ഷാജി കൈലാസ് സംവിധാനം ചെയ്ത് പൃഥ്വിരാജ് നായകനായെത്തുന്ന ചിത്രമാണ് കടുവ. റിലീസിന് തയാറെടുക്കുന്ന ചുത്രത്തിനായി ആരാധകര്‍ കട്ട വെയിറ്റിംഗിലാണ്. പൃഥ്വിരാജിന്റെ സിനിമ എന്നതിനുമപ്പുറം ചിത്രത്തില്‍ അതിഥിയായെത്തുന്ന നടനെ കാണാനും നലയാളികള്‍ കാത്തിരിക്കുകയാണ്. എന്നാല്‍ ഇപ്പോള്‍ പ്രേക്ഷകരെ നിരാശരാക്കിക്കൊണ്ടുള്ള വാര്‍ത്തയാണ് പുറത്തു വന്നിരിക്കുന്നത്.

കടുവയില്‍ നടന്‍ മോഹന്‍ലാലാണ് അതിഥി വേഷത്തില്‍ എത്തുന്നത് എന്നാണ് വാര്‍ത്തകള്‍ പുറത്തുവന്നിരുന്നത്. എന്നാല്‍ അക്കാര്യത്തില്‍ വെളിപ്പെടുത്തലുമായി രംഗത്ത് വന്നിരിക്കുകയാണ് സംവിധായകന്‍ ഷാജി കൈലാസ്.

'കടുവയില്‍ മോഹന്‍ലാലിനെ കൊണ്ടു വരണമെന്ന് ഞങ്ങള്‍ ആഗ്രഹിച്ചിരുന്നു. പക്ഷേ നടക്കാത്തതിനാല്‍ വേണ്ടെന്നു വച്ചു. ലാല്‍ ഈ ചിത്രത്തിലെ ഒരു സീനില്‍ പോലും പ്രത്യക്ഷപ്പെടുന്നില്ല.' എന്നായിരുന്നു ഷാജി കൈലാസ് പ്രമുഖ മാധ്യമത്തിന് നല്‍കിയ അഭിമുഖത്തില്‍ പറഞ്ഞത്.

'കടുവക്കുന്നേല്‍ കുറുവച്ചന്‍' എന്ന കഥാപാത്രമായിട്ടാണ് ചിത്രത്തില്‍ പൃഥ്വിരാജ് അഭിനയിക്കുന്നത്. എട്ട് വര്‍ഷത്തിന് ശേഷം ഷാജി കൈലാസ് സംവിധാന രംഗത്തേയ്ക്ക് മടങ്ങിയെത്തുന്ന ചിത്രം എന്ന പ്രത്യേകതയുള്ള കടുവയുടെ നിര്‍മ്മാണം പൃഥ്വിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്റെ മാജിക് ഫ്രെയിംസും ചേര്‍ന്നാണ്. ഒരു മാസ് എന്റര്‍ടെയ്‌നറായാണ് കടുവ ഒരുക്കിയിരിക്കുന്നത്. പൃഥ്വിരാജ് ചിത്രമായിരുന്ന ലൂസിഫറിലെ പോലെ കടുവയിലും വില്ലനായി അവതരിക്കുന്നത് ബോളിവുഡ് താരം വിവേക് ഒബ്റോയാണ്.

മാസ്റ്റേഴ്സ്, ലണ്ടന്‍ ബ്രിഡ്ജ് എന്നീ സിനിമകളുടെ രചയിതാവും ആദം ജോണിന്റെ സംവിധായകനുമായ ജിനു എബ്രാഹാമാണ് കടുവയുടെ തിരക്കഥയൊരുക്കിയിരിക്കുന്നത്.

ചിത്രത്തില്‍ സായ് കുമാര്‍, സിദ്ദിഖ്, ജനാര്‍ദ്ദനന്‍, വിജയരാഘവന്‍, അജു വര്‍ഗീസ്, ഹരിശ്രീ അശോകന്‍, രാഹുല്‍ മാധവ്, കൊച്ചുപ്രേമന്‍, സംയുക്ത മേനോന്‍, സീമ, പ്രിയങ്ക എന്നിവരും ശ്രദ്ധേയമായ കഥാപാത്രങ്ങളെ അവതരിപ്പിക്കുന്നുണ്ട്.

ഈ മാസം 30 നാണ് കടുവ തീയേറ്ററുകളിലെത്തുന്നത്..