ആശങ്കകള്‍ക്കൊടുവില്‍.... നീറ്റ് പരീക്ഷയ്ക്ക് രേഖകളുടെ പകര്‍പ്പെടുക്കാനായി പുറത്തുപോയി വിദ്യാര്‍ത്ഥി തിരിച്ചെത്താന്‍ വൈകി..... കൂട്ടിനെത്തിയ മുത്തശ്ശി ആശങ്കയിലായി, സുരക്ഷാഡ്യൂട്ടിക്ക് എത്തിയ എ.എസ്.ഐ. ബിജു ഫോണ്‍ വാങ്ങി കുട്ടിയെ വിളിച്ചു, ഗേറ്റടയ്ക്കരുതെന്നാവശ്യപ്പെട്ടിട്ടും സമയമായതിനാല്‍ ഗേറ്റ് പൂട്ടാനൊരുങ്ങവേ എത്തിയ അമലിനെയും കൂട്ടി ഗേറ്റ് ലക്ഷ്യമാക്കി ഓടി താഴുവീഴുംമുമ്പ് അമലിനെ അകത്തുകടത്തി.... ' ആക്ഷന്‍ ഹീറോ'യായി എ.എസ്.ഐ. ബിജു.

പരീക്ഷാഹാളിലെത്തി, പിന്നീട് രേഖകളുടെ പകര്‍പ്പെടുക്കാനായി പുറത്തേക്കുപോയ അമല്‍ എന്ന വിദ്യാര്‍ഥിയാണ് ബിജുവിനെ മുള്‍മുനയില്‍ നിര്‍ത്തിയത്. കോട്ടയം, ഇല്ലിക്കല്‍ ചിന്മയ സ്‌കൂളിലായിരുന്നു നാടകീയസംഭവം അരങ്ങേറിയത്.

കറുകച്ചാല്‍ സ്വദേശിയായ അമല്‍ ഇന്നലെ ഉച്ചയ്ക്കുള്ള നീറ്റ് പരീക്ഷയ്ക്ക് യഥാസമയം തന്നെ എത്തിയിരുന്നു. പരീക്ഷ തുടങ്ങാനായി കുറച്ചുസമയം മാത്രം ബാക്കിനില്‍ക്കേ, രേഖകളുടെ പകര്‍പ്പെടുക്കാനായി പുറത്തേക്കുപോയി. ഒന്നരയ്ക്ക് ഗേറ്റടയ്ക്കുമായിരുന്നു. പിന്നെ ആരെയും പരീക്ഷയെഴുതാന്‍ പ്രവേശിപ്പിക്കില്ല.

അമല്‍ തിരിച്ചെത്താന്‍ വൈകിയതോടെ കൂട്ടിനെത്തിയ മുത്തശ്ശി രാജമ്മ ആശങ്കയിലായി. അവര്‍ പരിഭ്രമത്തോടെ വിവരം കോട്ടയം വെസ്റ്റ് സ്റ്റേഷനിലെ എ.എസ്.ഐ. എസ്.ബിജുവിനോട് പറഞ്ഞു. മുത്തശ്ശിയുടെ മനസ്സിലെ പ്രയാസം ബിജുവിനും മനസ്സിലായി. ആശങ്ക വര്‍ദ്ധിച്ചു.

അപ്പോഴേക്കും ഗേറ്റടയ്ക്കാനും ആളെത്തി. രാജമ്മയുടെ പക്കല്‍നിന്ന് ഫോണ്‍നമ്പര്‍ വാങ്ങി ബിജു, അമലിനെ വിളിച്ചു. ഗേറ്റടയ്ക്കാതിരിക്കാന്‍ അധികൃതരോടും വിവരം പറഞ്ഞു. എന്നാല്‍, സമയമായാല്‍ ഗേറ്റടയ്ക്കുമെന്ന് അവരും അറിയിച്ചതോടെ ആശങ്കയേറെയായി.



അമലിനെ അന്വേഷിച്ചുപോകാനും ആലോചിച്ചു. ഇതിനിടെ സ്‌കൂളിനുമുന്നില്‍ ഒരു ഓട്ടോറിക്ഷ എത്തിയതില്‍ അമല്‍ ഉണ്ടായിരുന്നു. ബിജു ഓടിച്ചെന്നു. കുട്ടിയെയും കൂട്ടി ഗേറ്റ് ലക്ഷ്യമാക്കി ഓടി. ഗേറ്റിന് താഴുവീഴുംമുമ്പ് അമലിനെ അകത്തുകടത്തി.

ഇതിനിടെ അമലിന്റെ അപേക്ഷ പരിശോധിക്കാനും, രക്ഷിതാവ് ഒപ്പിടേണ്ട സ്ഥലം ഒഴിഞ്ഞുകിടന്നത് ശ്രദ്ധയില്‍പ്പെടുത്താനും ബിജു മറന്നില്ല. രേഖകളുടെ പകര്‍പ്പെടുക്കാനായി സ്‌കൂളില്‍ത്തന്നെ സൗകര്യങ്ങളുണ്ടെന്നിരിക്കെ ആരോ തെറ്റിദ്ധരിപ്പിച്ചാണ് അമലിനെ പുറത്തേക്ക് പറഞ്ഞയച്ചത്.