കത്തിയമരുന്ന വീട്ടില്‍ നിന്ന് മക്കളെ രക്ഷപ്പെടുത്തിയശേഷം പ്രധാന രേഖകള്‍ വീണ്ടെടുക്കാനുള്ള ശ്രമത്തിനിടെ കേബിള്‍ ഓപ്പറേറ്ററിന് ദാരുണാന്ത്യം.

പന്‍വേലിലെ അകുര്‍ലി ഗ്രാമത്തിലാണ് ദാരുണസംഭവം നടന്നത്. രാജേഷ് താക്കൂര്‍ എന്ന 40കാരനാണ് മരിച്ചത്. കത്തിയമരുന്ന വീട്ടില്‍ നിന്ന് 16, 18 വയസ്സുള്ള തന്റെ പെണ്‍മക്കളെയും 11 വയസ്സുള്ള മകനെയും രക്ഷപ്പെടുത്തിയ ശേഷം തീയില്‍ കുടുങ്ങിയ ചില പ്രധാന രേഖകള്‍ വീണ്ടെടുക്കാനുള്ള ശ്രമത്തിനിടെയാണ് ദാരുണാന്ത്യമുണ്ടായത്. അസ്വാഭാവിക മരണത്തിന് ഖണ്ഡേശ്വര്‍ പോലീസ് കേസെടുത്തു.

രാവിലെ ഏഴ് മണിയോടെ താക്കൂര്‍ ഉറങ്ങുകയായിരുന്ന രണ്ടാം നിലയിലെ മുറിയിലാണ് തീപിടിത്തമുണ്ടായത്. ഒന്നാം നിലയിലെ മുറികളിലായിരുന്നു മക്കള്‍. ഭാര്യ അവരുടെ വീട്ടിലായിരുന്നു.

തീപിടിത്തത്തില്‍ നിന്ന് ഞെട്ടി ഉണര്‍ന്ന താക്കൂര്‍ തന്റെ കുട്ടികളെ സുരക്ഷിത സ്ഥാനത്തേക്ക് എത്തിച്ചു ഈ സമയം, നാട്ടുകാര്‍ അഗ്‌നിശമനസേനയെ അറിയിച്ചു. നാട്ടുകാരുടെ മുന്നറിയിപ്പ് അവഗണിച്ച് രേഖകള്‍ എടുക്കാനായി വീടിനുള്ളിലേക്ക് കയറിയതോടെയാണ് അപകടമുണ്ടായത്.

രാവിലെ 7.40 ഓടെ അഗ്‌നിശമന സേനയെത്തുമ്പോഴേക്കും ബംഗ്ലാവിന്റെ രണ്ടാം നിലയായ ഡ്രീം ഹോം പൂര്‍ണമായും കത്തിനശിച്ചിരുന്നു. രാത്രി മുഴുവന്‍ ചാര്‍ജിംഗിനായി സൂക്ഷിച്ചിരുന്ന ലാപ്ടോപ്പില്‍ താക്കൂര്‍ പ്രവര്‍ത്തിക്കുകയായിരുന്നുവെന്ന് എപിഐ ഹോന്‍മാന്‍ പറഞ്ഞു.

അമിതമായി ചാര്‍ജ് ചെയ്ത ലാപ്ടോപ്പ് ബാറ്ററി പൊട്ടിത്തെറിച്ചതോ ഷോര്‍ട്ട് സര്‍ക്യൂട്ടോ ആകാം തീപിടുത്ത കാരണമെന്നാണ് നിഗമനം.