അറുപത്തിയെട്ടാമത് നെഹ്‌റു ട്രോഫി വള്ളംകളി ഇന്ന് നടക്കും. ഉച്ചയ്ക്ക് രണ്ടുമണിക്ക് വള്ളം കളിയുടെ ഔദ്യോഗിക ഉദ്ഘാടനം നടക്കും. മുഖ്യമന്ത്രി പിണറായി വിജയന്‍ വള്ളംകളി ഉദ്ഘാടനം ചെയ്യും.


നെഹ്‌റു പ്രതിമയില്‍ പുഷ്പാര്‍ച്ചന നടത്തിയ ശേഷം അദ്ദേഹം പതാക ഉയര്‍ത്തും. ഒമ്പത് വിഭാഗങ്ങളിലായി 77 വള്ളങ്ങളാണ് ഇക്കുറി നെഹ്‌റു ട്രോഫിയില്‍ മത്സരിക്കുന്നത്. ചുണ്ടന്‍ വള്ളങ്ങളുടെ വിഭാഗത്തില്‍ 20 വള്ളങ്ങളാണുള്ളത്. ചുരുളന്‍ -3, ഇരുട്ടുകുത്തി എ ഗ്രേഡ് -5, ഇരുട്ടുകുത്തി ബി ഗ്രേഡ് -16, ഇരുട്ടുകുത്തി സി ഗ്രേഡ് -13, വെപ്പ് എ ഗ്രേഡ് -9, വെപ്പ് ബി ഗ്രേഡ് -9, തെക്കനോടി(തറ) -3, തെക്കനോടി(കെട്ട്)- 3 എന്നിങ്ങനെയാണ് മറ്റു വിഭാഗങ്ങളില്‍ മത്സരിക്കുന്ന വള്ളങ്ങളുടെ എണ്ണം.

രാവിലെ 11 മണിയ്ക്ക് മത്സരങ്ങള്‍ തുടങ്ങും. ചെറുവള്ളങ്ങളുടെ മത്സരമാണ് ആദ്യം നടക്കുക. ഉച്ചകഴിഞ്ഞ് നടക്കുന്ന ഉദ്ഘാടനത്തിന് ശേഷമാകും ചുണ്ടന്‍ വള്ളങ്ങള്‍ തമ്മില്‍ മാറ്റുരയ്ക്കുന്നത്. ഫൈനല്‍ മത്സരങ്ങള്‍ നടക്കുന്നത് വൈകിട്ട് നാല് മുതല്‍ അഞ്ച് വരെയാണ്.

ചുണ്ടന്‍ വള്ളങ്ങള്‍ തമ്മില്‍ അഞ്ച് മത്സരങ്ങളാണ് നടക്കുന്നത്. ഓരോ മത്സരത്തിലും നാല് വള്ളങ്ങള്‍ വീതമാണ് മത്സരിക്കുക. ഏറ്റവും കുറഞ്ഞ സമയത്തിനുള്ളില്‍ എത്തുന്ന ആദ്യ നാല് വള്ളങ്ങളാണ് ഫൈനല്‍ മത്സരത്തില്‍ കൊമ്പുകോര്‍ക്കുക

കൂടാതെ, മികച്ച സമയം കുറിക്കുന്ന ഒമ്പത് ചുണ്ടന്‍ വള്ളങ്ങള്‍ അടുത്ത വര്‍ഷത്തെ ചാമ്പ്യന്‍സ് ബോട്ട് ലീഗിലും ഇടം നേടും. വള്ളംകളിയുടെ ഉദ്ഘാടന സമ്മേളനത്തില്‍ ടൂറിസം പൊതുമരാമത്ത് വകുപ്പ് മന്ത്രി പിഎ മുഹമ്മദ് റിയാസ്, ധനകാര്യമന്ത്രി കെഎന്‍ ബാലഗോപാല്‍, റവന്യൂ മന്ത്രി കെ രാജന്‍, കൃഷിമന്ത്രി പി പ്രസാദ്, ജലവിഭവ വകുപ്പ് മന്ത്രി റോഷി അഗസ്റ്റിന്‍ എന്നിവരും ജില്ലയിലെ എംപിമാര്‍ എംഎല്‍എമാര്‍ തുടങ്ങിയവരും പങ്കെടുക്കും.