കേരളത്തിന്റെ സാംസ്കാരിക രംഗത്തിന് കനത്ത നഷ്ടം.... ചൊവ്വല്ലൂര് കൃഷ്ണന്കുട്ടിയുടെ നിര്യാണത്തില് അനുശോചിച്ച് മുഖ്യമന്ത്രി പിണറായി വിജയന്
കേരളത്തിന്റെ സാംസ്കാരിക രംഗത്തിന് കനത്ത നഷ്ടം.... ചൊവ്വല്ലൂര് കൃഷ്ണന്കുട്ടിയുടെ നിര്യാണത്തില് അനുശോചിച്ച് മുഖ്യമന്ത്രി പിണറായി വിജയന്.
'മാധ്യമ പ്രവര്ത്തന രംഗത്തിനും സാഹിത്യരംഗത്തിനും ഗാന ലോകത്തിനും ഒരു പോലെ നഷ്ടമാണ് ചൊവ്വല്ലൂര് കൃഷ്ണന്കുട്ടിയുടെ വേര്പാട്. ജനങ്ങളുടെ മനസ്സില് സ്ഥാനം പിടിച്ച നിരവധി ഗാനങ്ങളിലൂടെയും ,ഭാവനാപൂര്ണമായ ഒട്ടനവധി കവിതകളിലൂടെയും, മലയാളസാഹിത്യത്തിന്റെ സാംസ്കാരിക ഈടുവെപ്പിന്റെ ഭാഗമായി കഴിഞ്ഞിട്ടുണ്ട് ചൊവ്വല്ലൂരിന്റെ സംഭാവനകള്.
കേരളത്തിന്റെ സാംസ്കാരിക രംഗത്തിന് കനത്ത നഷ്ടമാണ് ചൊവ്വല്ലൂരിന്റെ വിയോഗമെന്നും, കുടുംബാംഗങ്ങളുടെ ദുഃഖത്തില് പങ്കു ചേരുന്നതായും ' മുഖ്യമന്ത്രി.
മുഖ്യമന്ത്രിക്ക് പുറമെ നിരവധി പ്രമുഖര് മരണത്തില് അനുശോചനം രേഖപ്പെടുത്തി. കഴിഞ്ഞ ദിവസം രാത്രിയോടെയാണ് തൃശ്ശൂര് അമല ആശുപത്രിയില് വച്ച് കൃഷ്ണന്കുട്ടി അന്തരിച്ചത്. ഏറെനാളായി ചികിത്സയിലായിരുന്നു. സാഹിത്യലോകത്ത് തന്റേതായ വ്യക്തിമുദ്രചാര്ത്തിയ പ്രതിഭയായിരുന്നു ചൊവ്വല്ലൂര്. മൂവായിരത്തോളം ഭക്തിഗാനങ്ങള് എഴുതിയിട്ടുണ്ട്. സാഹിത്യ ലോകത്തെ സംഭാവനകള്ക്ക് നിരവധി പുരസ്ക്കാരങ്ങള് അദ്ദേഹത്തെ തേടി എത്തിയിരുന്നു.
അതേസമയം ഒരോ ശ്രോതാവിനെയും തന്റെ വരികള് കൊണ്ട് ഭക്തിയുടെ പാരമ്യതയിലേക്ക് എത്തിച്ച അതുല്യ പ്രതിഭയായിരുന്നു ഇദ്ദേഹം . ആ തൂലികയില് വിടരുന്ന ഒരോ വരികളും ആസ്വാദകന്റെ മനസ്സില് മായാതെ നിലകൊണ്ടു. ഗുരുവായൂരപ്പന്റെ രൂപം ഒരു ശിലപോലെ തന്റെ വരികളിലൂടെ വിശ്വാസികള്ക്ക് പകര്ന്ന് നല്കിയ ഗാനരചയിതാവ് ആയിരുന്നു ചൊവ്വല്ലൂര് കൃഷ്ണന്കുട്ടി.
