അഭിരാമിയുടെ നില ഗുരുതരമാക്കിയത് മുഖത്തിനേറ്റ മുറിവ്.... ആ മുറിവില് നിന്ന് വൈറസ് തലച്ചോറിലെത്താന് വളരെ കുറച്ചു സമയം മതിയെന്നു വിദഗ്ധര്
ഞരമ്പുകളുടെ അറ്റങ്ങള് കൂടുതലുള്ള ഭാഗമാണ് മുഖം. ഇവിടെ കടിയേല്ക്കുമ്പോള് നായയുടെ ഉമിനീരിലുള്ള വൈറസ് വളരെ വേഗം ഞരമ്പിലേക്കു പ്രവേശിക്കും. മുഖത്തെ മുറിവില്നിന്നു വൈറസ് തലച്ചോറിലെത്താന് പരമാവധി നാലു മണിക്കൂര് മതിയാകും.
5 മിനിറ്റിനകം കടിയേറ്റ ഭാഗത്തു സോപ്പും വെള്ളവും ഉപയോഗിച്ചു കഴുകി പരമാവധി വൈറസുകളെ ഇല്ലാതാക്കണമെന്നു വിദഗ്ധര് . മുഖത്തെ മുറിവില്നിന്നു പേവിഷബാധ തലച്ചോറിലേക്കു വ്യാപിച്ചിട്ടുണ്ടാകാമെന്നു കോട്ടയത്തു കുട്ടിയെ ചികിത്സിച്ച ഡോക്ടര്മാരും അറിയിച്ചിരുന്നു.
മുഖത്താണു കടിയേല്ക്കുന്നതെങ്കില് വൈറസിനെ നേരിട്ടു നശിപ്പിക്കുന്ന ആന്റിബോഡി ഇമ്യൂണോഗ്ലോബുലിന് വളരെ വേഗം കുത്തിവയ്ക്കണം. എന്നാല്, കടിയേറ്റ് നാലു മണിക്കൂറോളം വൈകി 10.55നാണു പത്തനംതിട്ട ജനറല് ആശുപത്രിയില് കുട്ടിക്ക് ഇമ്യൂണോഗ്ലോബുലിന് കുത്തിവച്ചത്.
തലച്ചോറിന്റെ പ്രവര്ത്തനം മെച്ചപ്പെടുത്താനും ശരീരത്തിലെ ഓക്സിജന്റെ അളവ് ഉയര്ത്താനുമുള്ള ചികിത്സകളാണു കോട്ടയം കുട്ടികളുടെ ആശുപത്രിയില് നടത്തിയത്. രണ്ടാം തീയതി വൈകിട്ടാണ് കുഞ്ഞിനെ ഇവിടെ എത്തിച്ചത്.
അസ്വാഭാവിക പെരുമാറ്റം എന്നതായിരുന്നു ആരോഗ്യപ്രശ്നം. മുഖത്തും ദേഹത്തും പട്ടി കടിച്ച പാടുകളും ഉണ്ടായിരുന്നു. ആരോഗ്യ പ്രശ്നങ്ങള് വിലയിരുത്തിയ ശേഷം അപ്പോള് തന്നെ കുട്ടിയെ തീവ്രപരിചരണ വിഭാഗത്തിലേക്ക് മാറ്റുകയും ചികിത്സ ആരംഭിക്കുകയും ചെയ്തെന്ന് സൂപ്രണ്ട് പറഞ്ഞു.
മൂന്നാം തീയതി രാവിലെ രാവിലെ കുട്ടിയുടെ ശരീരത്തിലെ ഓക്സിജന്റെ അളവ് കുറയാന് തുടങ്ങുകയും ഒപ്പം രക്ത സമ്മര്ദവും ഹൃദയമിടിപ്പും വ്യത്യാസപ്പെട്ടു. ഇതോടെ കുട്ടിയെ വെന്റിലേറ്ററിലേക്കു മാറ്റി. ചികിത്സ തുടരവേയാണ് തലച്ചോറിന്റെ പ്രവര്ത്തനം കുറയുന്നതായും തലച്ചോറില് വൈറസ് ബാധിച്ചെന്നും കണ്ടെത്തി. ഏതു വൈറസ് ആണെന്ന് സ്ഥിരീകരിച്ചില്ലെങ്കിലും പരിശോധനാ ഫലം വരുന്നതു കാത്തുനില്ക്കാതെ ചികിത്സകള് തുടര്ന്നു. ഇതിനിടെ സ്രവങ്ങള് പുണെ ഇന്സ്റ്റിറ്റിയൂട്ടിലേക്ക് അയയ്ക്കുകയും ചെയ്തു. ആദ്യം ശിശുരോഗ ചികിത്സാ വിഭാഗത്തിലെ ഡോക്ടര്മാരാണ് പരിശോധിച്ചത്. തുടര്ന്ന് മന്ത്രി വീണാ ജോര്ജിന്റെ നിര്ദേശ പ്രകാരം, സാംക്രമിക രോഗം, കമ്യൂണിറ്റി മെഡിസിന്, ന്യൂറോ മെഡിസിന്, അനസ്തീസിയ, മെഡിസിന് വിഭാഗങ്ങളിലെ ഡോക്ടര്മാരുടെ സംഘം പലതവണ കുട്ടിയുടെ ആരോഗ്യ സ്ഥിതി വിലയിരുത്തി ചികിത്സ നല്കി.
എന്നാല് ഇന്നലെ രാവിലെ കുട്ടിയുടെ ആരോഗ്യാവസ്ഥ കൂടുതല് ഗുരുതരമായി. ഉച്ചയോടെ മരണത്തിനു കീഴടങ്ങി. ഇതിനു പിന്നാലെ തന്നെ പുണെ വൈറോളജി ലാബോറട്ടറിയിലേക്ക് അയച്ച കുട്ടിയുടെ സ്രവ സാംപിളിന്റെ പരിശോധനാ ഫലം എത്തി പേ വിഷബാധ സ്ഥിരീകരിച്ചു.
അതേസമയം അഭിരാമിയുടെ പോസ്റ്റ്മോര്ട്ടം ഒഴിവാക്കണമെന്ന കുടുംബാംഗങ്ങളുടെ അഭ്യര്ഥന അംഗീകരിച്ചതായി മെഡിക്കല് കോളജ് സൂപ്രണ്ട് .
https://www.facebook.com/Malayalivartha
