പെണ്‍കുട്ടിയുടെ പെരുമാറ്റത്തില്‍ സംശയം തോന്നി ആധ്യാപകര്‍ ചോദ്യം ചെയ്തതോടെ പുറത്തുവന്നത് ഞെട്ടിക്കുന്ന പീഡന കഥ. തന്നെ ലൈംഗികമായി പീഡിപ്പിക്കുകയും ഇക്കാര്യം വെളിപ്പെടുത്തിയാല്‍ കൊല്ലുമെന്ന് ഭീഷണിപ്പെടുത്തുകയും ചെയ്തതായി പെണ്‍കുട്ടി വെളിപ്പെടുത്തി. സംഭവത്തില്‍ നാലുപേരെ പോലീസ് അറസ്റ്റ് ചെയ്തു.

അഞ്ചുതെങ്ങ് പൊലീസ് ആണ് ഇവരെ വ്യാഴാഴ്ച അറസ്റ്റ് ചെയ്തത്. പെണ്‍കുട്ടിയുടെ വീടിന് സമീപം താമസിച്ചിരുന്നവരായിരുന്നു പ്രതികള്‍. ഇവര്‍ പെണ്‍കുട്ടിയുടെ അകന്ന ബന്ധുക്കളുമാണ്. കൊവിഡിന്റെ ഭാഗമായി വന്ന ലോക്ക്ഡൗണ്‍ സമയത്ത്, പ്രതികള്‍ പെണ്‍കുട്ടിയെ ഒഴിഞ്ഞുകിടന്ന കെട്ടിടത്തിന്റെ ടെറസിലും, പ്രദേശത്തുള്ള ചെറിയ ടെന്റിലും കൊണ്ടുപോയി പീഡിപ്പിച്ചുവെന്നാണ് കേസ്.

പെണ്‍കുട്ടിയുടെ മാതാപിതാക്കള്‍ സംഭവം മൂടിവെക്കാന്‍ ശ്രമിച്ചിരുന്നു. എന്നാല്‍ കൊവിഡിന് ശേഷം പെണ്‍കുട്ടി തിരികെ സ്‌കൂളില്‍ എത്തിയതോടെയാണ് സംഭവം പുറത്തറിയുന്നത്. അസാധാരണവും വിചിത്രവുമായുള്ള പെണ്‍കുട്ടിയുടെ പെരുമാറ്റമാണ് അധ്യാപകരില്‍ സംശയം ഉയര്‍ത്തിയത്. സംഭവത്തെ തുടര്‍ന്ന് പെണ്‍കുട്ടിയോട് അധ്യാപകര്‍ കാര്യങ്ങള്‍ ചോദിച്ചറിയുകയായിരുന്നു. നടന്ന കാര്യങ്ങള്‍ എല്ലാം ഒടുവില്‍ പെണ്‍കുട്ടി വെളിപ്പെടുത്തി.