'ഒരു നേരമെങ്കിലും കാണാതെ വയ്യെന്റെ ഗുരുവായൂരപ്പാ നിന് ദിവ്യരൂപം', 'ഗുരുവായൂര് ഓമനക്കണ്ണനാമുണ്ണിക്ക് ചില നേരമുണ്ടൊരു കള്ളനോട്ടം', കണ്ണന്റെ ഈ വരികള് മൂളാത്ത മലയാളികള് ചുരുക്കമാണ്. 'ഉദിച്ചുയര്ന്നു മാമല മേലേ ഉത്രം നക്ഷത്രം' 'കാനന വാസാ കലിയുഗ വരദാ കാല്ത്തളിരിട കൈ തൊഴുന്നേന്' തുടങ്ങിയ പ്രസിദ്ധമായ അയ്യപ്പഭക്തിഗാനങ്ങളും കൊണ്ട് ആസ്വാദകലോകത്തെ തഴുകിയ വ്യക്തിത്വം.
മൂവായിരത്തോളം ഭക്തിഗാനങ്ങള് അദ്ദേഹം എഴുതിയിട്ടുണ്ട്. ഉളളുരുകി കണ്ണടച്ച് പ്രാര്ത്ഥിക്കുന്ന ഭക്തന്റെ അകക്കണ്ണില് ദൈവീകചൈതന്യം പ്രതിഷ്ഠിക്കുന്ന വരികള് അതായിരുന്നു ചൊവ്വല്ലൂര് കൃഷ്ണന്കുട്ടിയുടെ രചനാശൈലി.
1936ല് ഗുരുവായൂര് ചൊവ്വല്ലൂര് വാരിയത്ത് കാവില് വാരിയത്ത് ശങ്കുണ്ണി വാര്യരുടെയും പാറുക്കുട്ടി വാരസ്യാരുടെയും മകനായി ജനനം.ഇരിങ്ങപ്പുറം മാക്കുണ്ണി മെമ്മോറിയല് സ്കൂള്, മറ്റം സെന്റ് ഫ്രാന്സിസ് ഹൈസ്കൂള്, തൃശൂര് ശ്രീകേരളവര്മ്മ കോളേജ് എന്നിവിടങ്ങളില് വിദ്യാഭ്യാസം. ശേഷം മാദ്ധ്യമ രംഗത്ത് പ്രഥമ സ്ഥാനം വഹിച്ചു. തുടര്ന്ന് 2004ല് അസിസ്റ്റന്റ് എഡിറ്റര് എന്ന പദവിയില് സേവനമനുഷ്ഠിച്ച് വിരമിച്ചു.
ഇവയ്ക്ക് പുറമെ കേരള സംഗീത നാടക അക്കാദമി, കേരള സാഹിത്യ അക്കാദമി, രണ്ട് തവണ കേരള കലാമണ്ഡലത്തിന്റെ വൈസ് ചെയര്മാന് എന്നീ പദവികളും വഹിച്ചു. കലമണ്ഡലം കല്യാണിക്കുട്ടിയമ്മ, ചെമ്പൈ വൈദ്യനാഥ ഭാഗവതര് തുടങ്ങി നിരവധി ഡോക്യുമെന്ററികളുടെ രചനയും സംവിധാനവും നിര്വഹിച്ചു. വിവിധ വിഭാഗങ്ങളിലായി പതിനെട്ട് പുസ്തകങ്ങള് പ്രസിദ്ധീകരിച്ചു. ചലച്ചിത്രഗാനങ്ങള്, റേഡിയോ നാടകങ്ങള് എന്നിവയും മൂവായിരത്തില് പരം ഭക്തി ഗാനങ്ങളും രചിച്ചു.
ആകാശവാണി സ്റ്റാഫ് ആര്ട്ടിസ്റ്റ്, കേരള കലാമണ്ഡലം വൈസ് ചെയര്മാന്, സംഗീതനാടക അക്കാദമി അംഗം, സാഹിത്യ അക്കാദമി അംഗം തുടങ്ങിയ പദവികളും വഹിച്ചിട്ടുണ്ട്.
"
https://www.facebook.com/Malayalivartha
