ചെറുതും വലുതുമായ ഇരുപതോളം കുഴികള്‍, ആഴ്ചകള്‍ക്ക് മുന്‍പ് ടാര്‍ ചെയ്ത കോട്ടയം മാര്‍ക്കറ്റ് റോഡ്... ഭാരമേറിയ വാഹനങ്ങള്‍ കൂടുതല്‍ എത്തുന്നതുകൊണ്ട് റോഡ് ബലപ്പെടുത്തി ടാര്‍ ചെയ്യണമെന്ന് വ്യാപാരികള്‍.


കൊച്ചിയിലെ റോഡുകള്‍ പശയൊട്ടിച്ചാണോ നിര്‍മിച്ചതെന്ന ഹൈക്കോടതിയുടെ ചോദ്യം കോട്ടയം മാര്‍ക്കറ്റ് റോഡിന്റെ കാര്യത്തില്‍ വളരെയേറെ ശരിയാണ്. ഈ റോഡു കണ്ടാലാകട്ടെ 'കഞ്ഞിപ്പശ' ഒട്ടിച്ചാണ് കുഴികള്‍ അടച്ചതെന്നു തോന്നും. ആഴ്ചകള്‍ക്ക് മുന്‍പ് ടാര്‍ ചെയ്ത റോഡാണ് വീണ്ടും പഴയ പടിയായിരിക്കുന്നത്.

ചെറുതും വലുതുമായ ഇരുപതോളം കുഴികളാണ് മാര്‍ക്കറ്റ് റോഡില്‍ നിന്നു ചന്തക്കടവ് വരെയുള്ള ഭാഗത്തു രൂപപ്പെട്ടിരിക്കുന്നത്. മുന്‍പു സ്ഥിരമായി അപകടങ്ങളും ഗതാഗതക്കുരുക്കും ഉണ്ടാകുന്ന ഇവിടെ വ്യാപാരികളുടെയും തൊഴിലാളികളുടെയും നിരന്തരമായ ആവശ്യപ്രകാരം ജൂണ്‍ 9നാണ് റോഡ് അറ്റകുറ്റപ്പണി നടത്തുകയുണ്ടായത്.

ചന്തക്കടവ് ഭാഗത്ത് വന്‍കുഴികളാണുള്ളത്. ഈരയില്‍ക്കടവ്, കോടിമത മാര്‍ക്കറ്റ് എന്നിവിടങ്ങളില്‍ നിന്നുള്ള വാഹനങ്ങള്‍ കൂടി എത്തുന്നതോടെ ഇവിടെ ഗതാഗതക്കുരുക്ക് രൂക്ഷമാകും. ചരക്കു വാഹനങ്ങള്‍ ഉള്‍പ്പെടെ ദിവസവും ഒട്ടേറെ വാഹനങ്ങളാണ് കുരുക്കില്‍പ്പെടുന്നത്.