നിയന്ത്രണം വിട്ട ബൈക്ക് കെ.എസ്.ആര്‍.ടി.സി. ബസിലിടിച്ച് യുവാക്കള്‍ക്ക് ദാരുണാന്ത്യം; ഹെല്‍മെറ്റ് ധരിച്ചിരുന്നെങ്കിലും വീഴ്ചയുടെ ആഘാതത്തില്‍ തകര്‍ന്നുപോയി, ബൈക്കിന്റെ മുന്‍ഭാഗവും പൂര്‍ണമായും തകര്‍ന്നു..
ബൈക്ക് കെ.എസ്.ആര്‍.ടി.സി. ബസിലിടിച്ച് യുവാക്കള്‍ക്ക് ദാരുണാന്ത്യം. പുത്തന്‍ചന്ത ചെപ്പള്ളില്‍ കിഴക്കതില്‍ ഷെരീഫാബീവിയുടെയും ഷാജഹാന്റെയും മകന്‍ എസ്.ഷഹന്‍ഷാ, വടക്കുംതല പറമ്പിമുക്ക് കോയിക്കലയ്യത്ത് വീട്ടില്‍ ബഷീറിന്റെയും റംലയുടെയും മകന്‍ സുധീര്‍ എന്നിവരാണ് മരിച്ചത്. ബൈക്ക് നിയന്ത്രണം വിട്ടതാണ് അപകടത്തിന് കാരണം എന്നാണ് ലഭിക്കുന്ന വിവരം.
ശനിയാഴ്ച ഉച്ചയ്ക്ക് പന്ത്രണ്ടേമുക്കാലോടെയാണ് അപകടം നടന്നത്. രാമന്‍കുളങ്ങര മേടയില്‍മുക്കിനു സമീപത്തായിരുന്നു അപകടം. ബൈക്ക് ഓടിച്ചിരുന്നത് സുധീറാണ്. ഇരുവരും കൊല്ലം ഭാഗത്തേക്ക് പോകുമ്പോള്‍ വാഹനങ്ങള്‍ കുരുക്കില്‍പ്പെട്ടതോടെ മറികടക്കാന്‍ ശ്രമിക്കവേയാണ് നിയന്ത്രണംവിട്ട് എതിര്‍ദിശയില്‍ വന്ന കെ.എസ്.ആര്‍.ടി.സി. ബസ്സുമായി ഇടിച്ചത്.
അതേസമയം ബസില്‍ ഇടിക്കുന്നതിന് മുമ്പ് തന്നെ ബൈക്കിന്റെ നിയന്ത്രണം വിടുകയും പിന്നിലിരുന്ന ഷഹന്‍ഷാ റോഡിലേക്ക് തെറിച്ചുവീഴുകയും ചെയ്തിരുന്നു. തൊട്ടുപിന്നിലുണ്ടായിരുന്ന കാറിനു മുന്നിലേക്കാണ് രണ്ടുപേരും വീണത്. രണ്ടുപേരും ഹെല്‍മെറ്റ് ധരിച്ചിരുന്നെങ്കിലും വീഴ്ചയുടെ ആഘാതത്തില്‍ തകര്‍ന്നുപോയി. ബൈക്കിന്റെ മുന്‍ഭാഗവും പൂര്‍ണമായും തകര്‍ന്നു.
പിന്നീട് കൂടിനിന്നവര്‍ ഇവരെ ജില്ലാ ആശുപത്രിയിലേക്ക് മാറ്റിയെങ്കിലും മരണം സംഭവിക്കുകയായിരുന്നു. ചിന്നക്കടയില്‍ ക്വയിലോണ്‍ മൊബൈല്‍സ് എന്ന സ്ഥാപനത്തില്‍ മൊബൈല്‍ ടെക്നീഷ്യന്‍ കോഴ്സ് പഠിച്ചുവരികയായിരുന്നു ഇരുവരും.
https://www.facebook.com/Malayalivartha
