ നടപടി സ്വീകരിക്കുമെന്ന് സംസ്ഥാന കമ്മിറ്റി പറഞ്ഞു.
https://www.facebook.com/Malayalivartha
