മഴ ഓരോ രൂപത്തില്‍ മലയാളികളെ ബുദ്ധിമുട്ടിലാക്കുകയാണ്. ഇത്തവണ മലയാളികളുടെ പൂക്കളമിടലിലാണ് മഴയുടെ പ്രധാന കടന്നുകയറ്റം. തമിഴ്‌നാട്ടില്‍ കനത്ത മഴ മൂലം പൂക്കള്‍ ലഭ്യമാകുന്നതിലെ ക്ഷാമം മലയാളികളെ അധിക പണചിലവിലേക്ക് തള്ളിവിടുകയാണ്. തമിഴ്‌നാട്ടിലെ ശങ്കരന്‍ കോവില്‍, ദണ്ഡിക്കല്‍, ഹൊസൂര്‍, കോയമ്ബത്തൂര്‍, സേലം എന്നിവിടങ്ങളില്‍നിന്നാണ് പ്രധാനമായും കേരളത്തിലേക്ക് പൂക്കള്‍ എത്തുന്നത്.

എന്നാല്‍ ഹൊസൂര്‍, കോയമ്ബത്തൂര്‍ എന്നിവിടങ്ങളില്‍ രണ്ടുമൂന്ന് ദിവസമായി മഴ തുടരുകയാണ്. അതിനാല്‍ ജമന്തിപ്പൂക്കള്‍ അഴുകിപ്പോകുന്നുണ്ട്. കാലാവസ്ഥ വ്യതിയാനം പൂകൃഷിയെ പ്രതികൂലമായി ബാധിക്കുന്നു. മുല്ലപ്പൂ കിലോക്ക് 1500 രൂപയാണ് വില. ചിങ്ങ മാസമായതോടെ നിരവധി വിവാഹങ്ങളാണ് നടക്കുന്നത്. ഇതും വില വര്‍ധനക്ക് കാരണമാണ്.

അത്തപ്പൂക്കളത്തിനുള്ള മഞ്ഞ, ഓറഞ്ച് നിറത്തിലുള്ള ജമന്തിപ്പൂവിന് കിലോക്ക് 110, 120 രൂപയും വാടാമുല്ലക്ക് 250, അരളിക്ക് 400, റോസക്ക് 350 എന്നിങ്ങനെയാണ് വില. വരുംദിവസങ്ങളില്‍ സ്‌കൂളുകള്‍, സ്ഥാപനങ്ങള്‍ എന്നിവിടങ്ങളില്‍ ഓണാഘോഷം നടക്കുന്നതിനാല്‍ പൂക്കള്‍ക്ക് ആവശ്യക്കാര്‍ ഏറും.

മഴ കാരണം കടകളില്‍ എത്തുന്ന നനഞ്ഞ പൂക്കള്‍ പെട്ടെന്ന് അഴുകിപ്പോകുന്നതിനാല്‍ കൂടുതല്‍ പൂക്കള്‍ സ്‌റ്റോക്ക് ചെയ്യാന്‍ കഴിയാത്ത സ്ഥിതിയാണ്. മുല്ലപ്പൂ തെങ്കാശ്ശിയില്‍നിന്നും റോസാപ്പൂക്കള്‍ ഹൊസൂരില്‍നിന്നുമാണ് എത്തുന്നത്.