സ്വകാര്യ ബസ് ജീവനക്കാരും കാര്‍ യാത്രികരും തമ്മിലുള്ള തര്‍ക്കത്തിനിടെ കയ്യാങ്കളി..... ബസ് ജീവനക്കാരന്‍ കത്തിയെടുത്ത് യുവാവിനെ കുത്താന്‍ ശ്രമിക്കവേ കൂടെയുണ്ടായിരുന്ന പിതാവ് കുഴഞ്ഞ് വീണു, ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.


സൈഡ് കൊടുക്കാത്തതിനെ ചൊല്ലി പറവൂരില്‍ സ്വകാര്യ ബസ് ജീവനക്കാരും കാര്‍ യാത്രക്കാരും തമ്മിലുണ്ടായ തര്‍ക്കത്തിനിടെ, കാര്‍ ഓടിച്ചിരുന്ന യുവാവിന്റെ പിതാവ് കുഴഞ്ഞു വീണു മരിച്ചു. ഫോര്‍ട്ട്കൊച്ചി ചുള്ളിക്കല്‍ കരിവേലിപ്പടി കിഴക്കേപറമ്പില്‍ ഫസലുദ്ദീന്‍ (54) ആണ് മരിച്ചത്. ഇന്നലെ രാത്രി 7.45ന് കണ്ണന്‍കുളങ്ങര ഭാഗത്തായിരുന്നു സംഭവം നടന്നത്.

ഫസലുദ്ദീന്റെ മകന്‍ ഫര്‍ഹാനാണ് (20) കാര്‍ ഓടിച്ചത്. സൈഡ് നല്‍കാത്തതിനെ ചൊല്ലിയാണ് ഇരുകൂട്ടരും തമ്മില്‍ തര്‍ക്കമുണ്ടായതെന്ന് പൊലീസ് . കോഴിക്കോട് - വൈറ്റില റൂട്ടിലോടുന്ന നര്‍മ്മദ ബസ് അമിതവേഗത്തില്‍ ഓവര്‍ടേക്ക് ചെയ്തപ്പോള്‍ കാറിന്റെ കണ്ണാടിയില്‍ മുട്ടിയെന്നാണു ഫര്‍ഹാന്റെ മൊഴി.

തുടര്‍ന്നു ഫര്‍ഹാന്‍ ബസിനു മുന്നില്‍ കാര്‍ കൊണ്ടുവന്നിട്ടു തടഞ്ഞ് ചോദ്യം ചെയ്തു. തര്‍ക്കമുണ്ടായപ്പോള്‍ ബസ് ജീവനക്കാരന്‍ കത്തിയെടുത്ത് കുത്താന്‍ ശ്രമിച്ചു.



തടയുന്നതിനിടെ ഫര്‍ഹാന്റെ കൈ മുറിഞ്ഞു. ഇതു കണ്ടാണു കാറിലുണ്ടായിരുന്ന ഫസലുദ്ദീന്‍ കുഴഞ്ഞുവീണത്. ഉടന്‍ പറവൂര്‍ താലൂക്ക് ആശുപ്രതിയില്‍ എത്തിച്ചെങ്കിലും മരിച്ചു. ബസ് ജീവനക്കാര്‍ വാഹനവുമായി കടന്നുകളഞ്ഞു. ബസ് പിടികൂടാനായി നടപടി സ്വീകരിച്ചിട്ടുണ്ടെന്ന് പൊലീസ്.