ഉപഗ്രഹങ്ങളെ ബഹിരാകാശത്ത് എത്തിക്കുന്ന റോക്കറ്റുകളെ തിരിച്ചിറക്കുന്ന സാങ്കേതിക വിദ്യ സ്വന്തമാക്കിയ മൂന്നാമത്തെ രാജ്യമായി ഇന്ത്യ മാറി. ശനിയാഴ്ച ഉച്ചയ്ക്ക് തുമ്പയിലായിരുന്നു വിജയകരമായ പരീക്ഷണം.

ഈ നേട്ടം കൈവരിച്ച മറ്റു രാജ്യങ്ങള്‍ അമേരിക്കയും റഷ്യയും മാത്രമാണ്. രോഹിണി റോക്കറ്റ് ഉപയോഗിച്ചായിരുന്നു പരീക്ഷണം. നൂറു കിലോമീറ്ററോളം ഉയരെ എത്തിയ റോക്കറ്റിനെയാണ് കൃത്യമായി കടലില്‍ തിരിച്ചിറക്കിയത്.


ശ്രീഹരിക്കോട്ടയില്‍ നടത്തുന്ന അടുത്ത പരീക്ഷണത്തില്‍ കൂറ്റന്‍ ജി.എസ്.എല്‍.വി തിരിച്ചിറക്കും. ഇതുവിജയിച്ചാല്‍, സ്‌പെയ്‌സ് സ്‌റ്റേഷനിലേക്കും ചൊവ്വയിലേക്കും ശുക്രനിലേക്കുമുള്ള ഭാവി ദൗത്യങ്ങള്‍ക്ക് മുതല്‍ക്കൂട്ടാവും.



ഒരു റോക്കറ്റിനെ പലവട്ടം ഉപയോഗിക്കാന്‍ കഴിയുന്നതിലൂടെ ശാസ്ത്രജ്ഞരുടെ കഠിനാദ്ധ്വാനവും ഭാരിച്ച നിര്‍മ്മാണച്ചെലവും ഗണ്യമായി കുറയ്ക്കാനാവുകയും ചെയ്യും. തിരിച്ചിറക്കുന്ന ഐ.എ.ഡി# റോക്കറ്റുകളെ തിരിച്ചുകൊണ്ടുവരുന്നത് അതില്‍ ഘടിപ്പിച്ചിരിക്കുന്ന ഇന്‍ഫ്‌ളേറ്റബിള്‍ എയ്‌റോഡൈനാമിക് ഡിസലറേറ്റര്‍ (ഐ.എ.ഡി)സംവിധാനം ഉപയോഗിച്ചാണ്.


ശബ്ദത്തെക്കാള്‍ മൂന്നര ഇരട്ടി വേഗത്തില്‍ കുതിക്കുന്ന റോക്കറ്റിനെ വരെ ഇത് താഴെ എത്തിക്കും. റോക്കറ്റിന്റെ നാലാമത്തെ ഭാഗത്താണ് ഉപഗ്രഹങ്ങളും നിയന്ത്രണ സംവിധാനങ്ങളും കാമറകളും മറ്റും ഘടിപ്പിക്കുന്നത്. ഈ ഭാഗത്താണ് ചെറിയ പാരച്യൂട്ടിന്റെ വലിപ്പമുള്ള ഐ.എ.ഡി ചുരുട്ടി വയ്ക്കുന്നത. ഉപഗ്രഹങ്ങള്‍ വേര്‍പെട്ടുകഴിഞ്ഞാല്‍, ഭൂമിയില്‍ നിന്ന് ലഭിക്കുന്ന നിര്‍ദ്ദേശപ്രകാരം സ്വയം വികസിക്കും. തുടര്‍ നിര്‍ദ്ദേശങ്ങളനുസരിച്ച് വിടര്‍ന്നും ചുരുങ്ങിയും റോക്കറ്റിന്റെ വേഗത നിയന്ത്രിച്ച് ഭൂമിയിലേക്ക് നീങ്ങും.


ഗതി നിയന്ത്രിക്കാനും കൃത്യമായ സ്ഥലത്ത് ഇറക്കാനും കഴിയും. തീപിടിക്കാത്ത കെവ്‌ലോര്‍ഫാബ്രിക് പോളി ക്‌ളോറോഫെറീന്‍ ഉപയോഗിച്ച് വി.എസ്.എസ്.സിയിലാണ് ഇത് നിര്‍മ്മിച്ചത്.