സിനിമാ സ്‌റ്റൈലില്‍ വില്ലേജ് ഓഫീസറെ കുടുക്കിയിരിക്കുകയാണ് വിജിലന്‍സ് സംഘം. നാട്ടില്‍ ഇത്രയേറെ സംഭവങ്ങള്‍ നടന്നിട്ടും പാഠം പഠിക്കാത്ത കുറെ സര്‍ക്കാര്‍ ഉദ്യോഗസ്ഥര്‍ ഇപ്പോഴും ഉണ്ട്. പിടികൂടിയാല്‍ ഒരു സസ്‌പെന്‍ഷന്‍ അല്ലെങ്കില്‍ സ്ഥലം മാറ്റം ഇത്രയല്ലേ ഉണ്ടാകു എന്നാകും പലരുടെയും ചിന്ത.

ഇത്തരക്കാരാണ് നല്ലവരായ സര്‍ക്കാര്‍ ഉദ്യോഗസ്ഥരെക്കൂടി മോശക്കാരാക്കുന്നത്. കോട്ടയത്ത് സ്ഥലം പോക്കുവരവ് ചെയ്യാന്‍ 15000 രൂപ കൈക്കൂലി വാങ്ങുന്നതിനിടെ വില്ലേജ് ഓഫീസറെ ഇന്ന് വിജിലന്‍സ് സംഘം അറസ്റ്റ് ചെയ്തു.

കോട്ടയം ആനിക്കാട് വില്ലേജ് ഓഫീസര്‍ ജേക്കബ് തോമസിനെയാണ് കോട്ടയം വിജിലന്‍സ് എസ്.പി വി.ജി വിനോദ് കുമാറിന്റെ നേതൃത്വത്തിലുള്ള സംഘം പിടികൂടിയത്. പള്ളിക്കത്തോട് ആനിക്കാട് സ്വദേശിയുടെ പട്ടയം കിട്ടിയ സ്ഥലം പോക്കുവരവ് ചെയ്തു നല്‍കുന്നതിനായി ജേക്കബ് തോമസ് 15000 രൂപ കൈക്കൂലി ആവശ്യപ്പെടുകയായിരുന്നു.

സ്ഥലം പോക്കുവരവ് ചെയ്യുന്നതിനായി രണ്ടുമാസം മുന്‍പ് നല്‍കിയ അപേക്ഷ ഇയാള്‍ മനപൂര്‍വ്വം വൈകിപ്പിക്കുകയായിരുന്നു. അപേക്ഷകന്‍ നിരന്തരം ഇതിനായി വില്ലേജ് ഓഫീസിലെത്തിയെങ്കിലും ആവശ്യമായ നടപടി സ്വീകരിക്കാന്‍ വില്ലേജ് ഓഫീസര്‍ തയ്യാറായില്ല. ഒടുവില്‍ കൈക്കൂലിയായി 15,000 രൂപ നല്‍കിയാല്‍ തൊട്ടടുത്ത ദിവസം തന്നെ സ്ഥലം പോക്കുവരവ് ചെയ്തുകൊടുക്കാമെന്ന് വില്ലേജ് ഓഫീസര്‍ അറിയിച്ചു. ഇതോടെ അപേക്ഷകന്‍ വിജലന്‍സിനെ സമീപിച്ച് പരാതി നല്‍കുകയായിരുന്നു.

ഇതേത്തുടര്‍ന്ന് പ്രാഥമിക പരിശോധന നടത്തിയ വിജിലന്‍സ് സംഘത്തിന് പരാതിയില്‍ കഴമ്ബുണ്ടെന്ന് ബോധ്യപ്പെട്ടു. തുടര്‍ന്ന് ബ്ലൂഫിലിം പൗഡര്‍ ഇട്ടു നല്‍കിയ 15000 രൂപ വിജിലന്‍സ് നിര്‍ദേശാനുസരണം വില്ലേജ് ഓഫീസില്‍ വച്ച് പരാതിക്കാരന്‍ വില്ലേജ് ഓഫീസര്‍ക്ക് കൈമാറി. ഈ സമയം വില്ലേജ് ഓഫീസിന് പുറത്തായി കാത്തുനില്‍ക്കുകയായിരുന്നു വിജലന്‍സ് സംഘം.

വില്ലേജ് ഓഫീസര്‍ പണം കൈപ്പറ്റുന്നതിനിടെ പെട്ടെന്ന് അവിടേക്ക് എത്തിയ വിജിലന്‍സ് ഡി വൈ എസ് പി വി.ആര്‍ രവികുമാറിന്റെ നേതൃത്വത്തിലുള്ള സംഘം വില്ലേജ് ഓഫീസറെ കസ്റ്റഡിയിലെടുക്കുകയായിരുന്നു.

വില്ലേജ് ഓഫീസറുടെ കൈയ്യില്‍ നിന്ന് കൈക്കൂലി പണവും വിജിലന്‍സ് സംഘം കണ്ടെത്തി. തുടര്‍ച്ചയായ രണ്ടാം ദിവസമാണ് കോട്ടയം വിജിലന്‍സ് സംഘത്തിന് നേതൃത്വത്തില്‍ കൈക്കൂലിക്കാരായ ഉദ്യോഗസ്ഥരെ പിടികൂടുന്നത്. പ്രതിയെ കോട്ടയം വിജിലന്‍സ് കോടതിയില്‍ ഹാജരാക്കുമെന്ന് വിജിലന്‍സ് സംഘം അറിയിച്ചു.

പുതിയതായി തുടക്കമിടുന്ന അഴിമതി രഹിത കേരളം പദ്ധതിയുടെ ഭാഗമായി കഴിഞ്ഞമാസം അഴിമതിക്കാരായ സര്‍ക്കാര്‍ ഉദ്യോഗസ്ഥരുടെ പട്ടിക തയാറാക്കാന്‍ വിജിലന്‍സ് നടപടി തുടങ്ങിയിരുന്നു. സര്‍ക്കാര്‍ ഓഫിസുകളില്‍ പരിശോധനകള്‍ കര്‍ശനമാക്കാന്‍ വിജിലന്‍സ് മേധാവി മനോജ് എബ്രഹാം മാര്‍ഗനിര്‍ദേശങ്ങള്‍ പുറത്തിറക്കി.

വിജിലന്‍സ് കേസുകളുകളില്‍ കുറ്റപത്രം വൈകരുതെന്ന് നിര്‍ദേശം നല്‍കിയിരുന്നു. വരും ദിവസങ്ങളില്‍ സംസ്ഥാന വ്യാപക മിന്നല്‍ പരിശോധനകള്‍ നടത്തുമെന്നും ഉദ്യോഗസ്ഥര്‍ ഉള്‍പ്പെടെ അഴിമതി കേസിലുള്‍പ്പെടുന്നവര്‍ക്കെതിരെയുള്ള പ്രാഥമിക, ത്വരിതാന്വേഷണങ്ങള്‍ ശക്തിപ്പെടുത്തും. വരവില്‍ കവിഞ്ഞ സ്വത്തു സമ്പാദനം കണ്ടെത്താനും കര്‍ശന നിര്‍ദേശം നല്‍കി. സര്‍ക്കാര്‍ സേവനങ്ങള്‍ പൂര്‍ണമായും ഓണ്‍ലൈനിലേക്ക് മാറിയാല്‍ അഴിമതി കുറയുമെന്നും വിജിലന്‍സ് അറിയിച്ചു.