ജുമാ നിസ്‌കാര ഹാളില്‍ മൈക്കിലൂടെ അപകീര്‍ത്തിപ്പെടുത്തിയെന്ന മാന നഷ്ടക്കേസില്‍ മണക്കാട് ജമാ അത്ത് പ്രസിഡന്റ് 2 ലക്ഷം രൂപയും അന്യായ തീയതിയായ 2017 മുതല്‍ 6% പലിശയും കോടതിച്ചെലവും സഹിതം നല്‍കാന്‍ തിരുവനന്തപുരം മുന്‍സിഫ് കോടതി വിധി പ്രസ്താവിച്ചു.


മാന നഷ്ടക്കേസില്‍ പ്രതിയായ തിരുവനന്തപുരം മണക്കാട് വലിയപള്ളി മുസ്ലിം ജമാ അത്ത് പ്രസിഡന്റ് കളിപ്പാന്‍കുളം സലാം മന്‍സിലില്‍ അബ്ദുള്‍ ഖാദറിനെ (49) യാണ് കോടതി നഷ്ട പരിഹാര സിവില്‍ കേസില്‍ ശിക്ഷിച്ചത്. മേലില്‍ വാദിക്കെതിരെ അസത്യവും കളവെന്ന് വിശ്വസിക്കത്തക്കതോ ആയ യാതൊരു അപകീര്‍ത്തികരമായ പ്രസ്താവനയും പ്രചരിപ്പിക്കരുതെന്നും തിരുവനന്തപുരം ഒന്നാം അഡീ. മുന്‍സിഫ് ഏ.ആര്‍. കാര്‍ത്തിക വിധി ന്യായത്തില്‍ ഉത്തരവിട്ടു. അസത്യമായതോ കളവെന്ന് വിശ്വസിക്കത്തതോ ആയ പ്രസ്താവനകള്‍ പ്രചരിപ്പിച്ച് ഒരാളുടെ മാനത്തെ അധിക്ഷേപിക്കാന്‍ ആര്‍ക്കും അവകാശമില്ലെന്ന് കോടതി വിധിന്യായയില്‍ ചൂണ്ടിക്കാട്ടി.




മൈക്കിലൂടെ ആരോപിച്ച അപകീര്‍ത്തി പ്രസ്താവനകള്‍ സത്യമാണെന്ന് പ്രതിക്ക് തെളിയിക്കാനായില്ലെന്ന് വിധി ന്യായത്തില്‍ കോടതി ചൂണ്ടിക്കാട്ടി. അടച്ചിട്ട ഹാളില്‍ വച്ചുള്ള പ്രസ്താവന മാന നഷ്ടക്കേസിന്റെ പരിധിയില്‍ വരില്ലെന്ന പ്രതിയുടെ വാദവും തള്ളിക്കൊണ്ടാണ് മാന അധിക്ഷേപ നഷ്ടപരിഹാര കേസില്‍ സുപ്രധാന വിധി വിചാരണക്കോടതി പുറപ്പെടുവിച്ചത്.



2017 ജൂലൈ 7 ന് വെള്ളിയാഴ്ച പള്ളി കൂടിയ വേളയിലാണ് സംഭവം നടന്നത്. മണക്കാട് വലിയ പള്ളിയില്‍ ജുമാ നിസ്‌ക്കാര വേളയില്‍ പ്രസിഡന്റ് അബ്ദുള്‍ ഖാദര്‍ മൈക്ക് സെറ്റിലൂടെ പരാതിക്കാരനായ കല്ലാട്ടുമുക്ക് നീലാറ്റിന്‍കര സ്വദേശി അബ്ദുള്‍ അസീസ് (51) പുളളി സൂപ്പെന്ന വട്ടപ്പേരുകാരന്റെ മകനാണെന്നും കൂടാതെ സൈക്കോ നസീര്‍ എന്നയാളിനൊപ്പം കുബേര കേസിലെ പ്രതിയാണെന്നും പിടിച്ചു പറിക്കാരനാണെന്നും തനി പലിശക്കാരനാണെന്നും ഉദ്ദേശം മൂവായിരത്തോളം മുസ്ലിം വിശ്വാസികള്‍ ജുമാ നിസ്‌ക്കാരത്തിന് ഹാളില്‍ നില്‍ക്കവേ പള്ളി മൈക്കിലൂടെ പറഞ്ഞ് അപകീര്‍ത്തിപ്പെടുത്തി മാനഹാനിയും മനോവേദനയും ഉണ്ടാക്കിയെന്നാണ് കേസ്.