വിമാന മാർ​ഗം കേരളത്തിലേക്ക് മാരക ലഹരിമരുന്ന് കടത്തിയ സംഭവത്തില്‍ രണ്ടുപേര്‍ തൃശൂരില്‍ അറസ്റ്റില്‍. കേച്ചേരി സ്വദേശികളായ ദയാല്‍ (27) , അഖില്‍ (22) എന്നിവരെയാണ് ഈസ്റ്റ് പോലീസ് അറസ്റ്റ് ചെയ്തത്. ഇവരില്‍ നിന്നും അരക്കിലോ എംഡിഎംഎ കണ്ടെടുത്തു. കൊറിയര്‍ വഴിയും ലഹരി കടത്തിയെന്ന് പ്രതികള്‍ വെളിപ്പെടുത്തിയതായി പോലീസ് അറിയിച്ചു. ഡല്‍ഹിയില്‍ നിന്ന് ലഹരി കടത്തിയ വിദേശ പൗരനായി തിരച്ചില്‍ തുടങ്ങിയതായും പോലീസ് അറിയിച്ചു.

അതേസമയം ആലപ്പുഴയില്‍ മാരക മയക്കുമരുന്നായ എംഡിഎംഎയുമായി യുവാവ് അറസ്റ്റിൽ. ഭരണിക്കാവ് കറ്റാനം പ്രണവ് ഭവനത്തിൽ പ്രവീൺ (22) ആണ് അറസ്റ്റിലായത്. ഇയാളിൽ നിന്നും 12.53 ഗ്രാം എംഡിഎംഎ പിടിച്ചെടുത്തു. ലഹരി വിരുദ്ധ സ്ക്വാഡും ഹരിപ്പാട് പൊലീസും ചേർന്നാണ് പ്രതിയെ പിടികൂടിയത്. ഹരിപ്പാട് കെഎസ്ആർടിസി ബസ് സ്റ്റേഷനിൽ നിന്നാണ് പ്രവീണിനെ പൊലീസ് പിടികൂടിയത്.