കോട്ടയത്ത് പേവിഷബാധയുടെ ലക്ഷണങ്ങൾ പ്രകടിപ്പിച്ച പോത്ത് ചത്തു. പാമ്പാടി പഞ്ചായത്ത് രണ്ടാം വാർഡിലെ പന്തമാക്കൽ വീട്ടിൽ തങ്കമ്മ ഹരിയുടെ വീട്ടിലെ പോത്താണ് ചത്തത്. രണ്ടാഴ് മുമ്പ് പോത്തിനെ ഒരു തെരുവുനായ കടിച്ചിരുന്നു. ഇന്നലെ രാത്രി മുതലാണ് പോത്ത് പേ വിഷബാധയുടെ ലക്ഷണങ്ങൾ പ്രകടിപ്പിച്ചത്.

ഈ നായയ്ക്കും പേവിഷ ബാധ ഉണ്ടായിരുന്നതായി സംശയമുണ്ടായിരുന്നു. പോത്തിന്റെ പേ വിഷ ബാധ സ്ഥിരീകരിക്കാൻ കൂടുതൽ പരിശോധനകൾ നടത്തും. മേഖലയിൽ പ്രതിരോധ പ്രവർത്തനങ്ങളും ഊർജിതമാക്കുമെന്ന് പഞ്ചായത്തും ആരോഗ്യ വകുപ്പും അറിയിച്ചു.

അതേസമയം പേവിഷബാധ പ്രതിരോധ വാക്‌സിന്റെ KB 21002 എന്ന ബാച്ച് പിൻവലിച്ചു. വെയർ ഹൗസുകൾക്ക് ഇതുസംബന്ധിച്ച് കെ.എം.സിസിഎൽ നിർദേശം നൽകി. വാക്‌സിന്റെ ഗുണനിലവാരം പരിശോധിക്കാൻ വേണ്ടി സാമ്പിൾ കേന്ദ്ര ലാബിലേക്ക് വീണ്ടും പരിശോധനക്ക് അയക്കുന്ന സാഹചര്യത്തിലാണ് നടപടി.

പേവിഷ വാക്‌സിൻ ഫലപ്രദമല്ല എന്ന വിമർശനം പല കോണുകളിൽ നിന്ന് ഉയർന്നുവന്നിരുന്നു. എന്നാൽ കേന്ദ്ര ലാബിൻറെ അനുമതിയോടുകൂടിയാണ് വിതരണം ചെയ്തതെന്നായിരുന്നു സംസ്ഥാന സർക്കാറിന്റെ നിലപാട്. പേവിഷബാധ വാക്സിന് എല്ലാ വിധ ഗുണനിലവാരവുമുണ്ട് എന്ന് നിയമസഭയിലടക്കം ആരോഗ്യമന്ത്രിയും പറഞ്ഞിരുന്നു.