കോളനിവാഴ്ചയുടെ ശേഷിപ്പുകൾ തുടച്ചു നീക്കി രാജ്പഥ് കര്‍ത്തവ്യപഥ് എന്ന് അറിയപ്പെട്ടു തുടങ്ങിയിരിക്കുകയാണ്. സെന്‍ട്രല്‍ വിസ്ത പദ്ധതിയുടെ ഭാഗമായി 608 കോടി രൂപ മുടക്കിയാണ് കര്‍ത്തവ്യ പഥ് ഉള്‍പ്പെടുന്ന സെന്‍ട്രല്‍ വിസ്ത അവന്യൂ പുതുക്കി പണിതത്. പൊതുജനങ്ങള്‍ക്കായി കാല്‍നടപാത, ശുചിമുറികള്‍ അടക്കം കൂടുതല്‍ സൗകര്യങ്ങളും ഒരുക്കിയിട്ടുണ്ട്.

ഇതുവരെ രാജ്പഥ് എന്നറിയപ്പെട്ടിരുന്ന വീഥി പുനര്‍ നാമകരണം ചെയ്യാന്‍ എന്‍ഡിഎംസി ഔദ്യോഗികമായി തീരുമാനമെടുക്കുകയായിരുന്നു. ഇപ്പോൾ ഇതാ വിഷയത്തിൽ നിർണ്ണായകമായ കുറിപ്പ് പങ്കു വച്ച് രംഗത്ത് വന്നിരിക്കുകയാണ് സന്ദീപ് വാചസ്പതി. അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ;

എന്തു കൊണ്ട് രാജ്പഥ് കർത്തവ്യപഥ് ആയി? രാജപാതയിൽ കൂടി സഞ്ചരിക്കുന്നവർക്ക് തങ്ങൾ നാടിൻ്റെ സേവകർ ആണെന്നോ നാടിനെ സേവിക്കണമെന്നോ ഉള്ള ബോധം ഉണ്ടാകില്ല. അവർ രാജാക്കന്മാരും ജനങ്ങൾ കീഴാളരും ആണെന്ന ചിന്തയെ ഉണ്ടാകൂ. തിരഞ്ഞെടുപ്പിൽ വിജയിച്ചതോടെ, ജനങ്ങൾ ഏൽപ്പിച്ചു നൽകിയത് അധികാരമല്ല, അവരെ സേവിക്കാനുള്ള കർത്തവ്യമാണ് വന്നു ചേർന്നത് എന്ന ബോധമാണ് ഓരോ നേതാവിനും ഉണ്ടാകേണ്ടത്.

ഇതാണ് പേരുമാറ്റത്തിലൂടെ കേന്ദ്രസർക്കാർ ലക്ഷ്യം വെക്കുന്നത്. ജനപ്രതിനിധി ഇനി മുതൽ രാജാവല്ല കർത്തവ്യ ബോധമുള്ള ജനസേവകനാകണം. ഇങ്ങനൊക്കെയാണ് ഈ രാഷ്ട്രം അടിമത്തം ഇല്ലാതാക്കുന്നത്. പുതിയ ഭാരതത്തിൽ അടിമത്ത ചിഹ്നങ്ങൾക്ക് സ്ഥാനമില്ല. അങ്ങനെയാണ് രാജ്യം പരംവൈഭവത്തിൽ എത്തുക.