എം.ബി.രാജേഷ് മന്ത്രിസഭയിലേക്ക്..... രാജേഷിന്റെ സത്യപ്രതിജ്ഞ ചൊവ്വാഴ്ച രാവിലെ 11ന് രാജ്ഭവനില്‍ , ഇന്ന് രാവിലെ തിരുവനന്തപുരത്ത് എത്തി ഡെപ്യൂട്ടി സ്പീക്കര്‍ ചിറ്റയം ഗോപകുമാറിന് രാജിക്കത്ത് കൈമാറും.


ഒന്നര വര്‍ഷമെന്ന ചെറിയ കാലയളവാണെങ്കിലും സമീപകാലത്ത് കേരള നിയമസഭയെ നയിച്ച ശ്രദ്ധേയനായ സ്പീക്കര്‍ എന്ന ഖ്യാതി നേടി എം.ബി. രാജേഷ്... പാര്‍ട്ടി സംസ്ഥാന സെക്രട്ടറിയായതിനെ തുടര്‍ന്ന് മന്ത്രിസ്ഥാനം രാജിവച്ച കണ്ണൂരുകാരന്‍ എം.വി.ഗോവിന്ദന് പകരക്കാരനെ കണ്ടെത്താന്‍ ഇന്നലെ ചേര്‍ന്ന സി.പി.എം സംസ്ഥാന സെക്രട്ടേറിയറ്റാണ് തീരുമാനമെടുത്തത്.

സ്പീക്കറെ തിരഞ്ഞെടുക്കാന്‍ നിയമസഭ ചേരണം. അത് മന്ത്രിസഭ തീരുമാനിക്കും. രണ്ട് തവണ ലോക്സഭാ എം.പിയും ഡി.വൈ.എഫ്.ഐ അഖിലേന്ത്യാ പ്രസിഡന്റുമായിരുന്ന രാജേഷ് (51) നിലവില്‍ സി.പി.എം സംസ്ഥാന സമിതി അംഗവും തൃത്താലയില്‍ നിന്നുള്ള എം.എല്‍.എയുമാണ്.

അതേസമയംഡി.വൈ.എഫ്.ഐ സംസ്ഥാന പ്രസിഡന്റും എസ്.എഫ്.ഐ സംസ്ഥാനസെക്രട്ടറിയുമായിരുന്ന ഷംസീര്‍ (45) തലശേരിയില്‍ നിന്ന് രണ്ടാം വട്ടമാണ് നിയമസഭയിലെത്തിയത്. കഴിഞ്ഞദിവസം നിയമസഭാസമ്മേളനം അവസാനിച്ചതിന് പിന്നാലെ രാജേഷ് ചെന്നൈയിലെത്തി ചികിത്സയിലുള്ള കോടിയേരിയെ കണ്ടിരുന്നു.



സെക്രട്ടേറിയറ്റ് യോഗ തീരുമാനത്തിന് പിന്നാലെ എം.വി. ഗോവിന്ദന്‍ മന്ത്രിസ്ഥാനം രാജിവച്ചു. മുഖ്യമന്ത്രി പിണറായി വിജയന് രാജിക്കത്ത് കൈമാറി. രാത്രിയില്‍ തന്നെ രാജിക്കത്ത് പ്രത്യേക ദൂതന്‍ വഴി രാജ്ഭവനിലെത്തിച്ചു. രാജ്ഭവനില്‍ നിന്ന് രാജിക്കത്തും പകരം മന്ത്രിയെ സംബന്ധിച്ച മുഖ്യമന്ത്രിയുടെ ശുപാര്‍ശയും സഹിതം ഇ-മെയില്‍ വഴി ഡല്‍ഹിയിലുള്ള ഗവര്‍ണര്‍ ആരിഫ് മുഹമ്മദ് ഖാന് അയച്ചു. ഗവര്‍ണര്‍ തിങ്കളാഴ്ച വൈകുന്നരേം മടങ്ങിയെത്തും.