രാഹുല്‍ ഗാന്ധിക്ക് വിസിറ്റ് നടത്താനുള്ള സ്ഥലമല്ല വയനാട് എന്ന് സ്ഥാപിക്കാനാണ് എസ്എഫ്‌ഐക്കാര്‍ ശ്രമിച്ചത്. അതിനായി വൈറലാകുന്ന രീതിയില്‍ പ്ലാന്‍ തയ്യാറാക്കുകയും ചെയ്തു. പടിക്കെട്ടു കയറി ഓഫിസിലെത്തി എംപിയുടെ കസേരയില്‍ വാഴ വച്ചശേഷം ഫോട്ടോയെടുത്ത് സമൂഹമാധ്യമങ്ങളില്‍ വൈറലാക്കുകയായിരുന്നുവത്രെ പ്ലാന്‍. എന്നാല്‍, ഓഫിസിനു മുന്നിലെ ഷട്ടര്‍ ഇട്ട് പൊലീസ് കാവലേര്‍പ്പെടുത്തിയതോടെ ആ പദ്ധതി പൊളിഞ്ഞു.

ഇതോടെ പെട്ടെന്ന് മാറിമറിഞ്ഞു. പിന്നീടാണു പ്രവര്‍ത്തകര്‍ വാഴത്തൈയുമായി കെട്ടിടത്തിനു മുകളിലേക്കു വലിഞ്ഞുകയറിയത്. ഏതുവിധേനയും ഓഫിസിനുള്ളിലെത്താന്‍ ശ്രമിച്ചു. ജനലിനുള്ളിലൂടെ വലിഞ്ഞുകയറിയ ചിത്രം കൂടി വന്നതോടെ എല്ലാം മാറി. പിന്നെ കണ്ടത് സിപിഎം പോലും എസ്എഫ്‌ഐയെ തള്ളിപ്പറയുന്നതാണ്.

അതേസമയം രാഹുല്‍ ഗാന്ധിയുടെ ഓഫീസ് എസ് എഫ് ഐ പ്രവര്‍ത്തകര്‍ ആക്രമിച്ച സംഭവത്തില്‍ ഇന്നും കോണ്‍ഗ്രസ് യൂത്ത് കോണ്‍ഗ്രസ് പ്രവര്‍ത്തകരുടെ പ്രതിഷേധം തുടരും. സംസ്ഥാന വ്യാപകമായി തന്നെ ഇന്നലെ വലിയ തോതിലുള്ള പ്രതിഷേധം ഉയര്‍ന്നിരുന്നു. ചിലയിടങ്ങളില്‍ പ്രതിഷേധം അക്രമാസക്തമാകുകയും ചെയ്തു. മന്ത്രിമാര്‍ക്കെതിരെ കരിങ്കൊടി കാണിച്ചുള്ള പ്രതിഷേധവും ഇന്നലെ ഉണ്ടായി.

ഇന്നും സംസ്ഥാന വ്യാപകമായി പ്രതിഷേധം തുടരും. രാഹുലിന്റെ തല്ലിത്തകര്‍ത്തവര്‍ക്ക് മുന്നറിയിപ്പുമായി കല്‍പ്പറ്റയില്‍ കോണ്‍ഗ്രസ് ഇന്നലെ വലിയ പ്രതിഷേധ റാലി സംഘടിപ്പിച്ചിരുന്നു. തിരിച്ചടിക്കാന്‍ തീരുമാനിച്ചാല്‍ ആരും കാണില്ലെന്നായിരുന്നു കെ സുധാകരന്റെ മുന്നറിയിപ്പ്. ഓഫീസ് തകര്‍ത്തത് മുഖ്യമന്ത്രിയുടെ അറിവോടെയെന്ന് പ്രതിപക്ഷ നേതാവ് വി ഡി സതീശന്‍ ആരോപിച്ചു.

അതേസമയം പ്രതിരോധം തീര്‍ക്കാന്‍ സിപിഎമ്മും തീരുമാനിച്ചു. രാഹുല്‍ ഗാന്ധിയുടെ ഓഫീസ് ആക്രമിക്കപ്പെട്ടതിന് പിന്നാലെയുള്ള യുഡിഎഫ് പ്രതിഷേധം വലിയ ആക്രമണങ്ങളായി മാറുന്നുവെന്ന പ്രചാരണവുമായി പ്രതിരോധിക്കാനുള്ള തീരുമാനത്തിലാണ് എല്‍ ഡി എഫ്. യു ഡി എഫ് ആക്രമണങ്ങള്‍ക്കെതിരെ ബഹുജനങ്ങളെ അണിനിരത്തി പ്രതിഷേധം സംഘടിപ്പിക്കുമെന്ന് എല്‍ഡിഎഫ് തീരുമാനിച്ചിട്ടുണ്ട്. സമാധാനപരമായി പ്രതിഷേധിക്കാനാണ് ആഹ്വാനം.

