രാജ്യത്തെ ജനമനസുകളില്‍ നിന്ന് കോണ്‍ഗ്രസ് അപ്രത്യക്ഷമായിക്കൊണ്ടിരിക്കുന്നു. ഇന്ത്യയിലെ ദളിത്, പിന്നാക്ക, ദരിദ്ര ജനവിഭാഗങ്ങളെ ചേര്‍ത്തു നിറുത്തിയത് നരേന്ദ്ര മോദി സര്‍ക്കാരാണെന്നും അധഃസ്ഥിത ജനങ്ങളുടെ വികാസത്തിലൂടെയല്ലാതെ രാജ്യം അഭിവൃദ്ധിപ്പെടില്ലെന്ന വിശ്വാസമാണ് മോദിയെ നയിക്കുന്നതെന്നും കേന്ദ്ര ആഭ്യന്തരമന്ത്രി അമിത് ഷാ .


ബി.ജെ.പി പട്ടികജാതി മോര്‍ച്ച സംഘടിപ്പിച്ച പട്ടികജാതി സംഗമം അല്‍ സാജ് കണ്‍വെന്‍ഷന്‍ സെന്ററില്‍ ഉദ്ഘാടനം ചെയ്യുകയായിരുന്നു അദ്ദേഹം. രണ്ട് ദിവസത്തെ സന്ദര്‍ശനത്തിനെത്തിയ അമിത്ഷാ പങ്കെടുത്ത ഏക പൊതുപരിപാടിയാണ്.


മോദിസര്‍ക്കാരിന് കിട്ടിയ ആദ്യ അവസരത്തില്‍ രാഷ്ട്രപതിയായി പട്ടികജാതിക്കാരനായ രാംനാഥ് കോവിന്ദിനെ തിരഞ്ഞെടുത്തു. രണ്ടാമത് പട്ടികവര്‍ഗക്കാരിയായ ദ്രൗപദി മുര്‍മുവിനെ രാഷ്ട്രപതിയാക്കി. പട്ടികവിഭാഗക്കാരായ പന്ത്രണ്ട് പേരാണ് മോദിമന്ത്രിസഭയിലുള്ളത്. കോണ്‍ഗ്രസിന്റെ ഏതെങ്കിലും ഭരണകാലത്ത് ഇങ്ങനെ ഉണ്ടായിട്ടുണ്ടോയെന്ന് അമിത് ഷാ ചോദിച്ചു.


60 വര്‍ഷം കേന്ദ്രം ഭരിച്ച കോണ്‍ഗ്രസോ എട്ട് വര്‍ഷത്തോളം അവരെ പിന്തുണച്ച കമ്മ്യൂണിസ്റ്റ് പാര്‍ട്ടിയോ ദളിത്, ആദിവാസി വിഭാഗങ്ങള്‍ക്കായി ഒന്നും ചെയ്തിട്ടില്ലെന്നും അദ്ദേഹം പറഞ്ഞു.13 പട്ടികജാതി സംഘടനകളുടെ നേതാക്കള്‍ വേദിയില്‍ സന്നിഹിതരായി.ആദിവാസി നേതാവ് സി.കെ. ജാനുവിന്റെ സാന്നിദ്ധ്യവും ശ്രദ്ധേയമായി.


ദളിതരുടെ ഭൂസമരങ്ങള്‍ക്ക് നേതൃത്വം കൊടുക്കുകയും എണ്‍പത്തി രണ്ടാം വയസില്‍ പദ്മശ്രീ ലഭിക്കുകയും ചെയ്ത പെരുമ്പാവൂര്‍ സ്വദേശി എം .കെ കുഞ്ഞോള്‍ മാസ്റ്ററെ അമിത് ഷാ പൊന്നാട അണിയിച്ചു.

ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്‍ അദ്ധ്യക്ഷനായി. വാളയാറില്‍ പീഡനത്തിനിരയായ ദളിത് പെണ്‍കുട്ടികളുടെ അമ്മയും അട്ടപ്പാടിയില്‍ ആള്‍ക്കൂട്ടം കൊലപ്പെടുത്തിയ ആദിവാസി യുവാവ് മധുവിന്റെ അമ്മയും അമിത്ഷായ്ക്ക് നിവേദനം നല്‍കി.

കോണ്‍ഗ്രസ് ഭരിച്ച കാലത്തൊന്നും ഡോ. അംബേദ്കര്‍ക്ക് ഭാരതരത്‌ന നല്‍കിയില്ല. കോണ്‍ഗ്രസ് അധികാരത്തില്‍ നിന്ന് പുറത്തായപ്പോഴാണ് അത് നല്‍കിയത്. അംബേദ്കറുടെ ജന്മദിനമായ ഏപ്രില്‍ 14ന് സമരസ ദിനമായി തീരുമാനിച്ചത് മോദി സര്‍ക്കാരാണ്. നവംബര്‍ 26 ഭരണഘടനാദിനമായി പ്രഖ്യാപിച്ച് അംബേദ്കറെ ആദരിച്ചു.