കുട്ടികൾക്കൊപ്പം ഓണസദ്യയുണ്ട് വിദ്യാഭ്യാസ മന്ത്രി വി ശിവൻകുട്ടി.തിരുവനന്തപുരം ജില്ലയിലെ മുള്ളറംകോട് സർക്കാർ എൽ.പി സ്കൂളിലെ വിദ്യാർത്ഥികൾക്കൊപ്പമാണ് മന്ത്രി ഓണസദ്യയുണ്ടത്. സ്കൂളിലെ രണ്ടാം ക്ലാസ്സ്‌ വിദ്യാർത്ഥിനി മീനാക്ഷി ‘മന്ത്രി അപ്പൂപ്പൻ ഞങ്ങൾക്കൊപ്പം ഓണമുണ്ണാൻ വരാമോ’ എന്ന് കത്തെഴുതി ചോദിച്ചപ്പോൾ പോകാതിരിക്കാൻ മന്ത്രിയ്ക്ക് കഴിഞ്ഞില്ല.

കൂട്ടത്തിൽ കത്തെഴുത്തിയ മീനാക്ഷി മന്ത്രി അപ്പുപ്പനെ ചേർന്നു നിന്നു, മതിയാവോളം ഫോട്ടോയെടുത്ത ശേഷമാണ് സദ്യ ഉണ്ണാൻ ക്ഷണിച്ചത്. അടുത്ത് വന്നവരോടെല്ലാം അദ്ദേഹം കുശലാന്വേഷണം നടത്തി. പിന്നെ വിഭവ സമ്യദ്ധമായ ഓണസദ്യ. മന്ത്രി അപ്പൂപ്പന് സമ്മാനങ്ങൾ നൽകാനും കുട്ടികൾ മറന്നില്ല.

തങ്ങൾക്ക് പുതിയ സ്കൂൾ കെട്ടിടം വേണമെന്ന കുട്ടികളുടെ ആവശ്യം അനുഭാവപൂർവ്വം പരിഗണിക്കാമെന്ന ഉറപ്പും മന്ത്രി നൽകി. കുഞ്ഞുങ്ങൾ എഴുതിയ കത്തുൾപ്പെടെ മന്ത്രി സ്വന്തം ഫെയ്സ്ബുക്ക് പേജിൽ പോസ്റ്റിട്ടത് വൈറലായിരുന്നു. ഒ.എസ് അംബിക എം.എൽ.എ ഉൾപ്പെടെയുള്ളവരും ഓണാഘോഷത്തിന് സ്കൂളിൽ എത്തിയിരുന്നു.