യുഡിഎഫിന്റേത് ആക്രമണകാരികളെ മാലയിട്ട് സ്വീകരിക്കുന്ന നിലപാടാണെന്ന് എല്‍ഡിഎഫ് കണ്‍വീനര്‍ ഇ പി ജയരാജന്‍ അഭിപ്രായപ്പെട്ടു. കലാപം അഴിച്ചു വിടാന്‍ യുഡിഎഫ് ശ്രമിക്കുകയാണെന്ന് ആരോപിച്ച ജയരാജന്‍, ഇന്ന് മൂന്ന് മണിക്ക് കല്‍പറ്റയില്‍ സിപിഎം പ്രതിഷേധ മാര്‍ച്ച് സംഘടിപ്പിക്കുമെന്നും വ്യക്തമാക്കിയിട്ടുണ്ട്. വയനാട്ടില്‍ കോണ്‍ഗ്രസ് എം.പിയുടെ ഓഫീസിലേക്ക് എസ്.എഫ്.ഐ നടത്തിയ പ്രതിഷേധ മാര്‍ച്ചും തുടര്‍ന്നുണ്ടായ സംഭവങ്ങളും സി.പി.ഐ.എമ്മും ഇടതുപക്ഷ ജനാധിപത്യമുന്നണിയും മുഖ്യമന്ത്രിയും എല്ലാം ശക്തമായി അപലപിച്ചിട്ടുള്ളതാണ്.

വിദ്യാര്‍ത്ഥി സംഘടനയുടെ ഭാഗത്ത് നിന്ന് ഉണ്ടാകാന്‍ പാടില്ലാത്തതാണ് നടന്നത്. അവര്‍ക്കെതിരെ പോലീസും ശക്തമായ നടപടികള്‍ സ്വീകരിച്ചുവരികയാണ്. എന്നാല്‍ ഈ സംഭവത്തെ മറയാക്കിക്കൊണ്ട് കേരളത്തിലുടനീളം കോണ്‍ഗ്രസും യൂത്ത് കോണ്‍ഗ്രസും കെ.എസ്.യുവും തങ്ങളുടെ ഗുണ്ടാ സംഘങ്ങളെ ഉപയോഗിച്ച് വലിയ അക്രമം നടത്തിക്കൊണ്ടിരിക്കുകയാണ്. ജനജീവിതം ദുസഹമാക്കിക്കൊണ്ടാണ് ഈ ഗുണ്ടാസംഘങ്ങള്‍ അഴിഞ്ഞാടുന്നത്.

പല സ്ഥലങ്ങളിലും വിദ്യാര്‍ത്ഥി സഖാക്കള്‍ക്ക് നേരെയും അക്രമം ഉണ്ടാകുന്നു. സംസ്ഥാനത്തിന്റെ ക്രമസമാധാനം ഇല്ലാതാക്കാന്‍ സംസ്ഥാനത്താകെ അക്രമങ്ങള്‍ നടത്തുകയാണ് കോണ്‍ഗ്രസ്. ക്രമസമാധാന പാലകരായ പോലീസിനേയും ഇക്കൂട്ടര്‍ അക്രമിക്കുന്നു. കോണ്‍ഗ്രസ് നേതൃത്വത്തിന്റെ പ്രോത്സാഹനത്തോടെയാണ് യൂത്ത് കോണ്‍ഗ്രസ് ഈ അഴിഞ്ഞാട്ടം. നടത്തുന്നത് എന്നത് ദൗര്‍ഭാഗ്യകരമാണ്.

കല്പറ്റയില്‍ പ്രതിപക്ഷ നേതാവിന്റെ വാര്‍ത്താ സമ്മേളനത്തില്‍ ദേശാഭിമാനിയുടെ ലേഖകന്‍ ഒരു ചോദ്യം ചോദിച്ചതിന്റെ ഭാഗമായി ആ ലേഖകനെ ഭീഷണിപ്പെടുത്തി. മാധ്യമ പ്രവര്‍ത്തകര്‍ പ്രതികരിച്ചപ്പോള്‍ അവര്‍ക്ക് നേരേയും ഭീഷണി മുഴക്കി. ഈ പത്രസമ്മേളനത്തിന് ശേഷം കല്പറ്റയിലെ ദേശാഭിമാനി ഓഫീസിന് നേരെ കോണ്‍ഗ്രസിന്റേയും യൂത്ത്‌കോണ്‍ഗ്രസിന്റേയും അക്രമം നടന്നു. ചോദ്യം ചോദിച്ചതിന്റെ പേരില്‍ പത്ര ഓഫീസിന് നേരേയും അക്രമം അഴിച്ചുവിടുന്നതാണ് കാണാനാകുന്നതെന്നും കുറ്റപ്പെടുത്തി.